Chapter Title : യുഗം 13 [Achilies]

അവരെ ഊട്ടി ഒരു മകനെ പോലെ, ഒരിക്കൽ എനിക്ക് കഴിയാതെ പോയ കാര്യം എന്റെ സ്വന്തം അമ്മയ്ക്കായി ചെയ്യാൻ കഴിയാതെ പോയത് ഇപ്പോൾ ഒരു പാപ പരിഹാരമെന്നോണം ഞാൻ ഇവിടെ ഹേമയ്ക്ക് ഊട്ടി കണ്ണിൽ നിറഞ്ഞൊഴുകുന്ന കണ്ണീർക്കണങ്ങളെ പുറം കൈകൊണ്ട് തുടച്ചു മാറ്റി ഹേമയും എന്റെ ഓരോ പിടിയും എന്നിൽ നിന്ന് വാങ്ങി കഴിച്ചു.
**********************************

ഉച്ചയ്ക്കത്തെ ഊണ് കഴിഞ്ഞു സോഫയിൽ ഇരിക്കുമ്പോഴാണ് പുറത്തു കാറ് വന്നു നിന്ന ശബ്ദവും ഒപ്പം കല പില നിറഞ്ഞ ശബ്ദവും ഉയർന്നു വന്നത്.
രാവിലെ പോയ മഹാറാണിമാരു തിരിച്ചെത്തിയെന്നു മനസ്സിലായി. പുറത്തുന്നു കേൾക്കുന്ന കല പിലയിൽ ഉയർന്നു നിന്നത് എന്റെ ഗംഗയുടേതാണെന്നു പിന്നെ പ്രത്യേകം പറയണ്ടല്ലോ.
ഹേമേട്ടത്തി അടുക്കളയിലായിരുന്നു, ഹാളിലേക്ക് കയറിയ വസുവിന്റെ രണ്ട് കയ്യിലും നിറയെ കവറുകളായിരുന്നു പിറകെ വന്ന ഗംഗയുടെ ഒരു കയ്യിൽ കുഞ്ഞിനെ പോലെ അള്ളിപ്പിടിച്ചു മീനുട്ടിയും ഉണ്ടായിരുന്നു.

"ഷോപ്പിംഗ് കൂടെ നടത്തീന്നു തോന്നുന്നു....."

"പിന്നെ മീനൂട്ടിയെ വല്ലപ്പോഴുമല്ലേ പുറത്തു കൊണ്ട് പോണേ അതോണ്ട് ഒന്ന് കറങ്ങി അവൾക്കും ഹേമേട്ടത്തിക്കും ഡ്രെസ്സും വാങ്ങി പുറത്തൂന്നു ഫുഡും കഴിച്ചു."

കവറെല്ലാം ടീപോയിലേക്ക് വച്ച് സോഫയിലേക്ക് ഇരുന്നു എന്റെ മേത്തോട്ടു ചാഞ്ഞ വസൂ ആണ് എന്നോടെല്ലാം പറഞ്ഞത്.
ഗംഗ അപ്പോഴേക്കും മീനുവിനെയും കൊണ്ട് എനിക്കെതിരെയുള്ള സോഫയിൽ ഇരുന്നിരുന്നു. ഗംഗയുടെ കൈയിൽ ചുറ്റി അവളോട് ചേർന്നിരുന്ന മീനു ഇടയ്ക്ക് എന്നെ അവളുടെ കായാമ്പൂ മിഴികളാൽ പാളി നോക്കുന്നുണ്ടായിരുന്നു. എന്നിട്ടു മുഖം ഗംഗയുടെ തോളിലേക്കു പൂഴ്ത്തും.
ആദ്യം എന്നെ കണ്ടപ്പോൾ അവളിൽ ഉണ്ടായ അവസ്ഥയെക്കാൾ ബേധമായത് കൊണ്ട് എനിക്കും അല്പം ആശ്വാസമായി.