Chapter Title : ഒളിച്ചോട്ടം 6 [KAVIN P.S]

ഞങ്ങൾ കഴിക്കൽ ഒരുമിച്ച് തുടങ്ങി.

കഴിച്ച് കൊണ്ടിരിന്നപ്പോൾ ഞങ്ങൾ അധികമൊന്നും സംസാരിച്ചില്ല. ഒരു പത്ത് മിനിറ്റിനുള്ളിൽ ഞങ്ങളുടെ കഴിക്കൽ കഴിഞ്ഞു. ഞാൻ കൈ കഴുകാനായി എഴുന്നേറ്റതോടെ അനു പാത്രങ്ങളുമായി അടുക്കളയിലേയ്ക്ക് പോയി.

കൈ കഴുകി വന്ന ഞാൻ സ്വീകരണ മുറിയിലെ സോഫയിൽ പോയിരുന്നു. വീട്ടിൽ ടീവി ഇല്ലാത്തത് കൊണ്ട് എന്തെങ്കിലും കണ്ട് നേരം കളയാമെന്ന് കരുതി റൂമിൽ പോയി ലാപ് ടോപ്പ് എടുത്ത് കൊണ്ട് വന്ന് ടീ പോയിൽ എടുത്ത് വച്ച് യൂടൂബിൽ "കരിക്കിന്റെ തേരാ പാരാ" വെബ് സീരീസ് കണ്ടിരിക്കാൻ തുടങ്ങി. അടുക്കളയിലെ പണി ഒരു വിധം ഒതുക്കിയിട്ട് അനുവും എന്റൊപ്പം വന്നിരുന്ന് അത് കാണാൻ തുടങ്ങി. അവൾക്കും ഈ വെബ് സീരീസ് വലിയ ഇഷ്ടമായത് കൊണ്ട് കക്ഷി അത് കണ്ട് എന്റൊപ്പം ഇരുന്ന് പൊട്ടി ചിരിക്കുന്നുണ്ടായിരുന്നു.

കാണാൻ ബാക്കിയുണ്ടായിരുന്ന രണ്ട് പാർട്ടുകൾ കണ്ട് കഴിഞ്ഞപ്പോൾ ഞാൻ സ്പോർട്സ് കാറുകളുടെ വീഡിയോ എടുത്ത് കാണാൻ തുടങ്ങി. അത് കണ്ടതോടെ അനു: "മോനു ഇത് മാറ്റി വേറെ എന്തേലും വയ്ക്ക്"
പെണ്ണെന്റ തോളിൽ തല ചായ്ച്ചിരുന്നു പറഞ്ഞു.

"വേറെ എന്ത് വയ്ക്കാനാ നീ പറയണേ അനൂസ്സേ?

"നീ കുറച്ച് മൂവികൾ ലാപ്പില് സേവ് ചെയ്തിട്ടില്ലേ അതൊന്ന് എടുത്തേ ഞാൻ കാണാത്തത് ഉണ്ടോന്ന് നോക്കട്ടെ"
പെണ്ണെന്റ തോളിൽ നിന്ന് തലയുയർത്തി എന്നെ നോക്കി കൊണ്ട് പറഞ്ഞു.

ഞാനവൾ പറഞ്ഞത് പോലെ മൂവി കിടക്കുന്ന ഫയൽ ഓപ്പൺ ചെയ്ത് ഓരോരോ സിനിമകളുടെ പേര് വായിക്കാൻ തുടങ്ങി തെലുങ്ക് സിനിമാ സെക്ഷനിൽ 'ഡിയർ കോമ്രേഡ്' സിനിമയുടെ പേര് കണ്ടതോടെ അവൾക്കതപ്പോ കാണണമെന്നായി.