Chapter Title : മുഹബത്ത് 3 [Vashalan]

"അതു പിന്നെ പറയാനുണ്ടോ ചേട്ടാ," ഫാസിൽ ഇടയിൽ കയറി തമാശ രൂപേണ പറഞ്ഞു.

"കണക്കിന്റെ കാര്യത്തിൽ ഷാജു ഇക്ക പക്കാ കെ.ആർ. നാരായണൻ സാറിനെപ്പോലെയാ! നമ്മൾ ഒരു അഞ്ചു ഫിൽസ് വെറുതെ ചെലവാക്കിയാൽ മതി, അന്നത്തെ ദിവസത്തെ ലിസ്റ്റിൽ അത് 'അനാവശ്യ ചെലവ്' എന്ന് പ്രത്യേകം മാർക്ക് ചെയ്തു വയ്ക്കും!"

ഫാസിലിന്റെ ആ കളിയാക്കൽ കേട്ടതും എല്ലാവരും ഉറക്കെ ചിരിച്ചുപോയി.

"പോടാ ചെറുക്കാ... അങ്ങനെ കൃത്യമായി നോക്കുന്നത് കൊണ്ടല്ലേ മാസാന്ത്യത്തിൽ വലിയ ബാധ്യതയില്ലാതെ നമ്മൾ മുന്നോട്ട് പോകുന്നത്," ഞാൻ ചിരിച്ചുകൊണ്ട് അവന്റെ തലയ്ക്കിട്ട് ഒരു കൊട്ടു കൊടുത്തു.

"അതു ശരിയാ," ശ്രീരാഗ് പറഞ്ഞു. "നാട്ടിൽ ഇരിക്കുമ്പോൾ നമ്മൾ പണത്തിന്റെ വില അറിയില്ലായിരുന്നു. ഇവിടെ എത്തി ഷാജുക്കയുടെ ഈ കണക്കെഴുത്ത് കണ്ടപ്പോഴാ ഓരോ ഫിൽസിന്റെയും വില മനസ്സിലായത്!"

നാട്ടിലെ വിശേഷങ്ങളും, ആദ്യമായി കുവൈറ്റിൽ വന്ന സമയത്ത് ഓരോരുത്തർക്കും പറ്റിയ അമളികളും തമാശകളുമൊക്കെയായി പിന്നെയും കുറെ സമയം ഞങ്ങളവിടെ സംസാരിച്ചിരുന്നു.

ഭക്ഷണമെല്ലാം കഴിച്ച്, ബാക്കി വന്ന ബില്ലിന്റെ തുക എല്ലാവരും ഷെയർ ചെയ്ത് കൊടുത്ത് ഞങ്ങൾ റസ്റ്റോറന്റിൽ നിന്നിറങ്ങി.

ഫ്ലാറ്റിൽ തിരിച്ചെത്തി താക്കോലെടുത്ത് വാതിൽ തുറന്നതും എല്ലാവരും ലിവിംഗ് റൂമിലെ സോഫകളിലേക്ക് റിലാക്സ് ചെയ്ത് ഇരുന്നു. ഫാസിൽ പോയി ഫ്രിഡ്ജിൽ നിന്ന് തണുത്ത വെള്ളമെടുത്ത് എല്ലാവർക്കും പകർന്നു നൽകി.

"അല്ല... സത്യത്തിൽ ഇന്നത്തെ ദിവസം അടിപൊളിയായിരുന്നു കേട്ടോ," സോഫയിൽ ചാരിയിരുന്ന് വെള്ളം കുടിച്ചുകൊണ്ട് ശ്രീരാഗ് പറഞ്ഞു. "കുറെക്കാലത്തിന് ശേഷമാ നമ്മൾ എല്ലാവരും ഒന്നിച്ച് ഇങ്ങനെ ഇറങ്ങി ഒരു

സിനിമയൊക്കെ കണ്ട് ഫുഡും കഴിച്ച് നടക്കുന്നത്. നല്ലൊരു മൈൻഡ് റിലാക്സേഷൻ കിട്ടി."