Chapter Title : കോകില മിസ്സ് 10 [കമൽ] [അവസാന ഭാഗം]

ഓർമ്മകളിൽ മാത്രമുള്ള ആ നിമിഷം. "വേണ്ട.... പറയണ്ട ജിത്തൂ.... എനിക്കറിയാം." അവൾ അവന്റെ നെഞ്ചിലേക്ക് കൈ ചേർത്തു. തന്റെ ഉൾത്തുടിപ്പു മനസ്സിലാക്കിയവന്റെ നെഞ്ചിലെ തുടിപ്പറിയാൻ അവളവന്റെ നെഞ്ചിലേക്ക് കാതു ചേർത്തു. അവരുടെ പഴയ ക്ലാസ് മുറിയുടെ ഗന്ധം തന്നെത്തേടിയെത്തിയത് പോലെ അവന് തോന്നി. ആഹ്ലാദം തിര തല്ലുന്ന മനസ്സുമായി അവൻ തന്റെ കരങ്ങളാൽ അവളെ മൂടിക്കൊണ്ടിരുന്നു. "നഷ്ടപ്പെട്ടെന്നു കരുതിയതാ നിന്നെ. ഇനി കാണില്ലെന്ന് കരുതിയതാ. ഈ നെഞ്ചിലെ ചൂടാറിയാൻ കൊതിച്ചിട്ടുണ്ട് ഒരു കാലത്ത്. എത്ര നാൾ മറച്ചു വെച്ചു നടന്നു എന്നറിയാമോ...." അവന്റെ ഇടനെഞ്ചിന്റെ മിടിപ്പ് ശ്രവിച്ചു കൊണ്ടവൾ പറഞ്ഞു തുടങ്ങിയപ്പോൾ അവളുടെ അധരങ്ങളിൽ വിരൽ ചേർത്തു ജിതിൻ. "ശ്... വേണ്ട. എനിക്കറിയാം." അവനവളെ ഇറുക്കി പുണർന്നു. അവളുടെ മുഖം ചുവന്നു തുടുത്തു. കണ്ണു നനയുന്നതിനിടയിലും കോകിലയുടെ ചൊടികൾ വിരിഞ്ഞു. പൊഴിഞ്ഞു വീഴുന്ന വാകപ്പൂക്കൾക്ക് കീഴെ, ആ മരച്ചുവട്ടിൽ, ജന്മസാഫല്യം നേടിയ നിർവൃതിയിൽ, മനസ്സു കൊണ്ട് പരസ്പരം സംസാരിച്ച് അവർ ഒന്നായി നിന്നു. "ജിത്തൂ...." "എന്താ പെണ്ണേ..." അവളെ കെട്ടിപ്പിടിച്ചു നിന്നവൻ വിളി കേട്ടു. "ബാഗെടുത്തില്ല." "ഏത് ബാഗ്?" തന്റെ നെഞ്ചിൽ കിടന്നവളെ അവൻ തല കുമ്പിട്ടു നോക്കി. "എന്റെ ബാഗ്. ഓഫീസിലിക്കുവാ." "അതിൽ വിലപിടിപ്പുള്ളതെന്തെങ്കിലുണ്ടോ?" "എന്റെ... ചോറ്റുപാത്രം..." കോകില തല പൊക്കി ലജ്ജയോടെ പറഞ്ഞു. "എന്റെ പൊന്നു പെണ്ണേ... ഒരു നൂറു ബാഗും, നിന്റെ പൊക്കത്തിൽ ഒരു ചോറ്റുപാത്രവും വാങ്ങിത്തരാം ഞാൻ. ഇനി മിണ്ടല്ലേ...ശ്... ശ്... കിടക്ക് കിടക്ക്.." അവൻ ധൃതി പിടിച്ചിട്ടെന്നോണം അവളുടെ തല പിടിച്ചു പിന്നെയും തന്റെ നെഞ്ചോട് ചേർത്തു.

******************** "ടാ... ജിത്തൂ, എണീക്കെടാ, സ്ഥലമെത്താറായി. കല്ല്യാണച്ചെറുക്കൻ സ്വപ്‍നോം കണ്ടു കിടന്നുറങ്ങുവാണോ? നല്ല ബെസ്റ്റ് ടൈമിംഗ് അളിയാ...." ജിത്തു കണ്ണു തുറന്ന് സോണിയെ നോക്കി ചിരിച്ചു. ഒന്നര വർഷം തളിർത്തു പൂവിട്ട പ്രണയത്തിനൊടുവിൽ, ഇന്ന് ജിത്തു കോകിലയുടെ കഴുത്തിൽ മിന്നു കെട്ടുകയാണ്. സോണിയുമൊത്ത് കല്ല്യാണ മണ്ഡപത്തിലേക്കുള്ള യാത്രാ മധ്യേ ആണവർ. "സോണിക്കുട്ടാ... ഒരു കാര്യം..." "നീ ചോദിക്കെടാ കുട്ടാ..." "മേഴ്‌സിയെ കെട്ടിയതിന് നീ എന്നെങ്കിലും പശ്ചാത്തപിച്ചിട്ടുണ്ടോ?" "മം... ഇത് കല്ല്യാണ വട്ട് തന്നേ...