മൈ ഡീമൻ

My demon | Author : Mahi

മൂന്നാം യാമം....

നിലാവ് തൂകി അർത്ഥ ചന്ദ്രൻ ആകാശത്ത് തെളിഞ്ഞു നിന്ന സമയം, നിറവൂരിനു സമീപത്തെ ഒരു രണ്ടുനില വീടിനുമുന്നിൽ   വെള്ള ലോഹ ധരിച്ച മൂന്നുപേർ പ്രത്യക്ഷപ്പെട്ടു....

അതിൽ ഒരാൾ മുന്നിലേക്ക് കയറി പഠിപ്പുര വാതിലിൽ ആഞ്ഞടിച്ചു....നിർത്താതെയുള്ള വാതിലിലെ തട്ടൽ കേട്ട് നിമിഷങ്ങൾക്കകം ആ വീടിനു വെളിച്ചം പടർന്നു.... വാതിൽ തുറന്ന് 45 വയസിനടുത്ത് പ്രായം തോന്നിക്കുന്ന ഒരാൾ പുറത്തേക്ക് വന്നു.... മുറ്റത്ത് നിൽക്കുന്ന മൂന്നുപേരെകണ്ട് അയാൾ അമ്പരന്നു,

അവരുടെ നിൽപ്പ്, മുഖത്തെ ഭാവം, കണ്ണുകളുടെ നിറം, വസ്ത്ര ധാരണം....

മൂവരും വെള്ള നിറത്തിലെ ലോഹയാണ് ധരിച്ചിരുന്നത്.... വൃത്തതിനുള്ളിൽ നക്ഷത്രം പതിപ്പിച്ച നിർമ്മിത രീതിയിലുള്ള ലോക്കറ്റോടുകൂടിയ മാല കഴുത്തിൽ അണിഞ്ഞിരുന്നു....കറുത്ത മഷി ഒഴിച്ചതുപോലെ ഇരുട്ടിന്റെ നിറം പടർന്ന കണ്ണുകളോടെ അവർ അയാളെ നോക്കി....

"....നിങ്ങളൊക്കെ ആരാ...."

അവരുടെ കണ്ണുകളുടെ അസുരത കണ്ട് ഭയന്ന് രണ്ടടി പിന്നിലേക്ക് മാറിക്കൊണ്ട് അയാൾ ചോദിച്ചു.... അടുത്ത നിമിഷം അതിലൊരാൾ കാറ്റിന്റെ വേഗതയിൽ പാഞ്ഞുവന്ന് അയാളുടെ കഴുത്തിനുപിടിച്ച് ചുവരിനോട് ചേർത്തു.....

ഇരുമ്പിന്റെ ബലമുള്ള കൈകളിൽ കിടന്ന് അയാൾ ഒരിറ്റു ശ്വാസത്തിനായി പിടഞ്ഞു... കഴുത്തിലെ മാംസത്തിന് ചതവുപറ്റി, ഞരമ്പുകൾ പൊട്ടി, എല്ലുകൾ പലതായി ഒടിഞ്ഞുമാറി....

സെക്കന്റുകൾക്കുള്ളിൽ അയാൾ ജീവനറ്റ് നിലത്തേക്ക് ഊർന്നുവീണു.... വായ തുറന്ന് നാവും,കൊഴുത്ത രക്തവും പുറത്തേക്ക് ചാടിയ നിലയിൽ ആയിരുന്നു ആ ശവശരീരം കിടന്നത്..

"ആരാ ഏട്ടാ...."

ഭർത്താവിനുപുറകെ മുറിയിൽനിന്നും ഇറങ്ങിവന്ന അയാളുടെ ഭാര്യ ഉള്ളിൽ നിന്നുതന്നെ വിളിച്ചു ചോദിച്ചു....ഉറക്കച്ചടവോടെ മുടി വാരികെട്ടി അവർ ഉമ്മറത്തേക്ക് ഇറങ്ങിയതും!!!!

വന്ന മൂന്നുപേരിൽ