ഞായറാഴ്ചയായിരുന്നിട്ടും ടൗണിൽ പറയത്തക്ക വലിയ തിരക്കൊന്നും അനുഭവപ്പെട്ടിരുന്നില്ല. കാർ നേരെ ടൗണിലെ ഏറ്റവും വലിയ വസ്ത്രവ്യാപാര സ്ഥാപനമായ ‘വിസ്മയ ടെക്സ്റ്റൈൽസ്’-ന്റെ മുൻപിലേക്ക് അലി അടുപ്പിച്ചു നിർത്തി. അവൻ വണ്ടി കൃത്യമായി പാർക്ക് ചെയ്ത ശേഷം രണ്ടുപേരും കാറിൽ നിന്നും പുറത്തിറങ്ങി ഷോപ്പിലേക്ക് കയറി.
എയർകണ്ടീഷണറിന്റെ തണുപ്പുള്ള ആ വലിയ ഷോപ്പിലേക്ക് കയറിയ ഉടനെ തന്നെ ഒരു സെയിൽസ് ഗേൾ പുഞ്ചിരിയോടെ അവരുടെ അരികിലേക്ക് നടന്നു വന്നു. “എന്താണ് മാഡം നോക്കുന്നത്?” അവർ തിരക്കി.
“എനിക്ക് കുറച്ച് ലേഡീസ് ടോപ്പുകളും ചുരിദാറുകളും വേണമായിരുന്നു,” റസിയ പറഞ്ഞു.
സെയിൽസ് ഗേൾ അവരെയും കൂട്ടി നേരെ മുകളിലെ നിലയിലുള്ള ലേഡീസ് സെക്ഷനിലേക്ക് നടന്നു. അവിടെയുണ്ടായിരുന്ന കൗണ്ടർ സ്റ്റാഫിനെ അവരെ ഏൽപ്പിച്ച ശേഷം ആ പെൺകുട്ടി താഴേക്ക് തന്നെ പോയി.
അവിടെ ലേഡീസ് സെക്ഷൻ നോക്കിയിരുന്നത് ഒരു പെൺകുട്ടിയായിരുന്നു. അവൾ വളരെ വിനയത്തോടെ റസിയയോട് ചോദിച്ചു, “ഇത്തയ്ക്ക് ഏത് ടൈപ്പ് മോഡലുകളാണ് വേണ്ടത്?”
റസിയ തനിക്ക് ആവശ്യമുള്ള ഡിസൈനുകളെക്കുറിച്ചും കളറുകളെക്കുറിച്ചും അവളോട് പറഞ്ഞു. പെൺകുട്ടി ഓരോന്നായി വസ്ത്രങ്ങൾ എടുത്തു കാണിക്കാൻ തുടങ്ങിയപ്പോൾ അലി അവിടെ തനിക്കൊരു കാര്യവുമില്ലാത്തതുപോലെ ചുമ്മാ ഓരോ റാക്കുകൾക്കിടയിലൂടെ കറങ്ങി നടക്കാൻ തുടങ്ങി. കുറച്ചു സമയം കഴിഞ്ഞപ്പോൾ തുണികൾ തിരഞ്ഞെടുത്തു കഴിഞ്ഞ റസിയ അലിയെ ഉറക്കെ വിളിച്ചു: “അലീ… ഇങ്ങോട്ട് വന്നേ.”
അവൻ മെല്ലെ അവളുടെ അരികിലേക്ക് നടന്നു വന്നു. റസിയ തന്റെ മുന്നിൽ രണ്ട് മൂന്ന് നല്ല ഡിസൈനർ വസ്ത്രങ്ങൾ നിരത്തിവെച്ചുകൊണ്ട് ചോദിച്ചു, “നീ പറ… ഇതിൽ ഏതാണ് കൂടുതൽ ഭംഗി? ഏതാണ് ഞാൻ എടുക്കേണ്ടത്?”
