മഴനീർതുള്ളികൾ 5 [Anamika] 46

ചിന്നു ബസ് വരുന്നുണ്ടോന്നു കാണാൻ പറ്റുന്ന രീതിക്ക് ഭിത്തിയിൽ ചാരിനിന്ന് അമ്മുവിനെ നോക്കി…

“മ്മ്മ്….എന്തേലും ആകട്ടെ….അമ്മ പറയുന്നെ അവർ കുറച്ച് ദിവസം നിന്നിട്ട് പൊക്കോളും അപ്പൊ കാണിക്കേണ്ട മര്യാദ നമ്മള് കാണിക്കണം എന്നാ….

അമ്മ മറുത്തൊന്നും പറയാത്തിടത്തോളം അല്ലെങ്കിൽ പ്രതികരിക്കാൻ തക്ക പ്രശ്നം ഉണ്ടാവാത്തിടത്തോളം ഞാൻ മിണ്ടാതിരിക്കുവല്ലേ നല്ലത്….ഇനിയെന്തേലും ഉണ്ടെങ്കിലും ഹരി പറഞ്ഞു തീർത്തോളുംന്നാ അമ്മ പറഞ്ഞേ….“

”നല്ല ബെസ്റ്റ് അമ്മായിയമ്മേം അതിന് പറ്റിയ മരുമോളും…..നാക്കുണ്ടോന്ന് വായിൽ വിരലിട്ട് നോക്കണ്ട ഒരുത്തീം തൊണ്ടേൽ കുഴലിട്ട് നോക്കണ്ട ഒരമ്മേം…..കണക്കിന് കൊള്ളാം….“

ചിന്നുവിന് കേട്ടിട്ട് ചൊറിഞ്ഞാണ് വരുന്നത്…..

അല്ലേലും ഇവരുടെ രണ്ടിന്റേം ഈ ഓച്ചിഴയുമ്പോലുള്ള ആക്ഷൻസും സമാധാനപ്രേമോം ഒന്നും അവൾക്കു പിടിക്കില്ല….ഹരിയെപ്പോലെ വെട്ടൊന്ന് തുണ്ടം രണ്ട് കേസ്‌ മാത്രേ ചിന്നു പിടിക്കൂ….

ബസിന്റെ ഹോൺ കേട്ടതും ആ സംഭാഷണമവിടെ മുറിഞ്ഞു….

പോകുന്ന വഴിക്ക് ബസ്സിലും പിന്നെ ക്ലാസ്സിൽ ഇരിക്കുമ്പോഴുമെല്ലാം ഹരിയെക്കുറിച്ച് തന്നെ ആയിരുന്നു ചിന്ത…

ബ്രേക്ക്‌ടൈമിൽ മെസ്സേജ് അയച്ചുനോക്കി സിംഗിൾ ടിക്ക് വീണിട്ടുള്ളൂ…അപ്പോ ഉറക്കം കഴിഞ്ഞിട്ടില്ല….

ഉച്ച കഴിഞ്ഞ് രണ്ട് അവർ hod യുടേതാണ്…സർ ആണേൽ ലീവും….

പിന്നുള്ള ഒരു അവർ പോട്ടെന്നു വച്ചു അമ്മു ഉച്ചയ്ക്ക് ഇറങ്ങി….

ടൗണിൽ ഇറങ്ങി അടുത്ത ബസ് കയറുന്നതിനിടയ്ക്ക് ഉള്ള സമയം ഒരു അങ്ങാടിക്കടയിൽ കയറി കറ്റാർവാഴയും വാങ്ങി….