Chapter Title : എന്റെ മാത്രം 3 [ ne-na ]

അവളുടെ പിന്നാലെ അവനും.
റൂമിലെത്തിയതും അവനെ തള്ളി ബെഡിൽ ഇട്ട് കൊണ്ട് അവൾ ചോദിച്ചു.
"എന്നെ പറ്റിച്ചു അല്ലെ നീ?"
ചിരിയോടെ അവൻ പറഞ്ഞു.
"ഒരു സർപ്രൈസ്.. എന്തായാലും ഹാപ്പി ആയില്ലേ നീ."
"എനിക്കും അവസരം കിട്ടും നോക്കിക്കോ."ഒന്ന് ചിരിച്ച ശേഷം അവൻ പറഞ്ഞു.
"നാളെ തൊട്ട് ബൈക്കിൽ കോളേജിൽ പോകാല്ലോ നമുക്ക്."
അവൾ ബെഡിലേക്ക് ഇരുന്നു.
"ബൈക്കിൽ പെട്രോൾ അടിക്കുന്നത് നീ ആണ് കേട്ടോ."
അവൻ പറഞ്ഞത് കേട്ട് മുഖത്ത് പുച്ഛം നിറച്ച് അവൾ പറഞ്ഞു.
"അയ്യടാ. കൊള്ളാല്ലോ നീ."
"മുന്നാറിൽ ചോക്ലേറ്റ് ഫാക്ടറിയും, തേയിലത്തോട്ടവും, ഒരു വീടും ഒക്കെ ഉള്ള നിനക്ക് പെട്രോൾ അടിക്കാൻ പൈസ തരാനാണോ പാട്."
"ഓ, ഞാൻ പൈസ തന്നോളം.. പോരെ?"
അവളുടെ മുഖത്തേക്ക് കിടന്ന മുടി മാറ്റി ഇട്ട് കൊണ്ട് അവൻ പറഞ്ഞു.
"ഞാൻ ചുമ്മാ പറഞ്ഞതാടി കൊരങ്ങി.. പക്ഷെ ഒരു കാര്യത്തിൽ എനിക്ക് വിഷമം ഉണ്ട്."
അവൾ അവന്റെ മുഖത്തേക്ക് നോക്കി.
"എന്താടാ?"
"ചോക്ലേറ്റ് ഫാക്ടറി ഒക്കെ ഉണ്ടെന്ന് പറഞ്ഞിട്ടെന്താ. നീ എനിക്ക് ഇതുവരെ ഒരു ചോക്ലേറ്റ് എങ്കിലും വാങ്ങി തന്നിട്ടുണ്ടോ?"
കുസൃതി നിറഞ്ഞ മുഖത്തോടെ അവൾ പറഞ്ഞു.
"ഞാൻ വാങ്ങി തന്നിട്ടില്ലെങ്കിൽ എന്താ, നിന്നെ കൊണ്ട് വാങ്ങിപ്പിച്ച് ഞാൻ കഴിക്കാറില്ലേ?"
"ഇനി തൊട്ട് ഞാൻ വാങ്ങി തരൂല്ല."
അവൾ രണ്ടു കൈയും കൊണ്ട് അവന്റെ കഴുത്തിൽ മുറുകെ പിടിച്ചു.
"വാങ്ങി തരില്ലെടാ നീ?"
പെട്ടെന്നാണ് സുലജയുടെ ശബ്ദം അവർ കേട്ടത്.
"മോളെ നീ കുളിക്കാൻ കയറിയോ?"
"ഇല്ലമ്മാ.."
അവളുടെ മുഖത്ത് ഭയം നിറയുന്നത് അവൻ കണ്ടു.