Chapter Title : പാപശൽഭം 15 [Shanushinu] [വിങ്ങുന്ന യാത്രാമൊഴി]

അപ്പാർട്ട്മെന്റിലേക്ക് മാറുകയാണല്ലോ, മോൾ കാനഡയിലേക്ക് വരുമ്പോൾ നിങ്ങൾ അവിടെയാണ് താമസിക്കാൻ പോകുന്നത്. സത്യം പറഞ്ഞാൽ ഒരു വീടിന്റെ ഇന്റീരിയർ ഡിസൈൻ ചെയ്യുന്നതിലോ നിറങ്ങൾ തിരഞ്ഞെടുക്കുന്നതിലോ ഷാഹിദിന് വലിയ കാഴ്ചപ്പാട് ഉണ്ടോ എന്ന് അറിയില്ല. ആ വീട്ടിൽ ഏറ്റവും കൂടുതൽ സമയം പൊന്നു ആവും ഉണ്ടാവ എന്നുള്ളത് കൊണ്ട് അവിടുത്തെ ലിവിംഗ് റൂമിന്റെയും ബെഡ്റൂമിന്റെയും തീമുകളും ഫർണിച്ചറുകളും മോളുടെ ഇഷ്ടത്തിനായിരിക്കണം. പേടിക്കണ്ട, ഞാൻ ഇത് മോളോട് ചോദിച്ച വിവരം അവൻ അറിയില്ല. ഇത് നമ്മൾ തമ്മിലുള്ള ഒരു ചെറിയ സർപ്രൈസ് ആയിരിക്കട്ടെ! സമയം കിട്ടുമ്പോൾ സമാധാനമായിട്ട് ആ കാറ്റലോഗ് നോക്കിയിട്ട്, മോൾക്ക് ഏറ്റവും ഇഷ്ടപ്പെട്ട ഡിസൈൻ ഏതാണെന്ന് എനിക്ക് മാർക്ക് ചെയ്ത് അയച്ചാൽ മതി."

ആ വരികൾ വായിച്ചുതീർന്നപ്പോൾ ജസ്‌നയുടെ കൈകൾ ചെറുതായി വിറച്ചുപോയി. അവൾ ആ ലിങ്കിൽ ക്ലിക്ക് ചെയ്തു. കാനഡയിലെ ഏറ്റവും ആഡംബരപൂർണ്ണമായ ഒരു ഇന്റീരിയർ ഡിസൈൻ കമ്പനിയുടെ എക്സ്ക്ലൂസീവ് കാറ്റലോഗ് സ്ക്രീനിൽ തെളിഞ്ഞുവന്നു—വലിയ ചില്ലുജാലകങ്ങളുള്ള മനോഹരമായ കിടപ്പുമുറികൾ, വെൽവെറ്റ് സോഫകൾ, മാർബിൾ ഫ്ലോറുകൾ, മോഡേൺ കിച്ചണുകൾ!

ജസ്‌ന സ്ക്രീനിലേക്ക് തന്നെ തുറിച്ചുനോക്കി ഇരുന്നുപോയി. അവളുടെ മനസ്സിൽ ആ നിമിഷം വലിയൊരു കൊടുങ്കാറ്റ് തന്നെ വീശിയടിക്കുകയായിരുന്നു.

തന്റെ ജീവിതത്തിലുള്ള രണ്ട് പുരുഷന്മാരുടെയും സമീപനങ്ങളിലെ ആ വലിയ അന്തരം ഒരു മിന്നൽ പോലെ അവളുടെ ബുദ്ധിയിലേക്ക് തുളച്ചുകയറി!

ഒരു വശത്ത് താൻ നിക്കാഹ് കഴിച്ച ഭർത്താവ് കാനഡയെക്കുറിച്ച് അവൻ തന്നോട് സംസാരിച്ചപ്പോഴെല്ലാം അവൻ പറഞ്ഞത് എന്തായിരുന്നു? അവിടുത്തെ പാർട്ടികളിൽ തന്നെക്കൊണ്ട് ഇടീക്കാൻ പോകുന്ന തുറന്ന വസ്ത്രങ്ങളെക്കുറിച്ചും, തന്നെ മറ്റുള്ളവരുടെ മുന്നിൽ പ്രദർശിപ്പിച്ച് അവന്റെ പദവി കാട്ടുന്നതിനെക്കുറിച്ചും മാത്രമായിരുന്നു!