Chapter Title : അച്ചുവിൻ്റെ അമ്മ എൻ്റെയും 4 [ദുഷ്യന്തൻ]

പിന്നെ ഇടക്കിടക്ക് അങ്ങേരെ കടയിൽ കാണും. പക്ഷേ ഞാൻ ശ്രദ്ധിച്ചത് മുരളി വന്നതിൽപിന്നെ അമ്മൂനെയും അചൂനെയും പുറത്തേക്ക് അങ്ങനെ കാണാറില്ല. രണ്ട് പേരും കടയിലേക്ക് ഇറങ്ങാതെ വീട്ടിൽ തന്നെ. എന്നെ കണ്ട് അമ്മു ഓടി വന്ന് എന്തേലും ഒക്കെ പറഞ്ഞിട്ട് വീണ്ടും തിരികെ പോകും.

എനിക്ക് അതൊരു സുഖമില്ലാത്ത പരിപാടിയാണ്. അത്കൊണ്ട് ഞാൻതന്നെ അമ്മൂനോട് കാരണം തിരക്കി.

“ ആ മോട്ടതലയൻ ഉള്ളപ്പൊ ചെച്ചിയോടും എന്നോടും കടയിലോട്ട് വരരുതെന്ന് അമ്മ പറഞ്ഞിട്ടുണ്ട്. ”
അമ്മു അൽപ്പം നീരസത്തോടെ പറഞ്ഞു.
കാര്യം എനിക്ക് പിടികിട്ടിയെങ്കിലും ഞാൻ അമ്മൂനേ ഒരു സംശയ ഭാവത്തിൽ ഒന്ന് നോക്കി.

“ അതേ... അങ്ങേർക്ക് എന്നെപോലെ കാണാൻ കൊള്ളാവുന്ന പെണ്ണുങ്ങളെ കാണുമ്പോ ഒരു ഇളക്കം കൂടുതലാ..”

പിന്നിയിട്ട തലമുടിയിൽ പിടിച്ച് ചുരുട്ടികൊണ്ട് ഒരു പ്രത്യേക ചിരിയോടെ അമ്മു കൊഞ്ചി പറഞ്ഞു. കൂടെ ഞാനും ചിരിച്ച് സമ്മതിച്ച് കൊടുത്തു.
പലപ്പോഴും അമ്മുവിനോട് ഇടപഴകുമ്പോ ആരതിയെ ഓർമ്മാവരും. സംസാരത്തിലും കുറുമ്പിലും എല്ലാം അവള് തന്നെ.എന്നോടുള്ള അടുപ്പം പോലും.

നേരമിരുട്ടി.. കടയിൽ ഞാൻ മാത്രം ബാക്കിയായപ്പോ അമ്മുവും അച്ചുവും എൻ്റെ കൂടെ കൂടി. കൂടുതലും മുരളിയെപറ്റി ഓരോ കുറ്റങ്ങൾ തന്നെ. ഇത്കേട്ട് ലതേച്ചിയും വന്നു .
പുള്ളിക്കാരൻ്റെ അമ്മവീട് ഇവിടാണ്. അമ്മയുടെ ഒരു വീടും പറമ്പും ഇവിടുണ്ട്. ഭാര്യയേയും മക്കളെയും കളഞ്ഞിട്ട് കാലം കുറച്ചായിട്ട് ഇവിടെയാണ് താമസം.

പുള്ളിക്കാരന് നമ്മുടെ രേവതിയോട് ഒരു ചായ്‌വ് ഒണ്ട്. ഇടക്ക് ഒന്ന് രണ്ട് വട്ടം മുട്ടിനോക്കിയിട്ടൊണ്ടെന്നാണ് ലതേച്ചി പറഞ്ഞത്. അങ്ങേരെ പറഞ്ഞിട്ടും കാര്യമില്ല. രേവതിയെ കണ്ടാൽ ചായ്‌വ് അല്ല മലന്നടിച്ച് വീഴും..