Chapter Title : ഷഹാന IPS : ഒരു സര്‍വീസ് സ്റ്റോറി 4 [SmiTHA]

പറഞ്ഞു.

"എന്റെയും ഫേവറിറ്റാണ് ഇപ്പറഞ്ഞതൊക്കെ..."

കഴിക്കുമ്പോൾ പലതവണ അവരുടെ കണ്ണുകൾ കൂട്ടിമുട്ടി. ചിലനേരങ്ങളിൽ പരിസരം മറന്ന് അവർ പരസ്പ്പരം നോക്കി നിൽക്കുകപോലും ചെയ്തു.

"എന്താ?"

ഒരു വേള അവൾ ചോദിച്ചു.

"സാഹിബ...കഴിക്കുന്നത് കാണാൻ നല്ല ഭംഗി..."

മനോഹരമായ ഒരു നാണം അവളിൽ വിടർന്നു.

"എല്ലാവരും കഴിക്കുന്നത് പോലെയല്ലേ ഞാൻ കഴിക്കുന്നുള്ളൂ?"

"അല്ലെന്നാണ് എനിക്ക് തോന്നുന്നത്..."

അയാൾ ചിരിച്ചുകൊണ്ട് പറഞ്ഞു.

"വളരെ സുന്ദരമാണ് അത് കാണാൻ...സാഹിബ വളരെ സുന്ദരിയായതിനാലാവാം..."

പറഞ്ഞ് കഴിഞ്ഞാണ് അൽപ്പം കൂടിപ്പോയോ എന്നയാൾ സംശയിച്ചത്. അയാൾ അവളെ  ഒന്ന് പാളി നോക്കി.

അയാൾ വിസ്മിതനായി.

അത്ര മനോഹരമായ നാണം അയാൾ മുമ്പ് ഒരു പെണ്ണിലും കണ്ടിട്ടുണ്ടായിരുന്നില്ല.

സ്വപ്നം പൂക്കുന്ന കണ്ണുകൾ.

കാമുകന്റെ നിനവുകളെയും  അവൻ കാണുന്ന സ്വപ്നങ്ങളെയും തിരിച്ചറിയുന്ന കണ്ണുകൾ.

ഒരു ഈറൻ കാറ്റ് തന്നെ തഴുകുന്നത് അയാൾ അറിഞ്ഞു.

കണ്ണിമയ്ക്കാതെ അയാൾ അവളെ തന്നെ നോക്കിയിരുന്നു.

"അത്ര സുന്ദരിയാണോ ഞാൻ?"

ശബ്ദം താഴ്ത്തി, മന്ത്രിക്കുന്നത് പോലെ അയാളുടെ കാന്തികത നിറഞ്ഞ കണ്ണുകളിലേക്ക് നോക്കി അവൾ ചോദിച്ചു.

ആരോ തന്റെ കാതുകളിൽ മന്ത്രിക്കുന്നു:

ഞാൻ നിനക്ക് വേണ്ടി കാത്തിരിക്കുന്ന കാമുകി.

ഞാൻ ദൊഹ്മേലി താഴ്‌വരയിൽ നിന്റെ സൂര്യപ്രകാശമേൽക്കാൻ വിടർന്നു തരിക്കുന്ന അറേബ്യൻ പാരിജാതം.

ഖൈബർ പഖ്‌തൂൺവായുടെ മലമുടികളിൽ, ആകാശം മുട്ടുന്ന പനമരങ്ങളിൽ മലക്കുകൾ ആർക്ക് വേണ്ടിയാണ് കാത്തിരിക്കുന്നതെന്ന് അറിയുമോ നിനക്ക് എന്റെ പ്രിയനേ?

പെഷവാറിലെ ചന്ദനം മണക്കുന്ന ഗുഹകളിൽ, യാ റബ്ബി ഇയർജാ താത് ലി എന്ന് ഭ്രാന്തമായി ഉരുവിട്ട്, റസൂലിന്റെ നിയോഗമാണ് ഞാനെന്ന് ഉറക്കെപ്പറഞ്ഞ സുന്ദരി, രാജകുമാരി അമീറാ റാനിയാ അവസാനം കണ്ടെത്തിയത് ആരെയെന്ന്