Chapter Title : തുടക്കവും ഒടുക്കവും 7 [ശ്രീരാജ്] [Climax]

നിന്നോട് ഞാൻ മുന്നേ പറഞ്ഞതാ, അമ്മയുടെ പേര് പറഞ്ഞ് മോനെയും, മോന്റെ പേര് പറഞ്ഞു അമ്മയെയും ചൊറിയാൻ പോകരുത് എന്ന്. കെട്ടി, രണ്ടാം ദിവസം തന്നെ നീ അത് ചെയ്തല്ലോ എന്റെ മഞ്ചൂ......

ഇതല്ല നിന്റെ കയ്യിൽ നിന്നും ഞാൻ പ്രതീക്ഷിച്ചത്. പിന്നെ, ഇന്നലെ കൂടി ഞാൻ പറഞ്ഞു, ജലജ നീ വിചാരിക്കുന്ന പോലെ ഒരാൾ അല്ല എന്ന്. അതൊരു നീല തിമിംഗലം ആണ് എന്ന്. മകന് വേണ്ടി എന്തും ചെയ്യാൻ മടിയില്ലാത്ത നീല തിമിംഗലം.

ഇതിൽ എനിക്കൊന്നും പറയാനില്ല നിന്നോട്. അവനോട് ഉള്ള ഇഷ്ടം മനസ്സിൽ വച്ച്, നീയായി നിന്റെ വാക്കുകൾ കണ്ടെത്തി, ജലജയോട് സംസാരിച്ചു തീർക്കാൻ നോക്കിക്കോ കാര്യങ്ങൾ. അല്ലെങ്കിൽ ചിലപ്പോൾ.... ഐ ആം സോറി ടു സെ ദിസ്‌.........

ഫാത്തിമയിൽ നിന്നും തനിക്ക് ഒന്നും കിട്ടിയില്ല. അതും കൂടെ ആയപ്പോൾ മഞ്ജിമക്ക് പിടിച്ച് നിൽക്കാൻ ആയില്ല. സ്വയം പ്രാകി, തന്റെ അഹങ്കാരത്തെ പ്രാകി, മഞ്ജിമ കണ്ണിൽ വെള്ളം നിറച്ചു.

തന്റെ പൊന്നു മകന്റെ കല്യാണം, മുൻ പിൻ നോക്കാതെ, അതി വേഗം നടത്തി കൊടുത്തത് തെറ്റായിരുന്നോ എന്നാലോചിച്ചു വ്യസനതയിൽ ആയിരുന്നു ജലജ.

തന്റെ വാതിൽ തുറന്ന് കൊണ്ട്, ജനലിലൂടെ അരിച്ചിറങ്ങുന്ന, സൂര്യ പ്രകാശത്തിന്റെ വെളിച്ചത്തിൽ മഞ്ജിമ, തന്റെ മരുമകൾ റൂമിലേക്ക് കടന്നു വരുന്നത് കണ്ടു എങ്കിലും, ഇളകാതെ, ഒന്നും പറയാതെ കിടന്ന കിടപ്പിൽ തന്നെ കിടന്നു ജലജ.

തന്റെ അരികിൽ വന്നു കിടന്നു, തന്നെ കെട്ടിപിടിച്ചു കൊണ്ട് " അമ്മേ " എന്ന് വിളിച്ച മഞ്ജിമയോട് ഒരക്ഷരം പോലും തിരിച്ചു പറഞ്ഞില്ല ജലജ.