Chapter Title : സുതാര്യമായ തടവറ 1 [ഒറ്റയ്ക്ക് വഴിവെട്ടി വന്നവൻ]

രാത്രികാല റേഡിയോ ഷോ.

സമയം 10 മണി..ഷോ തുടങ്ങാൻ നിമിഷങ്ങൾ ബാക്കി..
​മൈക്രോഫോണിന് മുന്നിലെ ചുവന്ന ലൈറ്റ് തെളിഞ്ഞു. നതാഷ ഹെഡ്‌ഫോൺ ശരിയാക്കി സംസാരിച്ചു തുടങ്ങി.

​നതാഷ: "നിശബ്ദതയ്ക്ക് പോലും സ്വന്തമായൊരു ഭാഷയുള്ള ഈ രാത്രിയാമത്തിൽ, നിങ്ങളുടെ ഹൃദയമിടിപ്പുകൾ കേൾക്കാൻ ഞാൻ കാത്തിരിക്കുന്നു. ഇത് 'മനസ്സുതുറക്കാം'.
നഗരം ഉറങ്ങുമ്പോൾ ഉണർന്നിരിക്കുന്ന ചില മുറിവുകളെക്കുറിച്ച് നമുക്ക് സംസാരിക്കാം. ഞാൻ ഡോക്ടർ നതാഷ. ഇന്ന് നമ്മുടെ ആദ്യത്തെ സുഹൃത്ത് ആരാണ്?"

​ലൈൻ കണക്റ്റായി. മറുപുറത്ത് അല്പം പരിഭ്രമിച്ച ഒരു സ്ത്രീശബ്ദം.

​ശ്രോതാവ്: "ഹലോ മാഡം... എനിക്ക് വലിയൊരു സങ്കടമുണ്ട്. എന്റെ ഭർത്താവിന് എപ്പോഴും ജോലിത്തിരക്കാണ്. എന്നോടൊന്ന് സംസാരിക്കാൻ പോലും പുള്ളിക്ക് സമയമില്ല. ആ വലിയ വീട്ടിൽ എനിക്കൊരു വിലയുമില്ലാത്തതുപോലെ തോന്നുന്നു. ഞാൻ എന്ത് ചെയ്യണം?"

​നതാഷ ഒരു നേർത്ത പുഞ്ചിരിയോടെ മറുപടി നൽകി. ഇത് അവൾക്ക് സ്ഥിരം കേൾക്കുന്ന പരാതിയാണ്, ഒരുപക്ഷേ അവളുടെ തന്നെ ജീവിതത്തിന്റെ ഒരു നേർച്ചിത്രം.

​നതാഷ: "പലപ്പോഴും പങ്കാളികൾ ജോലിത്തിരക്കിനിടയിൽ പ്രിയപ്പെട്ടവർക്ക് നൽകേണ്ട പരിഗണന മറന്നുപോകാറുണ്ട്. പക്ഷേ അതിനർത്ഥം അവർക്ക് സ്നേഹമില്ലെന്നല്ല. നിങ്ങൾ നേരിട്ട് സംസാരിക്കാൻ ശ്രമിക്കൂ. മൗനത്തേക്കാൾ വലിയ മരുന്ന് വാക്കുകളാണ്. ധൈര്യമായിരിക്കൂ."

​ആ കോൾ കട്ടായി. നതാഷ ഒരു നിമിഷം ശൂന്യതയിലേക്ക് നോക്കി നിന്നു.

'മൗനത്തേക്കാൾ വലിയ മരുന്ന് വാക്കുകളാണ്' എന്ന് താൻ ഉപദേശിക്കുമ്പോഴും തന്റെ ഭർത്താവ് മാത്യുവിനോട് ഒന്ന് സംസാരിക്കാൻ പോലും തനിക്ക് കഴിയുന്നില്ലല്ലോ എന്നോർത്ത് അവൾ നെടുവീർപ്പിട്ടു.

​അപ്പോഴാണ് അടുത്ത കോൾ വന്നത്. ഒരു വലിയ നിശബ്ദതയ്ക്ക് ശേഷം, അഗാധമായ കടൽ പോലെ ശാന്തവും എന്നാൽ വശ്യവുമായ ഒരു പുരുഷശബ്ദം ഹെഡ്ഫോണിൽ മുഴങ്ങി.

​സാം: "നമസ്കാരം നതാഷാ... ഞാൻ സാം...മറ്റുള്ളവരുടെ മുറിവുകൾ തുന്നിക്കെട്ടാൻ നിങ്ങൾ എത്ര മിടുക്കിയാണ്! പക്ഷേ നതാഷാ, ചില മുറിവുകൾ സ്നേഹപൂർവ്വം സംസാരിച്ചാൽ മാറില്ലെന്ന് നമുക്ക് രണ്ടുപേർക്കും അറിയാം, അല്ലേ?"

​നതാഷ പെട്ടെന്ന് ജാഗരൂകയായി. ആ ശബ്ദത്തിലെ ഗാംഭീര്യം അവളെ വല്ലാതെ ആകർഷിച്ചു.

​നതാഷ: "സുഹൃത്തേ... നിങ്ങൾ എന്താണ് ഉദ്ദേശിക്കുന്നത്?"

​സാം: "ഞാൻ ഉദ്ദേശിക്കുന്നത് നിങ്ങളെയാണ്. പകൽ മുഴുവൻ ആശുപത്രിയുടെ ആ മരവിച്ച ഗന്ധത്തിനിടയിൽ ഇരിക്കുമ്പോൾ നിങ്ങൾ ഒന്ന് ശ്വസിക്കാൻ പോലും മറന്നുപോകുന്നു.
ഈ രാത്രിയിലെ സ്റ്റുഡിയോ മാത്രമാണ് നിങ്ങളുടെ ശ്വാസനാളം.
മറ്റുള്ളവർക്ക് ഉപദേശം നൽകുമ്പോഴും നിങ്ങളുടെ ഉള്ളിലെ ആ ശൂന്യത ഞാൻ കാണുന്നുണ്ട്.

സ്പർശിക്കുമ്പോൾ തണുത്തുറഞ്ഞ മഞ്ഞുപാളി പോലെ മരവിച്ചുപോയ ഒരു ദാമ്പത്യം...!!!!

ഒരു സർജന്റെ ബ്ലേഡ് പോലെ മൂർച്ചയുള്ള