Chapter Title : വൈരനിര്യാതനം 2 [Master]

ഞാനും പകല്‍ വീട്ടിലിരിക്കാതെ പുറത്ത് ചുറ്റിക്കറങ്ങിയിട്ട് രാത്രിയാണ് തിരികെ ചെന്നത്. എന്തായാലും അവള്‍ നടന്ന കാര്യങ്ങള്‍ ആരോടും പറഞ്ഞിട്ടില്ല എന്നെനിക്ക് മനസിലായി. അമ്മയുടെ പെരുമാറ്റം പഴയതുപോലെ തന്നെയാണ്. ഞാനും അവളും തമ്മില്‍ സംസാരമില്ലാതായത് അമ്മ ശ്രദ്ധിച്ചിട്ടില്ല. എന്തായാലും തക്കസമയത്ത് ഉണര്‍ന്ന ബുദ്ധി എന്നെ രക്ഷിച്ചിരിക്കുന്നു. ആ ചിന്ത വളരെ വലിയ ആശ്വാസമാണ്‌ എനിക്ക് നല്‍കിയത്. സത്യത്തില്‍ അവളുമായി സംസാരിച്ച ഒരൊറ്റ സംഭാഷണം പോലും ഞാന്‍ റിക്കോഡ്‌ ചെയ്തിരുന്നില്ല. ആരെയും ചതിക്കുന്നത് എന്റെ രീതിയായിരുന്നില്ലല്ലോ. എന്നെ സ്വന്തം അനുജന്‍ ചതിച്ചിട്ടു കൂടി മറ്റുള്ളവരെ ചതിക്കാന്‍ എനിക്ക് തോന്നിയിട്ടില്ല. പക്ഷെ അവനോടു പ്രതികാരം ചെയ്യണം എന്നത് എന്റെ ഉറച്ച തീരുമാനം തന്നെയായിരുന്നു. എന്നാല്‍ ഇപ്പോള്‍ എനിക്കതെപ്പറ്റി സംശയം തുടങ്ങിയിരിക്കുന്നു. സ്റ്റെഫി എന്നെ വളരെ ഇഷ്ടപ്പെടുന്നുണ്ട് എന്ന തോന്നലില്‍ നിന്നുകൊണ്ട് ഏറെക്കുറെ ആയാസരഹിതമായ ഒരു പ്രതികാരമായിരുന്നു മനസിലുണ്ടായിരുന്നത്. പക്ഷെ അവളുടെ തനിനിറം കണ്ടതോടെ അതിനുവേണ്ടി ഞാന്‍ നടത്തിയ ശ്രമങ്ങളും മുടക്കിയ പണവും എല്ലാം പാഴായി എന്ന് ഞാന്‍ ആശങ്കപ്പെട്ടു. ഗള്‍ഫില്‍ വച്ചു വിളിക്കുമ്പോള്‍ വളരെ അടുപ്പം കാണിച്ചിരുന്ന സ്റ്റെഫി നിസ്സാരമായി എനിക്ക് വശംവദയാകും എന്ന എന്റെ ധാരണയാണ് കടപുഴകിയിരിക്കുന്നത്. അവളിലൂടെ അവനോടുള്ള പ്രതികാരം ഇനി സ്വപ്നം മാത്രം. അവളെന്നെ വെറുക്കുന്നു; അതികഠിനമായി; ഒരു നിമിഷത്തെ അവിവേകം വരുത്തിയ വിന. പെണ്ണിന്റെ സൌന്ദര്യത്തില്‍ മയങ്ങി സ്വയം മറന്നു പ്രവര്‍ത്തിച്ച ഞാന്‍ തീയിലേക്ക് വീണ ഈയാംപാറ്റയായി മാറിയിരിക്കുന്നു. മനസ്സ് നിയന്ത്രിച്ച് മെല്ലെ നീങ്ങിയിരുന്നെങ്കില്‍, സുനിശ്ചിത വിജയം കാണാമായിരുന്നിടത്ത്, നൈമിഷിക വികാരത്തിനു കീഴ്പ്പെട്ട്‌ ഞാന്‍ സകലതും നശിപ്പിച്ചിരിക്കുന്നു. ഇനിയവളെന്നെ ഇഷ്ടപ്പെടില്ല; ഒരിക്കലും. രാത്രി ഉറക്കം വരാതെ