Chapter Title : ?ഏദൻ തോട്ടത്തിന്റെ കാവൽക്കാരൻ 14?[സഞ്ജു സേന]

തിടുക്കത്തിൽ ബൈക്ക് സ്റ്റാർട്ട് ചെയ്തു ..ചെറിയ ഊടുവഴികൾ താണ്ടി അവിടെയെത്തുമ്പോൾ അടയാളമെന്ന മട്ടിൽ സിറ്റി ഹോസ്പിറ്റലിന്റെ എംബ്ലം പതിപ്പിച്ച വെള്ള സ്‌കൂട്ടർ വീടിന്റെ പുറത്തു കണ്ടു .. പറഞ്ഞത് പോലെ നഴ്സിംഗ് സ്റ്റുഡന്റസ് താമസിക്കുന്നതിന് തൊട്ടുമുട്ടി തന്നെയാണ് ആ വീട് ,വീടെന്നു പറഞ്ഞാൽ ...... രണ്ടു നിലയിലും ഒന്നോ രണ്ടോ മുറികളിൽ കൂടാൻ സാധ്യതയില്ല അത്ര വലുപ്പമേയുള്ളു . ചെറിയ പ്ലോട്ടിൽ വാടകക്കാരെ ഉദ്ദേശിച്ചു നിർമ്മിച്ചതാകാം ..ഏതായാലൂം ഷൈനിയെ പോലൊരാൾക്ക് പറ്റിയ സ്ഥലം തന്നെ . അവളുടെ കളികൾ ചേച്ചിയും പിള്ളേരും അറിയാതിരിക്കാനാകും നഴ്സിംഗ് പിള്ളേരുടെ മേൽനോട്ടത്തിന് എന്ന പേരിൽ ഇവിടെ താമസിക്കുന്നത്.... കത്രീന എത്തിയിട്ടില്ല, നോക്കി നിന്ന് സമയമധികം കളയാനില്ല ,നേരെ പോയി കാളിങ് ബെല്ലിൽ വിരലമർത്തി,, കുറച്ചു നേരം കാത്തു നിൽക്കേണ്ടി വന്നു വാതിൽ തുറക്കാൻ .. പകുതി തുറന്ന വാതിലിൽ കൂടി അഴിഞ്ഞുലഞ്ഞ മുടിയോടെ ഉറക്കച്ചടവുള്ള ഷൈനിയുടെ മുഖം പ്രത്യക്ഷപ്പെട്ടു.. ഉറക്കത്തിന്റെ കെട്ടു വിടാത്തത് കൊണ്ടായിരിക്കും എന്നെ ആദ്യം മനസ്സിലായില്ല, അപരിചിത ഭാവത്തിൽ നോക്കിയ കണ്ണുകളിൽ ആളെ മനസ്സിലായതോടെ ഭയം നിറഞ്ഞു ,, ഇന്നലത്തെ പോലെ കയ്യിൽ തോക്കോ മറ്റോ ഉണ്ടോന്നു അറിയാനാകും ആദ്യം നോക്കിയത് എന്റെ കൈകളിലേക്കാണ്, പിന്നെ പുറകിൽ ആരെങ്കിലുമുണ്ടോ എന്നും.. .....ഇല്ല എന്നുറപ്പായപ്പോൾ അവരുടെ മുഖത്ത് ഭയം മാറി പരിചയഭാവത്തിൽ ചെറിയ പുഞ്ചിരി വിരിഞ്ഞു...

''വാ,, '' വശ്യമായ സ്വാഗതം.. ഞാൻ ശ്രദ്ധയോടെ അവരുടെ പിന്നാലെ അകത്തേക്ക് നടന്നു, ഒരു കുടുസ്സു മുറിയാണ്,, രണ്ടു പ്ലാസ്റ്റിക്ക് കസേരയും ടീപ്പോയിയും , അതിനു മുകളിലും കാർഡ്ബോർഡ് ബോക്സിലുമൊക്കെ വസ്ത്രങ്ങളും മറ്റും ചിതറിക്കിടക്കുന്നു ,അതിന്റെ ഒരു മുഷിഞ്ഞ മണം അവിടാകെയുണ്ട് . ''ഇരിക്ക് ...'' അവർ അവിടെ കിടന്ന കസേരയിൽ നിന്ന് ധൃതിയിൽ മുഷിഞ്ഞ തുണികൾ പെറുക്കി മാറ്റി .. ''വല്ലപ്പോഴും ഓഫു കിട്ടുമ്പോഴേ അലക്കാനൊക്കെ സമയം കിട്ടു ,..ഇരിക്ക്, ഞാനൊന്നു ഫ്രഷായി വരാം,,നൈറ്റ് കഴിഞ്ഞു വന്നു ഒന്നു മയങ്ങി വരുമ്പോഴാ ബെല്ല് കേട്ടത് ..'' അവർ പുതച്ചിരുന്ന ഷാൾ ടീപ്പോയിക്ക് മേലെയിട്ടു അകത്തേക്ക് നടന്നു,, അപ്പോഴാണ് അവരുടെ വേഷം ശരിക്ക് ശ്രദ്ധിക്കുന്നത്