Chapter Title : പതിനെട്ടാം പട്ടയിലെ കള്ളും കുടങ്ങൾ..[Simona]

തുറക്കുമ്പോൾ തട്ടിൻ പുറത്തെ കൊച്ചു ജനവാതിലിലൂടെ, മാവിലകളുടെ നിഴൽ വീഴ്ത്തിക്കൊണ്ട് ഇളംതണുപ്പോടൊപ്പം, വെളിച്ചം കിടക്കയിലേക്ക് വീണിരുന്നു...

കണ്ണുതിരുമ്മി താഴെയെത്തുമ്പോഴേക്ക് അമ്മായി പ്രാതലിന്റെ പണികളെല്ലാം തീർത്ത്, മിറ്റത്തിരുന്നു കോഴിയുടെ പപ്പും തൂവലും പറിക്കുന്നതു കണ്ടു.... "..........മാമനോ അമ്മായേ???"

"..........ആ... എണീറ്റോ മാളൂട്ടി... മാമൻ കൊട്ടടയ്ക്ക ചാക്കും കൊണ്ട് കേച്ചേരിക്ക് പോയിരിക്കാ... അവിടാ അടയ്ക്ക എടുക്കുന്നേ... കുറെ ദിവസായി കെട്ടി വെച്ചേക്കുന്നു... പൂപ്പൽ കയറിയാ പിന്നെ തെരവേ കിട്ടുള്ളു...."

ഇറയത്തെ സ്റ്റാൻഡിലെ തകരടിന്നിലിട്ടുവെച്ചിരുന്ന ഉമിക്കരിയെടുത്ത് മിറ്റത്തേക്ക് കാലിട്ട് തറയിലേക്കിരിക്കുമ്പോൾ അമ്മായി അതിശയത്തോടെ നോക്കി... "..........നീ ഉമിക്കരി ഇരിക്കണ സ്ഥലൊന്നും മറന്നില്ലേ ഇതുവരെ???"

അവരുടെ കണ്ണിൽ ഒരല്പം കണ്ണീരു പൊടിഞ്ഞിരുന്നു... ഞാൻ കുസൃതിച്ചിരിയോടെ ഒന്ന് കണ്ണിറുക്കികാണിച്ചുകൊണ്ട് പല്ലു തേക്കാൻ തുടങ്ങി...

പല്ലുതേപ്പ് കഴിഞ്ഞ് എഴുനേൽക്കുമ്പോഴേക്ക് അമ്മായി ചിക്കൻ വൃത്തിയാക്കി അടുക്കളയിൽ കയറിയിരുന്നു... "..........ഇന്നാ മാളൂ കട്ടൻ..."

"..........ഞാൻ കുളത്തില് കുളിക്കാൻ പോവാ ട്ടാ അമ്മായീ..." അമ്മായീടെ കയ്യിൽ നിന്ന് ചായവാങ്ങി വേഗം കുടിച്ചവസാനിപ്പിച്ച്, അയയിൽ വിരിച്ചിട്ടിരുന്ന തോർത്തുമെടുത്ത് പുറത്തിറങ്ങി… "അതേയ്... പതുക്കെനെ തിരിച്ചു വരുള്ളൂ ട്ടാ... എനിക്ക് കുറെ നേരം വെള്ളത്തി കിടക്കണം... ഇനി അതിന്റെടേൽ വിളിക്കാൻ വരണ്ടാ....." സോപ്പെടുക്കാൻ കുളിമുറിയിലേക്ക് കയറുമ്പോൾ അകത്തേക്ക് നോക്കി വിളിച്ചുപറഞ്ഞു...

"..........അതേ... ഇവിടെ ഉള്ള കുളം തേവീട്ട് കുറച്ചേ ആയുള്ളൂ... വെള്ളത്തിന്റെ കലക്കം മാറീട്ടില്ല... ആ വടക്കേരീലുള്ള കുളത്തിലേക്ക് പൊക്കോ... അവിടെ നല്ല തരിപ്പൂഴിയാ... നല്ല തെളിഞ്ഞ വെള്ളോം...." പറഞ്ഞു തീരും മുൻപേ ബാത്‌റൂമിൽ നിന്ന് സോപ്പുമെടുത്ത് പുറത്തേക്ക് ചാടിയിറങ്ങിയിരുന്നു ഞാൻ...

"..........നീ നിന്റെ ഇഷ്ടത്തിന് കുളിക്കേ ജപിക്കേ എന്താന്നുവെച്ചാ ചെയ്തോ... അല്ലേലും ഈ