കുറേ നേരം സംസാരിച്ച് സൂസൻ ഫോൺ വെച്ചു..
“നീ എവിടെപ്പോയതാ ലച്ചൂ…?”..
“ ഞാൻ പുറത്തൊക്കെ ഒന്ന് കറങ്ങി…
നീ കുളിച്ചോടീ… ?”..
“ഉം… അല്ലാ… നിനക്ക് മാറ്റിയുടുക്കാനൊന്നുമില്ലേ… ഈ സാരിയും ഉടുത്താണോ നടക്കുന്നേ…?”..
“ ഇതൊക്കെ മതിയെടീ…”..
ലക്ഷ്മിയുടെ പറച്ചിലിൽ ഒരു വേദനയുണ്ടായിരുന്നു..
“ പോര… ദീപു വരട്ടെ… നമുക്കൊന്ന് ടൗണിൽ പോകാം… നിനക്ക് കുറച്ച് ഡ്രസെടുക്കാം…”..
“വേണ്ട സൂസാ…”..
ലക്ഷ്മി വെറുതേ പറഞ്ഞു..
“നീ എന്റെ കൂടെയാ നിൽക്കുന്നത്…അപ്പോ ഞാൻ പറയുന്നതങ്ങ് കേട്ടാ മതി…തൽക്കാലം മാറ്റിയുടുക്കാൻ എന്റേത് തരാം… “..
അതും പറഞ്ഞ് ലക്ഷ്മി അലമാര തുറന്ന് ഒരു നൈറ്റിയെടുത്ത് ലക്ഷ്മിക്ക് കൊടുത്തു.. ഒറ്റനോട്ടം ലക്ഷ്മി ആ അലമാരയുടെ ഉള്ള് കണ്ടു.. ഒരു തുണിക്കടയാണോ അതെന്ന് അവൾക്ക് തോന്നി..അത്രമാത്രം ഡ്രസുകൾ അടുക്കി വെച്ചിരിക്കുകയാണ്..
സൂസൻ കൊടുത്ത നൈറ്റി ലക്ഷ്മി നിവർത്തി നോക്കി.. തന്നെപ്പോലെ രണ്ടാൾക്കിതിൽ കേറാം എന്നവൾക്ക് തോന്നി..
“ ഇത് നിനക്ക് പാകമാകില്ല അല്ലേടീ… സാരമില്ല… ഇതിടണ്ട… നമുക്ക് വേറെ വാങ്ങാം… “..
സൂസൻ ആ നൈറ്റി അലമാരയിലേക്ക് തന്നെ വെച്ചു…
✍️… അടുക്കളയിൽ പാർവതി നല്ല ദേഷ്യത്തിലായിരുന്നു.. ലക്ഷ്മിയുടെ സ്വഭാവം അവൾക്കൊട്ടും പിടിച്ചില്ല.. അതിന് കാരണമുണ്ട്.. ദീപൂന്റെ അമ്മയാണ് ആ സ്ത്രീ എന്നതാണ് കാരണം.. ദീപൂന്റെ അമ്മയുടെ സ്വഭാവം നല്ലതായിരിക്കൽ പാർവതിയുടെ ആവശ്യമാണ്..കാരണം അവളുദ്ദേശിച്ച പോലെ നടന്നാൽ ലക്ഷ്മി അവളുടെ അമ്മായമ്മയായിട്ട് വരും.. കുറച്ച് ദിവസമായി അവളുടെ മനസിൽ ഒരനുരാഗം തോന്നിത്തുടങ്ങിയിട്ടുണ്ട്..അത് ദീപൂനോടാണ്.. പാർവതിയുടെ മനസിൽ മൊട്ടിട്ട പ്രണയം ദീപു അറിഞ്ഞിട്ടില്ല.. അവനോടവൾ പറഞ്ഞിട്ടുമില്ല..
