Chapter Title : അർത്ഥം അഭിരാമം 9 [കബനീനാഥ്]

ഹാളിലെ കോർണറിൽ , വസ്ത്രങ്ങൾ അയൺ ചെയ്യുന്ന അമ്മയെ കണ്ടു……

ഫോൺ ടേബിളിലേക്ക് വെച്ചിട്ട് അവൻ അവളുടെ അടുത്തേക്ക് ചെന്നു……

തന്റെ വസ്ത്രങ്ങളാണ് അയൺ ചെയ്യുന്നത്…

ഒരു ജോഡി വസ്ത്രങ്ങൾ, അയൺ ചെയ്തു മടക്കി വെച്ചിട്ടുണ്ട്…

"എന്താ ഒരു വീർപ്പിക്കൽ… ….? "

അവൻ മുഖം വീർപ്പിച്ചു കൊണ്ട് അവളോട് ചോദിച്ചു……

അവളതു ശ്രദ്ധിക്കാതെ ജോലി തുടർന്നു …

" കാര്യം പറയമ്മാ… …. "

അവളതിനും മിണ്ടിയില്ല …

അജയ് സ്വിച്ച് ഓഫ് ചെയ്തു.

അവളവനെ ഒന്ന് രൂക്ഷമായി നോക്കിയിട്ട് , കൈയ്യെത്തിച്ച് സ്വിച്ച് ഓൺ ചെയ്തു ജോലി തുടർന്നു..

അവൻ വീണ്ടും സ്വിച്ച് ഓഫ് ചെയ്തു..

അവൾ വീണ്ടും സ്വിച്ച് ഓണാക്കി ….

അജയ് സ്വിച്ച് ഓഫ് ചെയ്ത് അയൺ ബോക്സിന്റെ കേബിൾ ഊരിയെടുത്ത് അവളെ നോക്കി …

" മോന്തക്കിടി കിട്ടിയത് എനിക്കല്ലേ… അതിന് അമ്മയെന്തിനാ മിണ്ടാതിരിക്കുന്നത്……?"

അഭിരാമി അവനെ രൂക്ഷമായി നോക്കിയതല്ലാതെ പ്രതികരിച്ചില്ല…

അയൺ ചെയ്തിരുന്ന വസ്ത്രം ചുളുക്കിക്കൂട്ടി ടേബിളിലേക്ക് വലിച്ചെറിയുന്നതു പോലെ ഇട്ട്, അവൾ അടുക്കളയിലേക്ക് പോയി..

അവനും പിന്നാലെ ചെന്നു..

"ബാംഗ്ലൂരിന് പോയാലോന്ന് ആലോചിക്കുവാ……. "

ആത്മഗതമെന്ന പോലെ അവൻ പറഞ്ഞു……

അവളതു കേട്ട ഭാവം കാണിക്കാതെ സിങ്കിൽ കിടന്ന ഒരുപാത്രം തന്നെ പല തവണ കഴുകിത്തുടങ്ങി..

" ഞാൻ ബാംഗ്ലൂരിന് പോകുവാന്ന്… "

സഹികെട്ടന്ന പോലെ അവൻ അല്പം ഉച്ചത്തിൽ പറഞ്ഞു.

അതിന് ഞാനെന്തു വേണം എന്ന രീതിയിൽ അവൾ അവനെ ഒന്നു നോക്കി…

"അമ്മയ്ക്കെന്താ പറ്റിയത്…… ?"

അവളുടെ പിന്നിലേക്ക് ചെന്ന് അവൻ ശാന്തതയോടെ ചോദിച്ചു……