മഴനീർതുള്ളികൾ 5 [Anamika] 46

ഒടുക്കം സഹിക്കാൻ വയ്യാണ്ട് വാടകക്ക് വന്നതാ ഇപ്പൊ താമസിക്കണ വീട്ടില്….

പിന്നവരുടെ അവസ്ഥ കണ്ട് ആരൊക്കെയോ അന്നു ആ വീട് പൈസ കൊടുത്ത് അമ്മയുടെ പേരിൽ വാങ്ങികൊടുത്തു….

അങ്ങനാ അതിന് കയറികിടക്കാൻ ഒരു വീട് പോലും ഉണ്ടായത്….

ഹരിയേട്ടൻ പൊടികുഞായത്കൊണ്ട് പണിക്കൊന്നും പോകാൻ പറ്റാണ്ട് എന്റമ്മയാ കുടുംബശ്രീന്ന് ലോണെടുത്തു തയ്യൽ മെഷീൻ വാങ്ങികൊടുത്തത്…

എന്തോരം അനുഭവിച്ചിട്ടുണ്ടെന്ന് അറിയോ ആ പാവം…

ഹരിയേട്ടന് ഒരു പതുപതിമൂന്ന് വയസ് ആകണവരെ ഒരുപാട് കഷ്ടപ്പെട്ടിട്ടുണ്ട് അമ്മ….പിന്നെ മൂപ്പരും കൂടി മൂപ്പരെകൊണ്ട് കഴിയുന്ന എല്ലാരീതിക്കും ഓരോരോ പണിക്കൊക്കെ പോയി….

അത്രേം സ്ട്രഗിൾ  ചെയ്താ അമ്മേം മോനും ജീവിച്ചുവന്നത് ഓർക്കുമ്പോ എനിക്കാ തള്ളേനെ കൊല്ലാനുള്ള ദേഷ്യാ വരാറ്….

അതോണ്ടന്നെയാ ഞാൻ അവരെന്തു പറഞ്ഞാലും തറുതല പറയുന്നതും ഉടക്കുന്നതും…..“

ചിന്നുവിന് ദേഷ്യം അടങ്ങുന്നില്ല….അവളുടെ അമ്മയോടും ഏട്ടനോടും ഒപ്പം തന്നെ ചേർത്തുനിർത്തുന്ന രണ്ടുമനുഷ്യർ അനുഭവിച്ചത് ഓർക്കുമ്പോൾ പിന്നെയും പിന്നെയും ഉറഞ്ഞുകൂടുകയാണ് ഉള്ളിലങ്ങനെ വെറുപ്പ്….

“അപ്പൊ അമ്മേടെ വീട്ടുകാരോ…അവരെവിടെ ആയിരുന്നു…..”

അമ്മു ബസ്റ്റോപ്പിലെ സിമെന്റ് സ്ലാബിലേക്ക് കയറിയിരുന്നുകൊണ്ട് ചിന്നുവിന്റെ കയ്യിലെ ഫയൽ വാങ്ങിമടിയിലേക്ക് വച്ചു അസൈൻമെൻറ്സ് എല്ലാം ഉണ്ടോയെന്നു നോക്കി…

“അതൊന്നും എനിക്കറിഞ്ഞൂടാ…അവരൊന്നും അങ്ങനെ വന്നു കാണാറില്ല….ഞാൻ ആകെ അമ്മേടെ ചേച്ചിയേം അവരുടെ മക്കളേം ഭർത്താവിനേം അല്ലാണ്ട് ആരേം കണ്ടിട്ടില്ല…അവരുതന്നെ വരാൻ തുടങ്ങീട്ട് ഒരുപാടൊന്നും ആയിട്ടുമില്ല….”