Chapter Title : നിധിയുടെ കാവൽക്കാരൻ 18 [കാവൽക്കാരൻ]

അതും പറഞ്ഞ് ഇളിഞ്ഞ ചിരിയോടെ വീണ്ടും നടക്കാൻ തുനിഞ്ഞതേയുള്ളൂ...

"ദേവാ..."

പിന്നിൽ നിന്നും അവളുടെ വിളി വന്നു.

ഞാൻ തിരിഞ്ഞു നോക്കിയപ്പോൾ അവൾ റോഡിന്റെ സൈഡിലേക്ക് വിരൽ ചൂണ്ടി നിൽക്കുകയാണ്.

"എന്താ...?"

അവൾ ചൂണ്ടിയ ഭാഗത്തേക്ക് ഞാൻ നോക്കി. അവിടെ കുറച്ച് കാറുകൾ നിരത്തിയിട്ടിരിക്കുന്ന ഒരു സ്ഥാപനം. 'ശ്രീ മുരുകാ കാർസ്' എന്ന ബോർഡ് കണ്ടപ്പോൾ ഞാൻ അന്തിച്ചുപോയി.

ഞാൻ ഞെട്ടലോടെ കൃതികയെ നോക്കി.

"എടി... ഞാൻ സത്യായിട്ടും വെറുതേ പറഞ്ഞതാ... നീ ആ ഷോപ്പിലെ കാറും നോക്കി നിൽക്കണ്ട. ഇപ്പോൾ വണ്ടി വാങ്ങാൻ മാത്രം കാശൊന്നും എന്റെ കയ്യിലില്ല. നീ അത് വാങ്ങാൻ നിക്കണ്ട..."

എന്റെ വെപ്രാളം കണ്ട് അവൾ പുച്ഛത്തോടെ എന്നെയൊന്നു നോക്കി.

"ഒന്ന് പോടാ ചെക്കാ... അത് കാർ വിൽക്കുന്ന സ്ഥലമല്ല, റെന്റിന് കൊടുക്കുന്ന സ്ഥലമാണ്. ബോർഡ് മര്യാദക്ക് വായിച്ച് നോക്ക്..."

അവൾ പറഞ്ഞപ്പോഴാണ് ഞാൻ ബോർഡിലെ ചെറിയ അക്ഷരങ്ങൾ ശ്രദ്ധിച്ചത്. 'റെന്റ് എ കാർ' എന്ന് എഴുതിയിട്ടുണ്ട്.

ഹാവൂ... വണ്ടി വാങ്ങണ്ടല്ലോ... ഭാഗ്യം. 😌

ഞങ്ങൾ എല്ലാവരും ഒരുമിച്ച് അങ്ങോട്ട് നോക്കി. റോഡിന് അപ്പുറത്താണ് കട. എന്ത് ചെയ്യണം എന്ന രീതിയിൽ ഞാൻ എല്ലാവരെയും നോക്കി.

"എന്നാ പിന്നെ അങ്ങോട്ട് പോവാം... നടന്ന് മടുത്തു..."

രാഹുൽ പറഞ്ഞതോടെ ഞങ്ങൾ റോഡ് മുറിച്ച് കടയുടെ മുന്നിലെത്തി.

കടയുടെ പുറത്ത് ലുങ്കിയുടുത്ത് കുറിയൊക്കെ തൊട്ട് തനി തമിഴനായ ഒരാൾ ഇരിക്കുന്നുണ്ട്.

എനിക്ക് തമിഴ് അറിയാമെങ്കിലും തിരിച്ചു പറഞ്ഞാൽ അവർക്ക് മനസ്സിലാവില്ലാത്തതുകൊണ്ട് ഞാൻ ആ ദൗത്യം കൃതികയെ ഏൽപ്പിച്ചു.

"നീ തന്നെ പോയി കാര്യം പറ..."