Chapter Title : പ്രണയത്തൂവൽ 2 [MT]

ലയ എല്ലാം ഒരു പുഞ്ചിരയോടെ കേട്ടു. അങ്ങനെ അന്നത്തെ ക്ലാസ്സ് കഴിഞ്ഞു. ക്യാമ്പസിന്റെ വാതൽ എത്തിയപ്പോൾ ആണ് ലയ അജുവിനെയും ഗ്യാങ്ങിനെയും കണ്ടത്. മീനുവും കൂട്ടത്തിലുണ്ട്. കോളേജ് സെക്യൂരിറ്റി അനന്തനുമായി സംസാരിക്കുവാണ് അവർ. അപ്പോഴാണ് ലയ അജുവിന്റെ വണ്ടി ശ്രദ്ധിച്ചത്. സിംഗിൾ സീറ്റഡ് ബുള്ളറ്റ് ആണ്. മീനു അവൾടെ അക്ടിവയിലും ജോബിയും ആഭിയും അവരവരുടെ ബുള്ളറ്റിലും. ലയയേ കണ്ടതും അജുവൊഴികെ ബാക്കി മൂന്നുപേരും ചിരിച്ചു. ലയ അവരെ നോക്കി ചിരിച്ചിട്ട് അജുവിന് നേരെ കണ്ണുരുട്ടി അവരെ കടന്ന് പോയി. താമസിയാതെ അവരും അവിടെ നിന്നും യാത്രയായി.

അവർ നാല് പേരും ഒരേ ഏരിയയിൽ ആണ് താമസം. കോളേജിൽ നിന്നും ആറ് കിലോമീറ്റർ ദൂരം ഉണ്ട്. അവർ എന്നും ഒരുമിച്ചാണ് വരുന്നതും പോകുന്നതും.

പോകുന്ന വഴിയിലും അവർ ലയയേ കുറിച്ചാണ് സംസാരിച്ചത്. പക്ഷേ അജു മാത്രം ഒന്നും മിണ്ടാതെയിരുന്നു.

വീട്ടിൽ എത്തിയ ഉടൻ തന്നെ അജു നേരെ തന്റെ മുറിയിലേക്ക് കയറി. ബാഗ് അവിടെ കിടന്ന ടേബിളിൽ വച്ചിട്ട് അവൻ അവന്റെ അലമാര തുറന്നു അതിലെ സേഫിൽ നിന്നും ഒരു ബുക്ക് പുറത്തെടുത്തു. അതിന്റെ താളുകൾ മറിഞ്ഞപ്പോൾ ഒരു സുന്ദര കാവ്യശിൽപ്പത്തിന്റെ മുഖഛായ ആ താളുകളിൽ ഒപ്പിവച്ചിരിക്കുന്നൂ. അവൻ ആ ചിത്രത്തിൽ നോക്കിക്കൊണ്ട് തന്റെ  മനസ്സിൽ മന്ത്രിച്ചു.

“അതെ ഈ മിഴികൾ തന്നെയാണ് ഞാൻ അവരിൽ കണ്ടതും. എന്നെ ഒന്നാ മുഖത്ത് നോക്കാൻ പോലും കെൽപ്പില്ലാത്ത അവസ്ഥയിൽ എത്തിച്ച അവരുടെ കണ്ണുകൾ. അതെ അവൾ‌….”

“അജൂ ……”

പെട്ടന്നാണ് അവൻറെ കാതുകളിൽ അവൻറെ ആമികുട്ടിയുടെ ശബ്ദം കേട്ടത്. അവൻ ഉടൻ തന്നെ വിളികേട്ട് ആ പുസ്തകം പൂട്ടി വച്ചിട്ട് താഴേക്ക് ഓടി. താഴെ എത്തുമ്പോൾ കലിതുള്ളി നിൽക്കുന്ന ആമിനയെ ആണ് അവൻ കാണുന്നത്.

“ അല്ല എന്റെ മൊഞ്ചത്തി ആമികുട്ടി എന്താ മുഖം വീർപ്പിച്ച് നിക്കണേ…”

അജു ഒന്ന് സോപ്പിടാൻ തുടങ്ങി.

“നിന്റെ സോപ്പിങ് ഒക്കെ കയ്യിലിരിക്കട്ടെ. നീ ഇന്ന് അടി ഉണ്ടാക്കിയ കോളേജിൽ.”

ആമിന കലിപ്പിൽ തന്നെ ചോദിച്ചു.

അജു: അല്ലാഹ് ഇല്ലെന്‍റെ ആമികുട്ടി. ഇങ്ങളിത് എന്താണ് പറയണേ. നിക്കൊന്നും അറിയൂല.

ആമിന: നീ ഇപ്പൊഴാടാ വടക്കൻ ആയത്. എനിക്ക് അറിഞ്ഞു നിന്റെ വാപ്പ അതായത് എന്റെ കെട്യോൻ അഹമ്മദ് നല്ല നാടൻ തെക്കൻ ആണ്.  സത്യം പറ. നീ അടിയുണ്ടാക്കിയോ.

അതും പറഞ്ഞു ആമിന അജുന്‍റെ ചെവിക്ക് കിഴുക്കാൻ തുടങ്ങി.