Chapter Title : പാപശൽഭം 18 [Shanushinu] [അവിഹിത തീരത്ത് ജസ്ന]

നാലഞ്ച് സ്വർണ്ണമോതിരങ്ങൾ കിടക്കുന്നുണ്ട്. അതിനിടയിൽ വളരെ നേർത്ത ഡിസൈനിലുള്ള ഈ റോസ്-ഗോൾഡ് മോതിരം കിടന്നാൽ ആരും പ്രത്യേകം ശ്രദ്ധിക്കാൻ ഒന്നും പോകുന്നില്ല. ഇനി അഥവാ സഫയുടെ കുറുമ്പുകണ്ണുകൾ എങ്ങാനും ഇതിൽ പതിഞ്ഞാൽത്തന്നെ—'കല്യാണസമയത്ത് എന്റെ ഉപ്പ എനിക്ക് വേണ്ടി എടുത്തുവെച്ചിരുന്ന മോതിരമാണ്, അന്ന് ഇടാൻ മറന്നുപോയതാ' എന്ന് പറഞ്ഞാൽ തീരാവുന്ന പ്രശ്നമേയുള്ളൂ!

ആ ചിന്ത അവൾക്ക് വലിയൊരു ആശ്വാസവും ധൈര്യവും നൽകി. അവൾ മോതിരം വിരലിലേക്ക് തന്നെ തിരികെ അമർത്തിയിട്ടു.

ടാക്സി കാർ നടക്കാവിലെ ആ വലിയ കൊമേഴ്സ്യൽ ബിൽഡിംഗിന് പിന്നിലെ ഇടറോഡിൽ വന്നുനിന്നു.

കാറിൽ നിന്ന് പുറത്തിറങ്ങിയ ജസ്‌ന, ബിൽഡിംഗിന്റെ സൈഡ് എക്സിറ്റിലൂടെ അകത്തേക്ക് കയറി ഒന്നാം നിലയിലെ പടികൾക്ക് സമീപം നിന്നു. ബാഗിൽ നിന്ന് ഫോൺ എടുത്ത് ഉമ്മയുടെയും ഹമീദ് കാക്കയുടെയും ഷാഹിദിന്റെയും നമ്പറുകൾ ബ്ലോക്ക് ലിസ്റ്റിൽ നിന്ന് മാറ്റി. തുടർന്ന് ശ്വാസമൊന്ന് നേരെയാക്കി അവൾ ഹമീദ് കാക്കയുടെ നമ്പറിലേക്ക് ഡയൽ ചെയ്തു.

രണ്ടാമത്തെ ബെല്ലിൽ തന്നെ അപ്പുറത്തുനിന്ന് ഹമീദ് കാക്കയുടെ ഉത്സാഹത്തോടെയുള്ള ശബ്ദം കേട്ടു: "ഹലോ മോളേ... കാര്യമൊക്കെ കഴിഞ്ഞോ? ഫോൺ ലോക്കറിൽ നിന്ന് കിട്ടിയോ?"

"കഴിഞ്ഞു കാക്കേ... ദാ ഇപ്പോൾ ഒപ്പിട്ടിറങ്ങി താഴെ എത്തിയതേയുള്ളൂ. നല്ല തിരക്കായിരുന്നു അകത്ത്. കാക്ക വണ്ടിയുമായിട്ട് വരുമോ?" അവൾ ഒരു ഭാവഭേദവുമില്ലാതെ ചോദിച്ചു.

"ദാ... കാക്ക പള്ളിയിൽ നിന്ന് നിസ്കാരം കഴിഞ്ഞ് ഇറങ്ങി വണ്ടിയുടെ അടുത്തുതന്നെ നിൽപ്പുണ്ട് മോളേ! അഞ്ചു മിനിറ്റുകൊണ്ട് ഞാൻ ആ ബിൽഡിംഗിന്റെ മുന്നിലെത്താം, മോൾ അവിടെത്തന്നെ നിന്നോ ട്ടോ!"

ഫോൺ വെച്ച് ജസ്‌ന പടികൾ ഇറങ്ങി മുൻവശത്തെ പ്രധാന കവാടത്തിലേക്ക് നടന്നുചെന്നു.