Chapter Title : ദേവരാഗം 16 [ദേവന്‍]

പടര്‍പ്പില്‍ തല്ലണ്ട..” ഞാനവളുടെ താടിയില്‍ പിടിച്ച് മുഖം എന്റെ നേരെ തിരിച്ചുകൊണ്ട് ചോദിച്ചു... അവളുടെ കണ്ണുകള്‍ നിറഞ്ഞിരുന്നു..

“...നിക്കൊന്നൂല്ലാന്ന് പറഞ്ഞില്ലേ..?? ദേവേട്ടനെന്തിനാ കാറ് നിര്‍ത്തിയേ.. വണ്ടിയെടുക്ക് പോവാം..” നിറഞ്ഞ കണ്ണുകള്‍ തുടച്ച് അവള്‍ എന്റെ മുഖത്ത് നോക്കിപ്പറഞ്ഞു.. സ്വതവേ റോസാപ്പൂനിറമുള്ള അവളുടെ മുഖം കൂടുതല്‍ ചുവന്നു.. മൂക്കിന്റെ അറ്റത്ത് നിന്നും ചോരപോടിയും എന്ന് തോന്നി... അവള്‍ പറഞ്ഞ ഓരോ വാക്കും ആരോടോ ഉള്ള ദേഷ്യം തീര്‍ക്കുന്നപോലെയായിരുന്നു... അവളുടെ ഈ ഭാവം എന്റെയും സമനില തെറ്റിച്ചു തുടങ്ങിയിരുന്നു..

“...പറയാന്‍ ഉദ്ദേശമില്ലല്ലേ..?? വേണ്ട...!! നമ്മള് രണ്ടും ഒന്നാണെന്നാ ഇതുവരെ ഞാന്‍ കരുതിയിരുന്നത്.. എന്നിട്ടിപ്പോ എന്നോട് മറയ്ക്കാനും നിനക്ക് കാര്യങ്ങളുണ്ടെങ്കില്‍ അത് പറഞ്ഞിട്ട് മതി ഇനി മുന്നോട്ട്.. അല്ലാതെ എങ്ങോട്ടും പോവണ്ട.. ഇവിടെ ഇരിക്കാം..” ഞാന്‍ എഞ്ചിന്‍ ഓഫ് ചെയ്ത് കൈകെട്ടി ഇരുന്നു... ഞങ്ങള്‍ക്കിടയില്‍ മൌനം വന്നു നിറഞ്ഞു... അവളുടെ മുഖത്ത് നോക്കാതെ റോഡിലെ കാഴ്ച്ചകളിലേയ്ക്ക് ഞാന്‍ കണ്ണെറിഞ്ഞു... പക്ഷേ ദേഷ്യത്തോടെയുള്ള എന്റെ സംസാരം കേട്ട് അവള്‍ എന്റെ മുഖത്തേയ്ക്ക് തന്നെ തുറിച്ചു നോക്കി... കുറച്ചു കഴിഞ്ഞിട്ടും ഞാനവളെ ശ്രദ്ധിക്കുന്നില്ല എന്ന് കണ്ട് അവള്‍ എന്റെ മുഖം പിടിച്ച് അവളുടെ നേരെ തിരിച്ചു..

“...ഞാനാല്ലേ എല്ലാം മറച്ചു വച്ച് അഭിനയിക്കുന്നേ...?? അപ്പോ ദേവേട്ടനോ...?? ഉള്ളിലുള്ള വിഷമം മറച്ചുവച്ച് എന്റെ മുന്‍പില്‍ അഭിനയിച്ചാ നിക്ക് മനസ്സിലാവില്ലാന്നു കരുതിയോ..??”

“...ഞാനെന്തു മറച്ചു വച്ചൂന്നാ അനൂ..?? എന്റെ ശബ്ദമുയര്‍ന്നു..

“...അന്ന് ഫാമൌസീന്നു വന്നപ്പോ മുതല്‍ ഞാനും ശ്രദ്ധിക്കണുണ്ട് ദേവേട്ടനെ... ആദിയെക്കുറിച്ച് ഞാമ്പറഞ്ഞ കാര്യങ്ങള്‍ കേട്ടപ്പോ അവളെ വേണ്ടായെന്നു വെച്ചതോര്‍ത്ത് ദേവേട്ടന് കുറ്റബോധണ്ട്.. നിക്കറിയാം... ന്നാ.. ന്നെ