മഴനീർതുള്ളികൾ 3 [Anamika] 201

ഇടം കൈ തലക്കുപിന്നിൽ വച്ചിരിക്കുന്നു…

വലംകയ്യിലെ നഖം മുഴുവൻ ഈ നേരം കൊണ്ട് വയറ്റിലായിട്ടുണ്ട്….

“ഇതെന്ത് പണ്ടാരമെന്റെ ഈശ്വരാ….ഞാൻ പോയി പിടിക്കണതെല്ലാം കറക്റ്റായിട്ട് എങ്ങനാ വള്ളി ആവുന്നേ….”

കിടന്നിട്ട് കിടപ്പോ ഇരുന്നിട്ട് ഇരിപ്പോ ഉറയ്ക്കുന്നില്ല…

ഇപ്പോൾ താനും ആ റയാനും തമ്മിൽ എന്താണ് വ്യത്യാസം….എന്തുകൊണ്ടാണെങ്കിലും എന്ത് കാരണത്താൽ ആണെങ്കിലും നീതികരിക്കാൻ ആവുന്ന പണിയല്ലല്ലോ കാണിച്ചത്…ഈ കുറ്റബോധത്തിനും കാര്യബോധത്തിനും ഒക്കെ എന്തെങ്കിലും കാണിച്ചുകൂട്ടും മുന്നേ വന്നാലെന്താ ഈശ്വരാ…

അവൻ എണീറ്റു അരുണിനെ വിളിച്ചു കുപ്പി സെറ്റ് ആക്കാൻ പറഞ്ഞു…വേറാരേം വേണ്ട നീ ഒറ്റക്കിങ്ങു പോന്നാ മതീന്ന് പറഞ്ഞപ്പോളേ അവനെന്തോ പറയാനുണ്ടെന്ന് അരുൺ ഊഹിച്ചു…

അരുണെത്തുമ്പോ വരമ്പത്തു വെരുകിനെ പോലെ നടക്കുന്നുണ്ട് ഒരുത്തൻ….

കിട്ടിയപാടെ ഒരു രണ്ടുമൂന്നെണ്ണം പിടിപ്പിച്ചു….

തലയിലെ കെട്ടൊന്നഴയുന്ന പോലെ..

ഒരാശ്വാസം തോന്നിയവന്…

ഒന്നൂടെ ഒഴിക്കാൻ പറഞ്ഞു നീട്ടിയപ്പോൾ അരുൺ മതിയെടാ വീട്ടിൽ പോകാനുള്ളെയാന്നും പറഞ്ഞു സമ്മതിച്ചില്ല…

“വീട്ടില്…..വീട്ടിലേക്ക് ഞാനില്ല…..”

“ആ തൊടങ്ങി….ഡയലോഗ് എങ്കിലും മാറ്റിപിടിയെടെ….കേക്കാൻ തുടങ്ങീട്ട് കൊല്ലം കുറെ ആയി….”

“എടാ….മൈ…..എനിക്കങ്ങോട് കേറാൻ പറ്റത്തില്ലന്ന്….”

“കാരണം…??”

“അതൊന്നുല്ല….”

“പിന്നെ….കടുകിന് വിട്ടപ്പോ കായം വാങ്ങിയോ അതോ വാങ്ങിയ മീനിന്റെ കണ്ണ് പൊട്ടിയതോ…ഇതൊക്കെയാലോ നിങ്ങൾ അമ്മേം മോനും അടി കൂടണ അന്താരാഷ്ട്ര പ്രശ്നം….” അരുൺ ഗ്ലാസ്സിലേക്ക് പകർന്നുകൊണ്ട് അളവ് കൃത്യമാണോന്ന് രണ്ടും കൂടിച്ചേർത്തു നോക്കികൊണ്ട് ചോദിച്ചു…