Chapter Title : ഒരു ബന്ധത്തിന്റെ പുനർജന്മം [മനോഹരൻ മംഗളോദയം]

മുറിയിൽ മഴയുടെ ശബ്ദം മാത്രമേ ഉണ്ടായിരുന്നുള്ളൂ.

രാജേഷ് അവളുടെ മുഖത്തേക്ക് നോക്കാൻ പോലും മടിച്ചു.

പറഞ്ഞത് അബദ്ധം ആയി പോയെന്ന് അവന് മനസിലായി...

അവളുടെ മുഖത്ത് ദേഷ്യമില്ലായിരുന്നു.

അതായിരുന്നു രാജേഷിനെ കൂടുതൽ ഭയപ്പെടുത്തിയത്.

"അഞ്ജലി..."

അവൻ വിളിച്ചു.

അവൾ പ്രതികരിച്ചില്ല.

കുറച്ച് നിമിഷങ്ങൾ കൂടി കടന്നുപോയി.

ഒടുവിൽ അവൾ തല ഉയർത്തി.

"എത്ര പേർ...?"

രാജേഷിന്റെ ഹൃദയം ഒന്ന് നിശ്ചലമായി.

അവൻ കരച്ചിലും വഴക്കും പ്രതീക്ഷിച്ചിരുന്നു.

പക്ഷേ ഈ ചോദ്യം അല്ല.

"എന്താ...?"

അവൻ സമയം വാങ്ങാൻ ശ്രമിച്ചു.

"എത്ര പേർ എന്ന്."

അഞ്ജലിയുടെ ശബ്ദം ശാന്തമായിരുന്നു.

"ഒരാളോ... രണ്ടാളോ... അതിൽ കൂടുതലോ?"

രാജേഷ് കണ്ണുകൾ താഴ്ത്തി.

"രണ്ട് പേർ."

ആ മറുപടി കേട്ടപ്പോൾ അഞ്ജലിയുടെ മുഖത്ത് വലിയ മാറ്റമൊന്നും ഉണ്ടായില്ല.

പക്ഷേ അവളുടെ വിരലുകൾ കട്ടിലിലെ വിരിപ്പിൽ മുറുകെ പിടിച്ചു.

"എത്ര കാലം?"

അവൾ വീണ്ടും ചോദിച്ചു.

"അധികം ഇല്ല."

"അത് കാലം അല്ല."

ആദ്യമായി അവളുടെ ശബ്ദത്തിൽ ചെറിയ വിറയൽ വന്നു.

"എത്ര കാലം?"

രാജേഷ് ദീർഘമായി ശ്വാസം വിട്ടു.

"കുറച്ച് മാസങ്ങൾ."

വീണ്ടും നിശബ്ദത.

പുറത്ത് മഴ ശക്തിയായി.

അഞ്ജലി ജനലിലേക്ക് നോക്കി.

കണ്ണുകൾ നിറഞ്ഞിരുന്നു.

പക്ഷേ കണ്ണുനീർ വന്നില്ല.

"ഞാൻ ഒരു കാര്യം ചോദിക്കട്ടെ?"

"ചോദിക്ക്."

"അവരിൽ ആരെയെങ്കിലും സ്നേഹിച്ചിരുന്നോ?"

ആ ചോദ്യം കേട്ടപ്പോൾ രാജേഷ് ഉടനെ തല ഉയർത്തി.

"ഇല്ല."

ആ മറുപടി സത്യമായിരുന്നു.

ഒരു മടിയും കൂടാതെ പറഞ്ഞ ആദ്യ മറുപടി.

അഞ്ജലി അത് ശ്രദ്ധിച്ചു.

"ഉറപ്പാണോ?"

"ഉറപ്പാണ്."

അഞ്ജലി ഒരു ചെറിയ ചിരി ചിരിച്ചു.

വേദനയുള്ള ഒരു ചിരി.

"നിങ്ങൾ മറ്റൊരാളെ സ്നേഹിച്ചു എന്ന് പറഞ്ഞിരുന്നെങ്കിൽ ഞാൻ ഇപ്പോൾ തകർന്നുപോയേനെ."

അവൾ നിർത്തി.

"പക്ഷേ ഇപ്പോൾ..."

"ഇപ്പോൾ?"

രാജേഷ് ചോദിച്ചു.

അഞ്ജലി അവന്റെ കണ്ണുകളിലേക്ക് നോക്കി.

"ഇപ്പോൾ എനിക്ക് വേദനിക്കുന്നത് അവർ ഉണ്ടായിരുന്നതുകൊണ്ടല്ല."