Chapter Title : ദേവരാഗം 12 [ദേവന്‍]

കാണാതെ ഞാനവളുടെ കൊഴുത്ത സൗന്ദര്യം കണ്ണുകള്‍കൊണ്ട് കോരിക്കുടിച്ചുകൊണ്ടിരുന്നു... പാവം ഉറക്കം നിന്നതിന്റെ ക്ഷീണം അവളുടെ മുഖത്ത് കാണാനുണ്ട്... എന്നാലും ഒരുപാട് നേരം ഉറങ്ങിയാല്‍ എന്റെ വീട്ടുകാര്‍ എന്ത് കരുതും എന്ന്‍ വിചാരിച്ചാണവള്‍ അതിരാവിലെ അടുക്കളയില്‍ കയറിയത്.

“...പോവുമ്പോ നീ അനുമോളെക്കൂടി കൊണ്ടുപൊക്കോ... നിന്റെ ഓഫീസൊക്കെ അവള്‍ക്ക് കാണുവേം ചെയ്യാം... എന്നിട്ട് ഡിന്നറൊക്കെ പുറത്തൂന്ന് കഴിച്ചിട്ട് നിങ്ങള് ഇച്ചിരെ വൈകിവന്നാലും മതി...” ചിരവിയ തേങ്ങ മിക്സിയില്‍ അരക്കാന്‍ എടുക്കുന്നതിനിടയില്‍ ചെറിയമ്മ പറഞ്ഞു.

“...ഏയ്‌ അതൊന്നും വേണ്ട ചെറിയമ്മേ... ദേവേട്ടന് ഓഫീസില്‍ ജോലിയുണ്ടാവും അതിനെടേല് ഞാന്‍ പോയാ ശരിയാവില്ല... ഞാന്‍ വരുന്നില്ല ദേവേട്ടാ...” അനു താല്‍പ്പര്യമില്ലാതെ പറഞ്ഞു... അവള്‍ വരുന്നത് എനിക്ക് സന്തോഷമായിരുന്നു... അവളുടെ സാമീപ്യവും സംസാരവുമൊക്കെ ഞാനത്രയ്ക്ക് ഇഷ്ടപ്പെട്ടിരുന്നു.. അജു വരുന്നവരെയെങ്കിലും അവളെന്റെ ഭാര്യയാണല്ലോ..

“..അത് നീയല്ല തീരുമാനിക്കുന്നേ.. ഞാന്‍ പറയണത് മോളങ്ങു കേട്ടാമതി... കല്യാണം കഴിഞ്ഞിട്ട് രണ്ടാഴ്ച്ചയെങ്കിലും ലീവെടുത്ത് ഭാര്യേടെ കൂടെയിരിക്കേണ്ടതിനു പകരം ഇവനിങ്ങനെ ഓഫീസെന്നും പറഞ്ഞു നടക്കും... അതിനൊത്ത് നീയും കൂടിത്തുള്ളണ്ട... ഇവന്‍ പോകുമ്പോ റെഡിയായി കൂടെപ്പൊക്കോണം... നീ ഉച്ചവരെ ഓഫീസിലിരുന്നേച്ചും മോളെ ചുറ്റാനൊക്കെ കൊണ്ടുപോണോട്ടോ... കേട്ടോടാ...??” പറഞ്ഞതും എന്റെ ചന്തിക്ക് അടിവീണു.. അടികൊണ്ട ചന്തി തിരുമ്മി ഞാന്‍ സമ്മതം മൂളി... അതുകണ്ട അനുവിനു ചിരിപൊട്ടി..

ശ്രീമംഗലത്തെ രാജ്ഞീപദമലങ്കരിക്കുന്നതിനിടയില്‍ ചിലപ്പോഴെങ്കിലും അമ്മ മറന്നു പോകുന്ന മാതൃവാത്സല്യം എല്ലാ മക്കള്‍ക്കും ഒരേപോലെ വയറു നിറയെ ഊട്ടുന്ന ചെറിയമ്മയുടെ സ്നേഹം... ചെറിയ കാര്യങ്ങളില്‍പ്പോലുമുള്ള കരുതല്‍.. ഉപാധികളില്ലാത്ത സ്നേഹദീപം..

ചെറിയമ്മയുടെ അന്ത്യശാസനം കേട്ട് അനു ചെറിയമ്മയുടെ കാതിലെന്തോ പറഞ്ഞു.. ചെറിയമ്മ മൂളി..

“..അവള് വരുന്നില്ല ദേവൂട്ടാ... ഇനിയൊരിക്കലാവട്ടെ... ഇന്ന് വേണ്ട...”