Chapter Title : പ്രണയിക്കാനൊരു സ്ത്രീ [ഋഷി]

ദിയ അവൻ്റെ കയ്യിൽ കൈ കോർത്തു. ഒരു കാര്യം കൂടി...നീ നിൻ്റെ ചേച്ചിയെ ഒരിക്കലും വിടരുത്. പാവമാണെടാ അവര്! ടേക്കിറ്റ് ഫ്രം മി. ഞാനുമൊരു പെണ്ണല്ലേ! ഭാവിയിലെന്തുമാവട്ടെ. ഐ ട്രസ്റ്റ് യൂ! ഇനിയെല്ലാം നിൻ്റെയീ ഹൃദയം പറയണപോലെ! അവളവൻ്റെ നെഞ്ചിലെ ഉറച്ച പേശികളിൽ തഴുകി.

രാധൂൻ്റെ വീട്ടിൽ കൊച്ചുമോൻ ബിജോയുടെ ബർത്ത്ഡേ പാർട്ടിയിൽ പങ്കെടുക്കുമ്പോഴും, മരുമകൻ സൽക്കരിച്ച വൈൻ മൊത്തുമ്പോഴും, തൻ്റെ പേരക്കുട്ടിയെ സ്നേഹമുള്ള ആലിംഗനത്തിലമർത്തുമ്പോഴും, യമുനയുടെ ഉള്ളം രാഹുലിൽ മാത്രം മുഴുകുകയായിരുന്നു... എൻ്റെ ചെക്കൻ! എൻ്റെ മോൻ!.. എൻ്റെ... എൻ്റെ... നിറഞ്ഞ കണ്ണുകളവൾ തുടച്ചു. പിന്നെ തല കുടഞ്ഞ് നോർമ്മലാവാൻ ശ്രമിച്ചു.. രണ്ടു വൈൻ ഗ്ലാസുകളൊഴിഞ്ഞപ്പോൾ അവളൊന്നയഞ്ഞു...

അമ്മേ! വരാന്തയിൽ രാധിക അവളുടെയൊപ്പം വൈനും മൊത്തി അമ്മയെ കെട്ടിപ്പിടിച്ചു. എന്താണ് കാമുകൻ്റെ ലേറ്റസ്റ്റ്?

ഏതു കാമുകൻ? അവളറിയാതെ ചോദിച്ചുപോയി!

ഓഹോ! ഗോപനങ്കിളല്ലാതെ ഈ സുന്ദരീടെ പൊറകേ വേറേം കാമുകനൊണ്ടോ! ഇത്രേം നാളായിട്ട് വേറൊരു ചെക്കനും ഈ സുന്ദരീടെ പൊറകില് നടന്നിട്ടില്ലല്ലോ! അതോ... അവളർദ്ധോക്തിയിൽ നിർത്തി.

രാഹുൽ! മോളോട് തൻ്റെ ചെറുക്കൻ പ്രിയൻ്റെ പേരു പങ്കു വെക്കുമ്പോൾ യമുനയുടെയുള്ളം കവിഞ്ഞൊഴുകുകയായിരുന്നു... കൊച്ചു ചെക്കനാടീ! അവന് എന്നെ വല്ല്യ ഇഷ്ട്ടാണെടീ!

ഓഹോ! ഈ കാമുകൻ്റെ വയസ്സ്? രാധിക കൈവരിയിൽ ചാരി നിന്ന് സുന്ദരിയായ അമ്മയെ നോക്കി മന്ദഹസിച്ചു.

ഇരുപത്തി രണ്ട്... മൂന്നാവണം! യമുന മോളുടെ നേർക്കു നോക്കിയില്ല. അമ്മയുടെ മുഖം മെല്ലെ തുടുത്തു വന്നപ്പോൾ അവൾ വൈൻഗ്ലാസ് വശത്തു വെച്ച് യമുനയെ വാരിപ്പുണർന്നു... ഐ ആം ഹാപ്പി എൻ്റെ പൊന്നമ്മേ! അവൾ യമുനയുടെ കവിളത്തുമ്മവെച്ചു.

ചൊവ്വാഴ്ച്ച. രാവിലെയെണീറ്റോട്ടം. അതു കഴിഞ്ഞ് കട്ടൻ കാപ്പി. പതിവിനു വിപരീതമായി മുടിവെട്ടി, താടി വെട്ടിയൊതുക്കി അലക്കിത്തേച്ച ചാര നിറമുള്ള ഷർട്ടും അലക്കി വൃത്തിയാക്കിയ ഇളം നീല ജീൻസുമണിഞ്ഞ് രാഹുൽ ലൈബ്രറിയിൽ പത്തുമണിയോടെ ഹാജരായി.

ഡാ... തീരം കവിഞ്ഞൊഴുകാനൊരുങ്ങുന്ന നിൻ്റെ നദിയോട് തണുപ്പൻ രീതികളൊന്നും വേണ്ട... ദിയയുടെ വാക്കുകൾ അവനയവിറക്കി. നീണ്ട ഇടനാഴിയിലൂടെ നടക്കുമ്പോൾ സിരകളിൽ ആവേശം നുരഞ്ഞു... എൻ്റെ പെണ്ണിനെ കാണാനാണ് പോവുന്നത്... അവളെ... അവളെ..

കാൽപ്പെരുമാറ്റം ഓഫീസിൻ്റെ വാതിൽക്കൽ നിലച്ചപ്പോൾ യമുന മുഖമുയർത്തി..