Chapter Title : വിനോദവെടികൾ 5 [ഒലിവര്‍]

ഇവനെക്കൊണ്ട് ഒറ്റയ്ക്ക് പറ്റാത്തോണ്ടാ ഞാനൂടെ…”
“ നിങ്ങള്‍ക്ക് ഇതൊക്കെ വീട്ടിലിരുന്ന് ചെയ്തൂടേ.. ക്ലാസ് കട്ട് ചെയ്തിട്ടാണോ അസൈൻമെന്റ്?” അവർ ദേഷ്യപ്പെട്ടു.
“ അല്ലാ… എന്തായിരുന്ന് വിനോദിനെക്കൊണ്ട് പറ്റായ്ക…? ഞാനൂടെ ഒന്നറിയട്ടെ..” റീന മേശയിൽ കൈകുത്തി നിന്ന് തിരക്കി.
“ ഒന്നുമില്ല.. സ്വാതിയെനിക്ക് മൗര്യസാമ്രാജ്യത്തിന്റെ ഭൂപടം വരച്ചുതരുവാ—”
“ വരയ്ക്കാനൊക്കെ തനിക്കും നന്നായി അറിയാലോ.” അവർ എനിക്കിട്ട് കുത്തി.
“ എന്തായാലും ഇത്രേമായില്ലേ.. ഇനി ഇന്റർവെലിന് എന്നെ കണ്ടിട്ട് ക്ലാസിൽ കേറിയാൽ മതി.” അതും പറഞ്ഞ് മിസ്സ് വീർപ്പിച്ചുകെട്ടിയ മുഖവുമായി തിരിഞ്ഞുനടന്നു.
“ എന്താടാ പ്രശ്നം?” അവരുടെ മട്ടും മാതിരിയും കണ്ട് സ്വാതിയും വിരണ്ടു.
“ ഒന്നും പറയണ്ട.. നിന്റെ ഭാവികെട്ട്യോൻ ഒപ്പിച്ചുവച്ച പണിയാ…”
നടന്നതൊക്കെ അവളോട് വിവരിക്കുമ്പോൾ എല്ലാത്തിനും കാരണഭൂതനായ ഷിയാസ് കയ്യകലത്ത് ഇല്ലാതിരുന്നത് അവന്റെ ഭാഗ്യം.
“ വെറുതെയല്ല ജൂനിയേഴ്സിനോട് നിനക്ക് പെട്ടെന്നിത്ര സ്നേഹം! ഇതാ പറഞ്ഞത് പൊട്ടനെ ചെട്ടി ചതിച്ചാൽ ചെട്ടിയെ പൊട്ടി ചതിക്കുമെന്ന്…” എല്ലാം കേട്ട് ചിരിച്ചുകൊണ്ട് അവൾ പറഞ്ഞു.
“ ദൈവം ചതിക്കുമെന്നല്ലേ?”
“ ദൈവമാണോ പൊട്ടിയാണോ എന്നറീല്ല. ഏതായാലും അവസാനം ചെട്ടിക്കാണേ പണി കിട്ടുന്നെ… ഹും... പണീം മേടിച്ചുവച്ചിട്ട് അവന്‍ തമാശിക്കുകയാണ്! ഏതായാലും നീ പോയി ഐശ്വര്യമായിട്ട് കിട്ടാനുള്ളത് വാങ്ങിച്ചിട്ട് വാ… ഇത് ഞാന്‍ തീർത്തോളാം..” അവളെന്നെ ആശീര്‍വദിച്ച് സ്റ്റാഫ് റൂമിലേക്ക് പറഞ്ഞുവിട്ടു.
അങ്ങനെ ലൈബ്രറിയിൽ നിന്നിറങ്ങി വരാന്തയിലൂടെ നടന്ന് ഞാൻ സ്റ്റാഫ് റൂമിലെത്തി. നോക്കിയപ്പോൾ റീനാ മിസ്സും ഉറ്റതോഴി മഞ്ജു മിസ്സും മാത്രമേ ടേബിളില്‍ ഇരിപ്പുള്ളൂ. അവരിങ്ങനെ ഓരോന്ന് സംസാരിച്ച് ഇരിക്കുകയാണ്. നോക്കുന്തോറും ടെന്‍ഷന്‍ ഇരട്ടിച്ചു. ഞാൻ ചിന്തിച്ചു,