Chapter Title : ഓണക്കോടി [രാധ]

ചോര ചീറ്റി പരക്കുന്ന തലയുമായി ഒരു നാലുവയസ്സുകാരൻ.... രാവിലെ ഞാൻ കണ്ട... പിന്നീട് ഞാൻ........ അവളുടെ കൂടെ ഉണ്ടായിരുന്ന കുട്ടി

ഞാൻ വേഗം കുട്ടിയെ വാരിയെടുത്ത് നെഞ്ചോട് ചേർത്തു.. ആദ്യം കണ്ട ഓട്ടോയിലേക്ക് കയറിയപ്പോൾ ആരോ പിടിച്ചുകൊണ്ടുവന്ന് അവളേയും കയറ്റി...ചോര ഒലിക്കുന്ന തലയും പൊത്തി പിടിച്ച് ഞാൻ അക്ഷമനായി ഇരിക്കുമ്പോൾ എല്ലാം നഷ്‌ടപ്പെട്ടവളെപോലെ ഒന്നും മിണ്ടാതെ ബോധം നശിച്ച രീതിയിൽ ഇരിക്കുകയായിരുന്നു അവൾ... കുഞ്ഞുകൈ കൊണ്ട് എന്റെ ഷർട്ടിൽ ബലമായൊന്ന് പിടിച്ചു പിന്നെ ഒന്ന് പിടഞ്ഞു.... ഷർട്ടിലെ പിടിവിട്ട് താഴേക്ക് വീണു ....

  ആശുപത്രിക്ക് മുമ്പിൽ വണ്ടി നിർത്തിയപ്പോൾ ഞാൻ കുഞ്ഞുമായി കാഷ്യോലിറ്റിയിലേക്ക് പാഞ്ഞു... ഡോക്ടർക്ക് മുമ്പിൽ കുഞ്ഞിനെ കിടത്തിയപ്പോൾ.... ഹാർട്ട് ബീറ്റ്‌സ് നോക്കിയ ഡോക്‌ടർ പറയാൻ വാക്കുകൾ കിട്ടാതെ പിടഞ്ഞു..... എന്റെ കണ്ണിൽ വെള്ളം വന്നു നിറഞ്ഞ്  കാഴ്ചകൾ മങ്ങി... കാതുകളിൽ അവന്റെ കുഞ്ഞു കിന്നാരങ്ങൾ വീണ്ടും വീണ്ടും........

  മോർച്ചറിക്ക് മുമ്പിൽ കരയാൻ പോലുമാകാതെ വിറങ്ങലിച്ചിരിക്കുന്ന അവളേയും നോക്കി മരത്തണലിൽ ഇരിക്കുമ്പോൾ ലോട്ടറിക്കാരി വീണ്ടും എന്റെ അരികിലെത്തി....

"ഏതോ നല്ല വീട്ടിലെ കൊച്ചാ... കോളേജിൽ പഠിക്കുമ്പോൾ ഏതോ ഒരുത്തനോടൊപ്പം ഇറങ്ങി പോന്നതാ... അവനു കള്ളും കഞ്ചാവും മറ്റുപല ഇടപാടും ഉണ്ടെന്ന് അറിഞ്ഞപ്പോളേക്കും വയറ്റിൽ..... പിന്നെ ആരാന്റെ മുറ്റം അടിച്ചും പാത്രം കഴുകിയുമാ ആ കുഞ്ഞിനെ വളർത്തീത്.. ഈ കൊല്ലം അവനെ അംഗനവാടീൽ ചേർത്തു... ഓണപ്പരുപാടിക്ക് എല്ലാ പിള്ളേരും കോടി ഉടുത്തു വരുമ്പോൾ അവൻ മാത്രമെങ്ങനെ.... അതാ അവിടെ ചെന്നത്.... അപ്പോൾ അംഗനവാടീൽ ചേർത്തപ്പോൾ വാങ്ങീതിന്റെ ബാക്കി 150രൂപ കൂടി കൊടുക്കാൻ ഉണ്ടെന്ന് ... ബസ്സ്‌ സ്റ്റോപ്പിൽ നിന്ന് കരയുന്നത് കണ്ടപ്പോൾ ഞാൻ നിർബന്ധിച്ചിട്ടാ മോന്റെ മുമ്പിൽ... കിടന്നുപോയ കെട്ട്യോനെ നോക്കാൻ വേറെ വഴിയില്ലാത്തോണ്ടാ ഞാൻ ഇങ്ങനെ ഒരു പണിക്ക്... ഇതീന്ന് കിട്ടുന്ന കൂലിയാ മോനെ ഞങ്ങടെ കഞ്ഞി.. അല്ലാണ്ട് ഇത് വിറ്റിട്ട് ഇപ്പോൾ മരുന്നിനു പോലും തികയൂല... അതാ ഞാൻ  അവളെ അങ്ങനെ നിർബന്ധിച്ചേ... ഇപ്പോൾ അതിന്റെ കൂലിയായി കിട്ടിയ ഇത് കയ്യിലിരുന്നു പൊള്ളുവാ.... "

  സങ്കടം കാരണം പറഞ്ഞ വാക്കുകളിൽ പലതും അവരുടെ തൊണ്ടയിൽ കുടുങ്ങി....