❤️റസിയ❤️ 4 [SKR] 62

“ഒന്നുമില്ലെന്ന് പറഞ്ഞില്ലേ!” അല്പം അലോസരത്തോടെയും ദേഷ്യത്തോടെയുമാണ് അവൻ അത് പറഞ്ഞുതീർത്തത്.

അവന്റെ ആ പെട്ടെന്നുള്ള ആക്രോശിക്കൽ കേട്ടപ്പോൾ റസിയയുടെ ഉള്ളൊന്ന് വിങ്ങി. അവൾക്ക് വല്ലാത്ത സങ്കടം വന്നു. അവൾ പിന്നെ ഒന്നും മിണ്ടാതെ, കട്ടിലിന്റെ ഒരരികിലേക്ക് നോക്കി മൗനമായി ഇരുന്നു. എപ്പോഴും തന്നോട് കുസൃതിയും സ്നേഹവും മാത്രം കാണിക്കാറുള്ള അലി ഇത്തരത്തിൽ പെരുമാറിയത് അവളുടെ കണ്ണുകളെ ഈറനണിയിച്ചു. മുറിയിൽ കുറച്ചുനേരത്തേക്ക് കനത്ത നിശ്ശബ്ദത പടർന്നു.

ഒടുവിൽ ആ മൗനം ഭേദിച്ചുകൊണ്ട് അലി തന്നെ കട്ടിലിൽ എഴുന്നേറ്റിരുന്ന്, വിക്കി വിക്കി ചോദിച്ചു: “ഉമ്മ… ഉമ്മ വേറെ കല്യാണം കഴിക്കാൻ പോവുകയാണോ?”
അതു കേട്ടതും റസിയ ഒരു നിമിഷം ആകെ ഞെട്ടിത്തരിച്ചുപോയി. അവൾ വിശ്വസിക്കാനാവാതെ അവന്റെ മുഖത്തേക്ക് നോക്കി. “ആര്… ആര് പറഞ്ഞു നിന്നോട് ഇതൊക്കെ?”

“അതൊക്കെ ഉണ്ട്…” എന്ന് പറഞ്ഞുകൊണ്ട് അവൻ കട്ടിലിൽ നിന്നെഴുന്നേറ്റു. എന്നിട്ട് തിരിഞ്ഞുനടന്ന് ജനാലയ്ക്കരികിൽ ചെന്ന് പുറത്തെക്ക് നോക്കി നിന്നു.♥️
റസിയ കട്ടിലിൽ നിന്നെഴുന്നേറ്റ് അവന്റെ പുറകെച്ചെന്നു. അവനെ തന്റെ നേർക്ക് ബലമായി തിരിച്ചുനിർത്തിക്കൊണ്ട് ചോദിച്ചു, “ആരാടാ നിന്നോട് ഈ നുണകളൊക്കെ പറഞ്ഞുണ്ടാക്കിയത്? നീ സത്യം പറ…”

കരഞ്ഞു കലങ്ങിയ കണ്ണുകളോടെ അലി അവളുടെ മുഖത്തേക്ക് നോക്കി. “ഉമ്മ അറിയാതെ പിന്നെ… വലിയുപ്പ ഉമ്മാക്ക് വേറെ ആലോചന നോക്കുമോ? ഇല്ല… ഉമ്മയ്ക്ക് എല്ലാം അറിയാം. ഉമ്മ ഇത് എന്നിൽ നിന്നും മനപ്പൂർവ്വം മറച്ചുവെക്കുന്നതാ…” അവന്റെ ശബ്ദം സങ്കടം കൊണ്ട് ഇടറുന്നുണ്ടായിരുന്നു.