Chapter Title : Curious case edited version 1,2,3,4 [Willie Beamen]

തന്നെയാണ്!

"ദിവ്യ... ഞാൻ എബിയാണ്," എന്റെ മുന്നിൽ കലിപ്പിച്ചു നിൽക്കുന്നവളോട് ഞാൻ പതുക്കെ പറഞ്ഞു.

"പണ്ട് കൂടെ പഠിച്ചതാണെന്ന് കരുതി എന്ത് തോന്നിവാസവും ചെയ്യാമെന്നാണോ?"

മൂന്ന് വർഷത്തിന് ശേഷം ആദ്യമായാണ് ഞാൻ അവളെ ഇത്രയും അടുത്തു കാണുന്നത്. ശരിക്കൊന്നു നോക്കാൻ പോലും സമയം തന്നില്ല, അതിന് മുൻപേ അവൾ തോന്നിവാസം തുടങ്ങി.

"മൊബൈലിലൂടെ നല്ല ഒലിപ്പിക്കലായിരുന്നല്ലോ... നേരിൽ ഇപ്പോൾ ഒന്നും മിണ്ടാനില്ലേ?" ക്ലാസ്സിനകത്തും പുറത്തും നിൽക്കുന്ന കുട്ടികൾ ഞങ്ങളെ ശ്രദ്ധിച്ചു തുടങ്ങിയിരുന്നു.

"ദിവ്യ, നമുക്ക് മാറിനിന്ന് സംസാരിക്കാം," ഞാൻ കുറച്ച് പതുക്കെ പറഞ്ഞു നോക്കി. അപ്പോഴാണ് അവളും ചുറ്റുമുള്ള ആളുകളെ ശ്രദ്ധിച്ചത്. മുഖം അല്പം ശാന്തമായി. അവൾ മുന്നേ നടന്നു മൂന്നാം നിലയിലേക്കുള്ള പടികയറി, പിന്നാലെ ഞാനും.

ആളുകൾക്ക് പെട്ടെന്ന് കാണാൻ പറ്റാത്ത ഒരു കോർണറിൽ അവൾ നിന്നു. പച്ചയും നീലയും കലർന്ന ചുരിദാർ ടോപ്പും വൈറ്റ് ലെഗിൻസുമായിരുന്നു വേഷം. കയ്യിലും കാതിലും ഫാൻസി ആഭരണങ്ങൾ. നെറ്റിയിൽ ഒരു ചെറിയ പൊട്ട്. ഷാംപൂ ചെയ്ത് ഒതുക്കിയ മുടി അഴിച്ചിട്ടിരിക്കുന്നു. ലിപ്സ്റ്റിക് ഇട്ടതുകൊണ്ടാകണം ചുണ്ടിന് നല്ല ചുവപ്പ്. ഞാൻ കൂടുതൽ നോക്കേണ്ടെന്ന് തീരുമാനിച്ചു.

"ദിവ്യ, നിനക്ക് എന്തോ മിസ്റ്റേക്ക് പറ്റിയിട്ടുണ്ട്," ഞാൻ വീണ്ടും ശാന്തമായി പറഞ്ഞു.

"എനിക്ക് അറിയാത്ത ആളാണോ നീ? പ്രിയയോട് ചെയ്തത് ഞാനും കണ്ടതല്ലേ?" അവൾ എന്തോ കുത്തിപ്പറയുന്നത് പോലെ എന്നെ പുച്ഛിച്ചു.

ഇവളെന്തിനാണ് പഴയ കാര്യങ്ങളൊക്കെ വലിച്ചിഴയ്ക്കുന്നത്? പ്രിയ പണ്ട് എന്റെ കാമുകിയായിരുന്നു, ഇപ്പോൾ എവിടെയാണോ എന്തോ.

"പഴയ കാര്യമൊക്കെ വിട്... ഞാൻ നിന്നെ ഇപ്പോൾ എന്താ ചെയ്തത്?" ഞാൻ കാര്യം തിരക്കി.

"നിനക്ക് ഒന്നും അറിയില്ലേ?" അവൾ കാര്യം പറയുന്നില്ല, എന്റെ നേരെ തുള്ളുകയാണ്. പുന്നാര മോളേ... നീ കാര്യം പറയാതെ ഞാൻ എങ്ങനെ അറിയാനാണ്? "നിനക്ക് എന്തോ തെറ്റിദ്ധാരണ സംഭവിച്ചിട്ടുണ്ട്," ഞാൻ വീണ്ടും ചിരിക്കാൻ ശ്രമിച്ചു.

“ഇതെന്നാ?”

കയ്യിലിരുന്ന നോക്കിയ സി-1 (Nokia C1) മൊബൈൽ എന്റെ നേരെ നീട്ടിക്കൊണ്ട് അവൾ വീണ്ടും കലിപ്പിലായി. ഞാൻ മൊബൈൽ വാങ്ങി മെസ്സേജുകൾ ഓരോന്നായി വായിച്ചു. എന്റെ പേരിൽ സേവ് ചെയ്ത നമ്പറിൽ നിന്നാണ് മെസ്സേജുകൾ!