Chapter Title : അഴകുള്ള സെലീന 5 [Nima Mohan]

മേദിനി ചേച്ചിയുടെ ഒരു ചെറിയ പകർപ്പാണ് ഇവളെന്നു അവന് തോന്നിപ്പോയി. പെട്ടന്ന് ശ്രീകോവിലിൽ മണി മുഴങ്ങി. ശൗരി അങ്ങോട്ടേക്ക് ശ്രദ്ധ തിരിച്ചു. ശ്രീകോവിലിൽ ദീപങ്ങൾക്ക് നടുവിൽ പ്രഭയോടെ വിളങ്ങുന്ന ഭഗവതിയെ നോക്കി രാധിക പ്രാർത്ഥിച്ചു. നാലമ്പലത്തിന് ചുറ്റും പ്രദക്ഷിണം വെയ്ക്കുമ്പോൾ ശൗരിയോടൊപ്പം രാധികയും ചേർന്നു.. അവർ ഒന്ന് വലം വെച്ചു തൊഴുത് കഴിഞ്ഞപ്പോൾ കരയോഗത്തിൻ്റെ സെക്രട്ടറി ഉണ്ണി നമ്പീശൻ കൈ കാട്ടി വിളിക്കുന്നത് കണ്ട് ശൗരി അങ്ങോട്ടേക്ക് ചെന്നു.. അവനെ കൈ കാട്ടി വിളിക്കുന്നത് തന്നെക്കൂടി ആണെന്ന് തെറ്റിദ്ധരിച്ച് രാധികയും അവൻ്റെ പിന്നാലെ ചെന്നു.

"എന്താ ചേട്ടാ വിളിച്ചത്..."

ശൗരി തിരക്കി..

"നിങ്ങള് രണ്ടു പേർക്കും കൂടി ഒരു ചെറിയ പണിയുണ്ട്.."

നമ്പീശൻ രണ്ട് പേരെന്ന് പറഞ്ഞത് കേട്ട് ശൗരി തിരിഞ്ഞു നോക്കി. രാധികയും കൂടെ നിൽക്കുന്നത് കണ്ടപ്പോൾ അവൻ്റെ ഉള്ളൊന്നു തുടിച്ചു..

"വാ.."

അയാളവരെ വിളിച്ചു കൊണ്ട് ഓഫീസിലേക്ക് കയറി. ഓഫീസിൽ അയാളുടെ മേശപ്പുറത്തു ഒരു കാർഡ്ബോർഡ് ബോക്സ് നിറയെ നോട്ടുകൾ നിറച്ചു വെച്ചിരിക്കുന്നു. അത് കണ്ടതും ശൗരിയുടെ മനം ഒന്ന് കുതിച്ചു കുത്തി.. ആദ്യമായിട്ടാണ് ഇത്രയും പണം കണ്മുന്നിൽ കാണുന്നത്.

"ഉത്സവം കഴിഞ്ഞ് നമ്മുടെ വഞ്ചി തുറന്നപ്പോൾ കിട്ടിയ കാശാണ്.. നിങ്ങള് രണ്ടു പേരും കൂടി ഇതൊന്ന് എണ്ണിയിട്ട് നൂറിൽ താഴെയുള്ള നോട്ടെല്ലാം ഒരു കെട്ട്.. അഞ്ഞൂറിൻ്റെയും ആയിരത്തിൻ്റേയും ഉണ്ടേൽ വേറെ വേറെ കെട്ടി വെച്ച് എത്ര ഉണ്ടെന്ന് ഈ പേപ്പറിൽ എഴുതി വെയ്ക്കണം.."

ശൗരി തലയാട്ടി.

"ഞാൻ കുറച്ച് കഴിഞ്ഞ് വരാം.."

അയാൾ പോയതും ശൗരി രാധികയെ ഒന്നു നോക്കി. അവൾ അവനെയും.