Chapter Title : തമ്പുരാട്ടി 6 [രാമന്‍]

പറ്റിയപോലെ ആരുമില്ലാതെ ഒറ്റക്കുമാവരുത്. അമ്മയുടെ പൈസ കണ്ടോ? പദവി കണ്ടോ ഇല്ലേൽ സ്വന്തം പണി പോവും എന്ന തോന്നൽ കൊണ്ടോ എന്ത് കുന്തം തോന്നിയിട്ടും ആയിക്കോട്ടെ! ഏട്ടത്തിയുടെ അനിയത്തിക്ക് ഒരു കുഴപ്പവും ഇല്ലാതെ നിന്നാൽ മതി.

“ ഓ അമ്മയുണ്ടാവും..അമ്മയില്ലാതെ എങ്ങനെയാ..അന്ന എന്റെയും അനിയത്തില്ലേ അമ്മക്ക് മോളെ പോലെ തന്നെയാ. അപ്പോ അമ്മയില്ലാതെ ഇരിക്കോ?....”വരുന്നിടത്തു വെച്ച് കാണട്ടെ എന്ന് കരുതി  ഞാനങ്ങു തള്ളിമറിച്ചു. അത് കേട്ടപ്പോ ചെക്കന്റെ വീട്ടിൽ നിന്ന് വന്ന എല്ലാരും ശെരിയാ എന്ന പോലെ തല കുലുക്കി. ഏട്ടത്തിയുടെ വീട്ടുകാരുടെ മോന്ത ഞാൻ നോക്കാൻ നിന്നില്ല. ഇവനെന്താ പറയുന്നേ എന്നാവും എല്ലാവരുടെയും ചിന്ത. ഏട്ടത്തിയെ നോക്കിയപ്പോ ആ രണ്ടു കണ്ണും എന്നിൽ തന്നെയാണ്. ഇങ്ങനെ തള്ളി മറിച്ചതിന് അതിന്റെ എടുത്തൂന്ന് തല്ല് കിട്ടുവോ ആവോ?

“ഇന്നാ പിന്നെ അങ്ങനെയാക്കാം.. വീട് കാഴ്ചക്ക് എല്ലാരും കൂടെ വരണം. ഡേറ്റ് ഒന്ന് മുന്നേ പറഞ്ഞാമതി ഞങ്ങൾക്ക് ഒന്ന് ഒരുങ്ങി നിൽക്കാലോ.അന്ന് നമുക്ക് മാനസമ്മതത്തിന്റെ ഡേറ്റ് ഒന്നുകൂടെ ആലോചിക്കാം. എന്താ. ..ഹ്മ്മ് എന്നാ നമ്മൾ ഇറങ്ങല്ലേ...”കെളവൻ അതും പറഞ്ഞു കൊണ്ട് എഴുനേറ്റു. പുറകെ ബാക്കിയുള്ളോരും.

“ഇറങ്ങട്ടെ മോനേ...” അയാൾക്ക് എന്നോടുള്ള ഭവ്യത മാറുന്നില്ല. എന്റെ കൈ പിടിച്ചു മുറുക്കി തോളിൽ രണ്ടു തട്ട് തന്ന് ‌ ഏട്ടത്തിയുടെ അച്ഛന്റെ എടുത്തേക്ക് പോയി. ചെക്കന്റെ അമ്മ എന്നോട് നല്ലപോലെ ചിരിച്ചു പോവട്ടെ എന്ന് ചോദിച്ചു. ഞാൻ തലയാട്ടി. കണ്ടവരെല്ലാം പോവാന്നു പറയുന്നുണ്ട് ഞാൻ തലയാട്ടി കൊടുക്കും. അവസാനം ചെക്കൻ കൂടെ എന്നോട് ചിരിച്ചു കൊണ്ട് ഇറങ്ങി.

വരാന്തയിലേക്ക് ഇറങ്ങിയപ്പോ പുറത്ത് ചെറിയ മഴയാണ്. ഇരുണ്ട് മൂടിയ അന്തരീക്ഷം. ചെക്കന്റെ വീട്ടിൽ നിന്ന് വന്നവർ കാറിലും പിന്നെ പുറത്തു നിർത്തിയ വേറെ ഒരു കാറിലും കേറി. മുറ്റത്തു കിടക്കുന്ന സെന്തിലിന്റെ ഫോർട്യൂണറിലേക്ക് ആയിരുന്നു പോവുമ്പോ എല്ലാവരുടെയും ശ്രെദ്ധ.