Chapter Title : നീലച്ചിറകുള്ള മോഹങ്ങൾ 2 [ഒലിവർ]

പിന്നെ ഈ പണിയും കൂടി ആകുമ്പോൾ രാത്രി ആകെ തളരും. അതും പോരാഞ്ഞിട്ട് ഒപ്പം താമസിക്കുന്നവളുമാരുടെ മെക്കിട്ടുകേറ്റവും... വേറെ നിവൃത്തിയില്ലാത്തതുകൊണ്ട് സഹിക്കുന്നു എന്നേയുള്ളൂ." ഓർക്കാൻ ആഗ്രഹിക്കാത്തതൊക്കെ തികട്ടി വന്നപ്പോൾ ആരോടൊന്നില്ലാതെ അവൾ പറഞ്ഞുകൊണ്ടിരുന്നു.

“ അല്ല… എന്താ പ്രശ്നമെന്ന് പറഞ്ഞില്ല.” വിഷയം മാറ്റാനെന്ന തരത്തിൽ അവൾ ചോദിച്ചു.

അരവിന്ദ് ഒന്ന് ദീർഘശ്വാസം വിട്ടു. മുഖത്ത് വല്ലാത്തൊരു ഗൗരവം വരുത്തിക്കൊണ്ട് അവൻ പറഞ്ഞു, "അതൊന്നുമില്ല മോളേ... ചെറിയൊരു ബിസിനസ് ടെൻഷൻ. ഞാൻ ഈ ഹോട്ടൽ ബിസിനസ്സ് മാത്രമല്ല ചെയ്യുന്നത്. ഇപ്പോൾ സിനിമാ നിർമ്മാണത്തിലേക്കും വെബ് സീരീസിലേക്കും ഒക്കെ ഒന്ന് ഇറങ്ങിയിട്ടുണ്ട്. സ്വന്തമായി ഒരു പ്രൊഡക്ഷൻ ഹൗസ് തുടങ്ങിയിരിക്കുകയാണ്."

​അഞ്ജുവിന്റെ കണ്ണുകൾ അത്ഭുതം കൊണ്ട് വിടർന്നു. " സാർ സിനിമയൊക്കെ പിടിക്കുന്നുണ്ടോ?! വെബ് സീരീസാണോ?"

​"അതെ, ഇത് എന്റെ ആദ്യത്തെ പ്രോജക്റ്റാണ്," അവൻ വളരെ വിനയം നടിച്ചു കൊണ്ട് മേശയിലേക്ക് അല്പം ആഞ്ഞിരുന്നു. അവളെ തന്റെ വിശ്വാസത്തിലെടുക്കാൻ പാകത്തിൽ അവൻ സ്വരം താഴ്ത്തി. "പുതിയ കഥകൾ പറയണം, പുതിയ ആളുകൾക്ക് അവസരം കൊടുക്കണം എന്നൊക്കെയാണ് എന്റെ ആഗ്രഹം. നല്ല കഴിവുള്ള ഒരുപാട് കുട്ടികൾ പുറത്തുണ്ട്, അവർക്കൊന്നും ശരിയായ പ്ലാറ്റ്‌ഫോം കിട്ടുന്നില്ല."

​"സൂപ്പർ! ശരിക്കും അത് കൊള്ളാം സാർ," ഇപ്പോൾ വല്ലാത്തൊരു ആരാധനയായി അവളുടെ മുഖത്ത്. "എനിക്ക് വെബ് സീരീസ് കാണാൻ ഭയങ്കര ഇഷ്ടമാണ്. രണ്ട് മണിക്കൂറിൽ തീർക്കുന്ന സിനിമകളേക്കാൾ ഒക്കെ എത്ര നല്ലതാ ഇപ്പോഴത്തെ സീരീസുകൾ! കുറേക്കൂടി ഫീല് കിട്ടും"

​സിനിമയോടുള്ള അവളുടെ ഭ്രമം ആ കണ്ണുകളിൽ തിളങ്ങുന്നത് അരവിന്ദ് കണ്ടു. സംഗതി താൻ വിചാരിച്ചതിനേക്കാൾ എളുപ്പമാണെന്ന് അവന് ഉറപ്പായി. " അത് ശരി… അഞ്ജുവിന് സിരീസ് കാണാനൊക്കെ വല്യ താൽപര്യമാണല്ലേ... അഭിനയത്തിലോ? അതിൽ വല്ല താല്പര്യവുമുണ്ടോ?" വളരെ സ്വാഭാവികമായി ചോദിക്കുന്ന മട്ടിൽ അവൻ ആ ചൂണ്ടയിട്ടു.

​അതുകേട്ടതും അഞ്ജുവിന്റെ കവിളുകൾ നന്നായി ചുവന്നു തുടുത്തു. അവൾ ചുമ്മാ മേശയിൽ കോറിക്കൊണ്ടിരുന്നു. "ഏത് പെണ്ണിനാ സാർ അതില്ലാത്തത്?" അവൾ പതുക്കെ മന്ത്രിച്ചു. പിന്നെ സ്വരത്തിൽ ഒരു നിരാശ പടർന്നു. "ഒരു ഷോർട്ട് ഫിലിമിലെങ്കിലും ഒന്ന് അഭിനയിക്കണം എന്നുണ്ട്, ഉള്ളിലെ കഴിവൊക്കെ കാണിക്കാല്ലോ...