Chapter Title : The Hole 3[Jarvis]

വളിച്ച ചിരി ചിരിച്ചു അഹമദ് അകത്തേക്ക് കയറി.

അതിനു പിന്നാലെ റസിയ ഇറങ്ങി, ചുവന്ന ചുരിദാറും ബ്ലാക്ക് ലെഗിൻസും ഇട്ടു തട്ടവും ഇട്ടു ലിപ്സ്റ്റിക് ഇട്ട ചുണ്ടുകൾ പതിയെ വിടർത്തി കൊണ്ട് ശരീരം കുലുക്കി കൊണ്ട് സൂപ്പർമാർക്കറ്റിൽ കയറി പോകുന്നത് രമേശൻ നോക്കി ഇരുന്നു.

കടയിൽ രമേശന് മുന്നോ നാലോ ആളുകൾ മാത്രം സാധനം വാങ്ങാൻ വരുന്നത്, ബാക്കി ഉളളവർ സൂപ്പർമാർക്കറ്റിൽ പോകുന്നു, കടയിൽ വരുന്നവർ പകുതിയും കടമാണ്.

“ചേട്ടാ സാധനങ്ങൾ തീരാറായി.” വേലു ഓർമിപ്പിച്ചു.

“എന്ന പോയി വാങ്ങ്” രമേശൻ താൽപര്യം ഇല്ലാതെ പറഞ്ഞു.

“അത് കാശ്.”

“അത് ആ വലിപ്പിൽ ഉണ്ടാകും.’’

“അത് പിന്നെ ചേട്ടൻ.”

രമേശൻ അപ്പോഴാണ് ഓർത്തത് ഇന്നലെ പൈസ മുഴുവൻ എടുത്ത കാര്യം.

“രമേശന് ഇപ്പൊ കടയിൽ ഒന്നും ശ്രദ്ധ ഇല്ല.” കുറച്ചു മാറി നിന്നു ലീല പറഞ്ഞു.

രമേശൻ ഒരു നിമിഷം ചിന്തിച്ചു.

“എന്താ രമേശാ സ്റ്റോക്ക് ഒക്കെ തീർന്നോ ?.”

കടയിലെ ഒരു കാലിയായ മിഠായി ഭരണി ഉയർത്തി കൊണ്ട് അഹമദ് ചോദിച്ചു.

രമേശൻ മറുപടി പറഞ്ഞില്ല മൂകനായി അങ്ങനെ ഇരുന്നു.

അഹമ്മദ് രമേശൻ്റെ അടുത്തേക്ക് ഒന്നു ചേർന്നു നിന്ന് പറഞ്ഞു.

“രമേശാ എനിക്ക് അറിയാം എൻ്റെ സൂപ്പർമാർക്കറ്റ് വന്ന ശേഷം തനിക്ക് കച്ചവടം കുറവാണെന്ന്. സത്യത്തിൽ തന്നെ ദ്രോഹിക്കാൻ ഒന്നും അല്ല, ഇത് എൻ്റെ വലിയൊരു സ്വപ്നം ആയിരുന്നു.

പണ്ട് ഈ തെരുവിൽ തെണ്ടി തിരിഞ്ഞു നടന്നപ്പോ എന്നെ ആരും തിരിഞ്ഞു നോക്കിയില്ല, അന്നത്തെ ഈ ആളുകൾ ഇപ്പൊ എൻ്റെ സൂപ്പർമാർക്കറ്റിനു മുന്നിൽ ക്യൂ നിൽക്കുന്നു.”