പണി 1

Pani Part 1 | Author : Aani

തിയേറ്ററിലെ ആൾത്തിരക്കിൽ നിന്നും ആവേശത്തിൽ നിന്നും പുറത്തിറങ്ങുമ്പോൾ വിഷ്ണുവിന്റെയും നക്ഷത്രയുടെയും ഉള്ളിൽ ആ സിനിമ നൽകിയ സന്തോഷം ബാക്കിയുണ്ടായിരുന്നു.

പുറത്ത് നേരിയ തോതിൽ മഴ പെയ്യുന്നുണ്ട്. പോരാത്തതിന് ചെറിയ മഞ്ഞും,കാറിന്റെ മുൻ ഡോർ തുറന്ന് മഴ നനയാതെ പെട്ടന്ന് ഓടി നക്ഷത്ര അകത്തിരുന്നപ്പോൾ വിഷ്ണു അവളെയൊന്ന് നോക്കി പുഞ്ചിരിച്ചു.

​ഒരു വർഷത്തെ തീവ്രമായ പ്രണയത്തിനൊടുവിൽ, വീട്ടുകാരുടെ സമ്മതത്തോടെ വിവാഹിതരായിട്ട് ഇന്നേക്ക് കൃത്യം മൂന്ന് മാസം തികയുകയാണ്. ആ ആഘോഷത്തിന്റെ ഭാഗമായാണ് അവർ സിനിമയ്ക്ക് പോയത് തന്നെ.

​"നല്ല തണുപ്പുണ്ടല്ലേ വിഷ്ണു?"

നക്ഷത്ര തന്റെ സാരിയുടെ ഷാൾ ഒന്നുകൂടി പുതച്ചുകൊണ്ട് ചോദിച്ചു.

​"മ്മ്... ഈ മഴയത്ത് ഇങ്ങനെ ഡ്രൈവ് ചെയ്യുന്നത് തന്നെ ഒരു പ്രത്യേക സുഖമാ നീ കേട്ടിട്ടില്ലേ മഴ, തണുപ്പ്,പെണ്ണ്,ചായ എന്നൊക്കെ ,"

“ഓ പിന്നെ”

“ഇ തണുപ്പിൽ ഒരെണ്ണം ഒന്ന് സെറ്റാക്കണം വിട്ടിൽ എത്തട്ടെ കാണിച്ചു തരുന്നുണ്ട് കൊച്ച് കള്ളി ”

“എന്റെ പൊന്നെ വഷ്ളത്തരം പറയാതെ തത്കാലം വണ്ടി എടുക്ക്”

നക്ഷത്ര ചിരിച്ചു…

വിഷ്ണു കാർ സ്റ്റാർട്ട് ചെയ്തു. വൈപ്പർ ഗ്ലാസിലെ മഴത്തുള്ളികളെ വകഞ്ഞുമാറ്റിക്കൊണ്ടിരുന്നു. വിജനമായ റോഡിലൂടെ കൊച്ച് തമാശകളും ചിരികളുമായി , അവർ മുന്നോട്ട് നീങ്ങി.

​ഒരു ഇറക്കം ഇറങ്ങുമ്പോഴാണ് വിഷ്ണുവിന് അത് ശ്രദ്ധയിൽപ്പെട്ടത്. മുന്നിലെ വളവ് തിരിയാനായി അവൻ ബ്രേക്ക് അമർത്തി. പക്ഷേ, പെഡൽ വെറുതെ താഴേക്ക് പോയി. വണ്ടിക്ക് യാതൊരു നിയന്ത്രണവുമില്ല.

​"നക്ഷത്രാ... ബ്രേക്ക് കിട്ടുന്നില്ല!"

വിഷ്ണുവിന്റെ ശബ്ദത്തിൽ പരിഭ്രാന്തി പടർന്നു.

​നക്ഷത്ര പേടിയോടെ വിഷ്ണുവിനെ നോക്കി.

"എന്ത്? വിഷ്ണുവേട്ടാ ചുമ്മാ തമാശ പറയല്ലേ..."

“അല്ലടി സത്യം”

​വിഷ്ണു ആഞ്ഞു ചവിട്ടി നോക്കി, ഹാൻഡ് ബ്രേക്ക് വലിക്കാൻ ശ്രമിച്ചു. പക്ഷേ, നനഞ്ഞ റോഡിൽ കാർ തെന്നി നീങ്ങുകയായിരുന്നു. വേഗത കൂടിക്കൊണ്ടിരുന്നു. മഴയുടെ ശക്തിയും കൂടി. വിഷ്ണു സ്റ്റിയറിംഗ് വെട്ടിച്ച് വണ്ടി നിയന്ത്രിക്കാൻ പരമാവധി ശ്രമിച്ചു.

​"വിഷ്ണൂ... നോക്ക്!"

നക്ഷത്ര നിലവിളിച്ചു.

​മുന്നിൽ വലിയൊരു പണി തീരാത്തഫ്ലാറ്റ് ... കാർ നിയന്ത്രണം വിട്ട് റോഡരികിലെ ഫ്ലാറ്റിന്റെ ഉള്ളിലേക്ക് ഇടിച്ചു കയറി

ആ ഇരുട്ടിൽ, മഴയുടെ ശബ്ദത്തെ കീറിമുറിച്ചുകൊണ്ട് ഒരു വലിയ ശബ്ദം മുഴങ്ങിക്കേട്ടു. ചില്ലുകൾ തകരുന്നതും ലോഹഭാഗങ്ങൾ കൂട്ടിയിടിക്കുന്നതും അവസാനമായി നക്ഷത്രയുടെ ആ വിളിയും. ഒരു നിമിഷം അവന്റെ കാതുകളിൽ മുഴങ്ങി കേട്ടു ..

.

പിന്നീട് എല്ലാം നിശബ്ദമായി.

​മഴ പെയ്തുകൊണ്ടേയിരുന്നു. തകർന്നു കിടക്കുന്ന കാറിന്റെ ഹെഡ്ലൈറ്റുകൾ ആ രാത്രിയുടെ ഇരുട്ടിനെ നോക്കി മിന്നിമറയുന്നുണ്ടായിരുന്നു.

​കണ്ണുകൾ തുറക്കാൻ ശ്രമിക്കുമ്പോൾ വിഷ്ണുവിന് തന്റെ തലയ്ക്കുള്ളിൽ ആയിരം ചെണ്ടകൾ ഒരേസമയം കൊട്ടുന്നതുപോലെ തോന്നി. കഠിനമായ വേദനയും മരവിപ്പും. എവിടെയാണ് താൻ ഉള്ളതെന്ന് അവന് മനസ്സിലായില്ല. ചുറ്റും ഇരുട്ടാണ്, കൂട്ടിന് മഴയുടെ നേർത്ത ശബ്ദവും.

​പണിതീരാത്ത ഒരു വലിയ ഫ്ലാറ്റിന്റെ താഴത്തെ നിലയിലാണ് കാർ ചെന്ന് ഇടിച്ചുനിന്നിരിക്കുന്നത്. കോൺക്രീറ്റ് തൂണുകളിൽ തട്ടി കാറിന്റെ മുൻഭാഗം തകർന്നിട്ടുണ്ട്. വിഷ്ണു പതുക്കെ തലയുയർത്തി നോക്കി. നെറ്റിയിൽ നിന്ന് ഒലിച്ചിറങ്ങിയ രക്തം അവന്റെ കാഴ്ചയെ അവ്യക്തമാക്കിയിരുന്നു.