മഴനീർതുള്ളികൾ 3 [Anamika] 205

ചിന്തകൾ തമ്മിൽ പിടിം വലിം ആയപ്പോൾ അവളെണീറ്റ് പതിയെ വാതിൽ തുറന്നു…

കാലിലേക്ക് നോക്കിയപ്പോ പാദം കമിഴ്ന്നാണ് കിടക്കുന്നത്….

കണ്ണ് മുകളിലേക്ക് നീങ്ങിയപ്പോൾ

മുണ്ടുവാരി പുതച്ചിട്ടുണ്ട്…

ഹാവൂ….സമാധാനം…

പിന്നേ കരിന്തിരി കത്താറായ വിളക്കും എടുത്ത് അവരെ രണ്ടിനേം അബദ്ധത്തിൽ പോലും നോക്കാതെ അകത്തേക്ക് നടന്നു….

“ഇനിയിമ്മാതിരി വല്ലതും എന്നെ കാണിച്ചാൽ ഉണ്ടല്ലോ ദേ ഇവരുടെ കൂട്ടത്തിന്ന് മാറ്റി ഒറ്റക്കിരുത്തും ഞാൻ….” ഓടകുഴലൂതുന്ന കണ്ണനെ കണ്ണുരുട്ടി കാണിച്ചവൾ തിരിഞ്ഞതും ഇനി രണ്ടും കൂടെ എന്തെല്ലാം കാണാൻ കിടക്കുന്നുന്ന മട്ടിലൊരു കള്ള ചിരിയുണ്ട് കണ്ണന്റെ മുഖത്ത്….

നേരം പതിനൊന്നു കഴിഞ്ഞു….രണ്ടും എണീക്കുന്ന ലക്ഷണം കാണാഞ്ഞിട്ട് മായ തന്നെ ചെന്നു കുത്തിപ്പൊക്കി വിട്ടു…

തല വെട്ടിപൊളിക്കുന്ന വേദനയും ഹാങ്ങോവറും ആയിട്ടാണ് ഹരി അടുക്കളയിലേക്ക് എത്തുന്നത്….

ഉച്ചക്കുള്ള കറിക്ക് പയർ അരിയുന്ന അമ്മു അവനെ കാണാത്ത മട്ടിൽ നിന്നു….

കൈക്ക് ഒരു ചെറിയ വിറയൽ പോലെ….

അവൻ ഫ്രിഡ്ജ് തുറക്കുന്നതും എന്തോ എടുത്ത് അടുത്തേക്ക് വരുന്നതും കാണാം…

അമ്മുവിനടുത്തു ഭിത്തിയിൽ ഉറപ്പിച്ചിരുന്ന റാക്കിൽ നിന്നും ഒരു സ്റ്റീൽ ഗ്ലാസ്സെടുത്തു അതിലേക്ക് മുട്ട പൊട്ടിച്ചൊഴിച്ചു…രണ്ട് ചെറുനാരങ്ങയും പിഴിഞ്ഞൊഴിച്ചു….സ്പൂണിട്ട് ഇളക്കി….

ഓട്ടകണ്ണിട്ടു നോക്കിയ അമ്മു ഇതെന്ത് റെസിപിയെന്നു ചിന്തിക്കും മുന്നേ അവനതെടുത്തു വായിലേക്ക് ഒറ്റ കമിഴ്ത്തലായിരുന്നു…

വായുംപൊത്തി ഓക്കാനിച്ചവൾ പുറത്തേക്കൊടി…