Chapter Title : 🏘️ബോസ്റ്റൻ ബംഗ്ലാവ് 13 [Gladiator]

ചോദിക്കാൻ ആഗ്രഹമുണ്ടായിരുന്നു, പക്ഷേ അത് ചോദിക്കാനുള്ള സമയം ഇതല്ലെന്ന് അവന് തോന്നി.

“ഫെഡറിക്കിന്റെ പുതിയ നോട്ടം നിന്റെ പെങ്ങളുടെ ജീവനാണ്.. ഡെയ്സിയുടെ.അവനോട് ഇപ്പോൾ പോരാടാനുള്ള ശക്തി എനിക്കില്ല…”കത്രീന പറഞ്ഞു.

“ഡെയ്സി.. ഡെയ്സി…അവൾ ഓക്കേ ആണോ…?

“പേടിക്കണ്ട.. നിന്റെ അമ്മയെ ഞാൻ അങ്ങോട്ടേക്ക് പറഞ്ഞയച്ചിട്ടുണ്ട്. ലൈലയുടെ മാന്ത്രിക പൊതി ഉപയോഗിച്ച് അവൾ ഫെഡറിക്കിനെ തടഞ്ഞോളും.

“ഓക്കേ... നമ്മൾ അന്ന് രഹസ്യ വാതിലിലൂടെ പോയി ഒളിച്ചിരുന്നത് പോലെ വീണ്ടും ബേസ്മെൻ്റിലേക്ക് പോവുകയാണോ?” തുറന്ന, ഇരുട്ട് വീണ രഹസ്യവാതിലിനു ഉള്ളിൽ കയറി നിന്നുകൊണ്ട് ഡാനിയേൽ ചോദിച്ചു.

“ഇല്ല.. ഇത്തവണ ബേസ്മെന്റിലേക്ക് അല്ല പോകുന്നത്. അത് പോലെ ഞാൻ നിന്റെ കൂടെ വരുന്നില്ല.. പക്ഷെ നീ സുരക്ഷിതൻ ആയിരിക്കും” എന്ന് പറഞ്ഞുകൊണ്ട് കത്രീന ആ വാതിൽ അടച്ചു. ഇരുട്ട് വീണ ആ കൂട്ടിൽ ഡാനിയേൽ തനിച്ചായി..

“കത്രീന…കത്രീന…” അവൻ ശബ്ദം ഉയർത്തി ഭിത്തിയിൽ മുട്ടി, പക്ഷേ ഉത്തരം കിട്ടിയില്ല. അവൻ്റെ പുറകിൽ ഒരു നേരിയ വെളിച്ചം ഉണ്ടായിരുന്നു. അവൻ തിരിഞ്ഞു കാത്തിരുന്നു, ആ വെളിച്ചം എന്താണെന്നറിയാൻ ശ്രമിച്ചു.മൂന്ന് ഭാഗത്തും ഇരുട്ട്.. എന്നാൽ ഒരു ഭാഗത്ത് ദൂരെ ഒരു വെളിച്ചം കാണാം.. അവനാ വെളിച്ചം ലക്ഷ്യമാക്കി നടന്നു.കുറച്ച് ദൂരം ചെന്നതും കാൽ എന്തിലോ തട്ടുന്നത് പോലെ അവന് തോന്നി.അവൻ താഴേക്ക് നോക്കി.. മണൽ..? പെട്ടെന്ന് അവന് ചുറ്റും വെളിച്ചം വന്നു. ഇത്ര നേരം ഇരുട്ടിൽ നിന്നതിനാൽ അവൾ കണ്ണുകൾ അടച്ചു പോയി.അവൻ മെല്ലെ കണ്ണുകൾ തുറന്ന്.മുന്നിൽ കണ്ട കാഴ്ച കണ്ടവൻ ഞെട്ടിപ്പോയി.

അവൻ്റെ മുമ്പിൽ നീണ്ടുകിടക്കുന്ന കടൽത്തീരം.ചുറ്റും മണൽ.ഡാനിക്ക് മുന്നിൽ മണലിൽ തടി കൊണ്ട് തീർത്ത ഒരു ബെഞ്ച്.താറാവുകളുടെ കൂട്ടം ആ ബെഞ്ചിന് ചുറ്റും അലഞ്ഞുനടന്നു. മുകളിൽ കത്തി ജ്വലിക്കുന്ന സൂര്യൻ.ഒരാൾ ആ ബെഞ്ചിലിരുന്ന് താറാവുകൾക്ക് തിന്നാൻ റൊട്ടി വലിച്ചെറിഞ്ഞു കൊടുക്കുന്നു. ഡാനിയേലിന് ആ മനുഷ്യൻ്റെ മുഖം കാണാൻ കഴിഞ്ഞില്ല.

“എസ്ക്യൂസ്‌ മീ.. ഞാൻ എവിടെയാണ്…?” ബെഞ്ചിനു അടുത്തേക്ക് ചെന്ന് അയാളോട് ഡാനിയേൽ ചോദിച്ചു.

“ഇതോ.. ഇത് നിന്റെ വീട് അല്ലേ….” അയാൾ ഡാനിയെ നോക്കി ചിരിച്ചു. അയാൾ നീളൻ മുടി വശങ്ങളിലേക്ക് ഒതുക്കി വെച്ചിരുന്നു. ചാര കണ്ണുകൾ ആയിരുന്നു അയാൾക്ക്. “യാദൃശ്ചികമെന്ന് പറയട്ടെ.. ഇത് എന്റെയും വീടാണ്…ഹ ഹ” അയാൾ പറഞ്ഞു.

“നിങ്ങൾ ആരാണ്…?!” ഒന്നും മനസിൽ ആകാതെ അവൻ ചോദിച്ചു.

“എന്റെ പേര് Day Star.ചിലർ എന്നെ Son of the Morning എന്ന് വിളിക്കും”