Chapter Title : സഞ്ചാരപദം 2 [ദേവജിത്ത്]

മനസ്സ് ചോദ്യമുന്നയിച്ചു. കാർത്തിക പതിയെ ഡോറിന് അടുത്തേക്ക് നടന്നു നീങ്ങി. തന്റെ ചെവി അവൾ വാതിലിലേക്ക് ചേർത്തു പിടിച്ചു. " നീ അതുങ്ങളെ ഒന്നു കൂടി പിടിക്ക് , ഒന്നു കാണട്ടെ പ്ലീസ് " ചൈത്രയുടെ ശബ്ദമല്ലാതെ പരിചിതമായ ഒരു ശബ്ദം അവളുടെ കർണ്ണത്തിലേക്ക് വന്നലച്ചു. " ആഹ് ..അങ്ങനെ തന്നെ മുഴുവനായി പിടിക്ക്.. എന്ത് ഭംഗിയാണ് കാണുമ്പോൾ " മറുതലക്കലെ ശബ്ദം ആവർത്തിച്ചു. " ശ്ശ്ശ്ശ് , മതിയില്ലേ , മുംതാസ് മാം " ചൈത്രയുടെ ചോദ്യം കാർത്തികയുടെ തല പെരുപ്പിച്ചു.

മുംതാസ് മാം ,അവളുടെ മനസ്സ് ആ പേര് ആവർത്തിച്ചു ഉരുവിട്ടു. അവളുടെ ശരീരം പെരുത്തു കയറി .. കാർത്തിക ബാത്റൂമിന്റെ ഡോർ ആഞ്ഞു കൊട്ടി . " ചൈത്ര ചൈത്ര " അവൾ വിളിച്ചു. പെട്ടെന്ന് അകത്ത് നിന്നും , വെപ്രാളം കൂടുന്നതിന്റെ പ്രതിഫലനമെന്നോണം തട്ടലും മുട്ടലും ഉയർന്നു. " ആഹ് , കാർത്തിക , ഞാൻ ഇപ്പോ വരുന്നു കുളിക്കുവാണ് " അല്പ്പം വിറയാർന്ന ശബ്ദത്തിൽ അകത്ത് നിന്നും മറുപടി വന്നു. കാർത്തിക സമനില വീണ്ടെടുത്ത് കൊണ്ട് " "ഞാൻ താഴെ ഇരിക്കാം" എന്നു മറുപടി നൽകി തിരിഞ്ഞു നടന്നു. എന്തെല്ലാമാണ് തനിക്ക് ചുറ്റും നടക്കുന്നത്. അവളുടെ കാലുകൾ ഇടറുന്ന പോലെ തോന്നി ആ പടികൾ ഇറങ്ങുമ്പോൾ .. " ആഹ് , അവളെ കണ്ടില്ലേ നീ , അവളുടെ ഒരുക്കം കഴിഞ്ഞില്ലേ ഇതുവരെ " അന്തർജനത്തിന്റെ ചോദ്യമാണ് അവളെ ഉണർത്തിയത്. " ആഹ് ആന്റി ,ഇല്ല അവൾ കുളിച്ചു കഴിഞ്ഞില്ല , ഞാൻ ഇങ്ങോട്ട് പോന്നു " കാർത്തിക താഴേക്ക് ഇറങ്ങി ഡൈനിങ് ടേബിളിലെ കസേരയിലേക്ക് ഇരുന്നു. " ആന്റി , തണുത്ത എന്തെങ്കിലും കുടിക്കാൻ തരുമോ " " എന്തേ, പെട്ടെന്ന് ദാഹം വന്നോ " അന്തർജനം ചിരിച്ചു. എന്നാൽ കണ്ണുകളിലേക്ക് ഇരുട്ടടിച്ചു കയറിയ കാർത്തികയ്ക്ക് ആ ചിരി അട്ടഹാസം പോലെയാണ് അനുഭവപ്പെട്ടത്. കാതുകളിൽ പെരുമ്പറ മുഴങ്ങുന്നത് പോലെ . അവൾ തന്റെ കൈകൾക്ക് ഉള്ളിലേക്ക് മുഖം ചേർത്തു പിടിച്ചു.