Chapter Title : കളിയാട്ടങ്ങൾ 3 [ലസ്റ്റർ]

വന്ദനയും അവരുടെ സ്‌കൂട്ടിയുടെ അടുത്തേക്ക് പോയി.

വാഹിദ് പതുക്കെയാണ് ബൈക്ക് ഓടിച്ചത്. വഴിയിൽ സംഗീതയെ കണ്ടുമുട്ടുമെന്ന് അവന് നല്ല പ്രതീക്ഷയുണ്ടായിരുന്നു. പക്ഷേ പോകുന്ന വഴിയിലൊന്നും അവളെ അവന് കാണാൻ സാധിച്ചില്ല. രണ്ടു വശത്തെ ഫുട്പാതിലും നോക്കിക്കൊണ്ട് നല്ല തണുപ്പുള്ള രാത്രിയുടെ മഞ്ഞനിറം കലർന്ന റോഡിലൂടെ അവൻ തട്ടുകടയുടെ അടുത്തേക്ക് ബൈക്ക് പായിച്ചു. അവിടെയെത്തിയപ്പോൾ വണ്ടി റോഡരികിൽ ഒതുക്കി നിർത്തി കടയിൽ അവൻ സ്ഥിരമായി ഇരിക്കാറുള്ള ഭാഗത്തേക്ക് ചെന്നപ്പോൾ സംഗീത.!

അവൻ വന്നത് അറിഞ്ഞിട്ടും അവൾ തല ഉയർത്തുകയോ അവനെ ശ്രദ്ധിക്കുകയോ ചെയ്തില്ല. വാഹിദ് അവൾക്കടുത്തു ചെന്നിരുന്നു രണ്ടു ചായക്ക് ഓർഡർ കൊടുത്തു. എന്നിട്ട് തണുപ്പ് തട്ടിയ കൈകൾ പരസ്പരം ഉരച്ചു. കടക്കാരൻ ചായ കൊണ്ടുവന്നു കൊടുത്തപ്പോൾ ഒരെണ്ണം അവൻ അവൾക്ക് നീട്ടി.

"ഒരുപാട് പറയാനുണ്ടെന്ന് എനിക്കറിയാം. പണത്തിന് വേണ്ടിയോ, കാമുകന്റെ കൂടെ പ്രായത്തിന്റെ ആവേശം ആസ്വദിക്കുന്നതല്ലെന്നും എനിക്കറിയാം. പക്ഷേ പിന്നെന്തിന് എന്നൊരു ചോദ്യം എന്റെ ഉള്ളിലുണ്ട്. അതുകൊണ്ടാണ് നിന്റെ കാര്യത്തിൽ എന്റെ ശ്രദ്ധ പോയത്." ചായ ഒരിറക്ക് കുടിച്ചിട്ട് വാഹിദ് പറഞ്ഞു. സംഗീത പതുക്കെ ചായ കുടിച്ചു. ഇടക്കിടയ്ക്ക് വലതു ഭാഗത്തേക്ക് നോക്കിക്കൊണ്ടിരുന്നു. അവൾ ടോമി വരുന്നത് ശ്രദ്ധിക്കുകയാണെന്ന് വാഹിദ് മനസ്സിലാക്കി.

"അവൻ വരുമ്പോ വരട്ടെ. താൻ സ്വസ്ഥമായി ഒരു ഗ്ലാസ്സ് ചെയ്യായെങ്കിലും കുടിക്ക്." വാഹിദ് അവൾ നോക്കുന്നത് കണ്ടപ്പോൾ പറഞ്ഞു.

"എനിക്കെന്തിനു ടെൻഷൻ. എന്നെ അവൻ ഒന്നും ചെയ്യില്ല. കുറഞ്ഞത് രണ്ടു വർഷമെങ്കിലും എന്നെ നന്നായി വിൽക്കാൻ അവന് സാധിക്കും. അതുകഴിഞ്ഞേ എന്റെ മാർക്കറ്റ് കുറയുകയുള്ളൂ എന്ന് അവന് നന്നായറിയാം. മാർക്കറ്റിൽ ഫ്രഷ് പീസല്ലേ ഞാൻ."