Chapter Title : മാധവൻ നായർ ദി ഗ്രേറ്റ് [Seena Baby]

ഇത്ര നേരമായിട്ടും വിളിച്ചില്ലല്ലോ...പതിവില്ലാതെ ഉച്ച ഉറക്കത്തിൽ നിന്നും എഴുന്നേറ്റ് ജനലിലൂടെ പുറത്തേക്ക് നോക്കിയതും പെട്ടന്ന് കണ്ണഞ്ചിപ്പിക്കുന്ന ഒരു പ്രകാശം ജനലിൽ കൂടി ഉള്ളിലേക്ക് വന്നു. ഒപ്പം കാതടപ്പിക്കുന്ന ഒരു ഇടിയൊച്ചയും. മുറ്റത്ത്‌ ചരൽ വാരിയെറിയുന്ന ഒച്ചയോടെ മഴതുള്ളികൾ വീഴാൻ തുടങ്ങി.

വളരെ നാളിനു ശേഷം പെയ്യുന്ന മഴ. പുതുമഴയിൽ നനഞ്ഞ മണ്ണിന്റെ പുതുമണം. സീമ ആ മണം ആസ്വദിച്ചുകൊണ്ട് വരാന്തയിലേക്കിറങ്ങി.

ഒരു കൊച്ചുകുട്ടി മഴ ആസ്വദിക്കുന്ന ഭാവത്തിൽ സീമ മഴ നോക്കി നിന്നു. ചെറിയ ചെറിയ ഇടിയും മിന്നലിനും ഒപ്പം മഴക്ക് ശക്തി കൂടുകയാണ്. അപ്പോഴാണ് വരാന്തയുടെ അങ്ങേ അറ്റത്ത് ഒരു അനക്കം. സീമ നോക്കുമ്പോൾ കുട്ടൻ വരാന്തയുടെ മൂലയിൽ അവന്റെ കൈയിൽ എപ്പോഴും ഉണ്ടാകാറുള്ള ആ കുട്ടി തോർത്തും പുതച്ച് ഇരിക്കുന്നു.

“നീ എപ്പഴാ കുട്ടാ വന്നത്”,സീമ അവനോട് ചോദിച്ചുകൊണ്ട് അവൻ ഇരിക്കുന്നിടത്തേക്ക് ചെന്നു.

“ഞാൻ ഇടിവെട്ടിയപ്പോ ഒടികേറിയതാ മോളെ”, അവന്റെ മുഖത്ത് എപ്പോഴുമുള്ള ആ നിഷ്കളങ്ക ചിരിയോടെ കുട്ടൻ പറഞ്ഞു.

അവന്‌ ആ നാട്ടിൽ ഏറ്റവും ഇഷ്ട്ടം സീമയോടാണ്. കാരണം അവൾ മാത്രമേ അവനെ ‘കുട്ടാ’ എന്ന് വിളിക്കാറുള്ളു. ബാക്കിയുള്ളവർ അവനെ എടാ എന്നും, ഡാ പൊട്ടാ എന്നുമൊക്കെയാണ് വിളിക്കാറ്. തന്നെയുമല്ല മിക്കവാറും എല്ലാ ദിവസവും സീമയാണ് അവന്‌ ഭക്ഷണം കൊടുക്കുന്നതും.

വീട്ടിലെ ഒരംഗത്തിനോടെന്നവണ്ണം ആണ് സീമ അവനോട് പെരുമാറുന്നത്. അതുകൊണ്ടാണ് കുട്ടന് പ്രായം ഉണ്ടായിട്ടും ഇടക്ക് അവൻ ചേച്ചി എന്നു വിളിക്കുന്നതും...

മഴക്ക് ശക്തി കൂടുന്നതിനൊപ്പം മഴവെള്ളം മുറ്റത്ത്‌ നിറയാൻ തുടങ്ങി. മുറ്റത്തിന് സൈഡിൽ മഴവെള്ളം ഒലിച്ചു പോകാൻ വെച്ചിരുന്ന പൈപ്പ് വല്ല