സഹതാപം. !!! ഒരു ചെറിയ വാക്ക്. പക്ഷേ ആ ചെറിയ വാക്കിന് ഇത്രത്തോളം അർത്ഥമുണ്ടെന്ന് എന്നോളം മനസ്സിലാക്കിയവർ മറ്റാരുമുണ്ടാവില്ല.!!!. അത്രത്തോളം... ആ വാക്കിന്റെ പരിപൂർണ്ണമായ അർത്ഥതലത്തിൽ അതവളെനിക്കു കാണിച്ചു പഠിപ്പിച്ചു തന്നു. അന്നല്ല, പിറ്റേന്നുമുതൽ. !!!അന്ന് ക്ലാസ് തീരുന്നതുവരെ അവളെന്നെത്തന്നെ നോക്കിയിരുന്നത് തികച്ചും പോസിറ്റിവായൊരു സിഗ്നലായിട്ടായിരുന്നു ഞാൻ കരുതിയത്. അവളുടെ മുഖത്തുള്ള ഭാവം എന്നെ പഠിക്കുന്നതാണെന്നെ മിഥ്യാധാരണയിലായിരുന്നു ഞാൻ. ഒരുവേള ഞാനത് ഡിബിനോട് പറയുകകൂടി ചെയ്തു. അവള് നോക്കിപ്പഠിക്കട്ടെടാ എന്നൊരു ഡയലോഗിൽ അവനുമത് ലാഘവത്തോടെ തള്ളി. പക്ഷേ പിറ്റേന്നുമുതലാണ് അവളുടെ ഉദ്ദേശമെന്തെന്ന് ഞാനറിയാൻ തുടങ്ങിയത്. അവളോടെല്ലാം തുറന്നുപറഞ്ഞ സന്തോഷത്തിൽ... ഗംഗയിൽ മുങ്ങിക്കുളിച്ച് സമസ്തപാപങ്ങളും കഴുകിക്കളഞ്ഞ മനസമാധാനത്തോടെയാണ് കോളേജിലേക്ക് വന്നത്. പതിവായി ബൈക്കിൽ വന്നിരുന്നത്, അന്നൊരു ചെയ്ഞ്ചിന് കാറിലേക്ക് മാറ്റി. കാർന്നോപ്പടി ആദ്യമായി വാങ്ങിയ ബെൻസിൽ തന്നെയായിരുന്നു അന്നത്തെ വരവ്. പുതിയ ഓഡി വന്നതോടെ പുള്ളി അതിലാണ് സഞ്ചാരമെന്നതിനാൽ ഇവനങ്ങനെ ഒതുങ്ങി കിടപ്പായിരുന്നു. പക്ഷേ എത്ര നാളായി അനങ്ങാതെ കിടന്നാലും ഒന്ന് കാലുവെച്ചുകൊടുത്താൽ ചെക്കനിപ്പോഴും നൂറിന് മോളിലാ. മാക്സിമം സ്പീഡിൽ പലവഴി പോയിട്ടും ഇന്നേവരെ ഒന്ന് പോറിച്ചിട്ടു പോലുമില്ലവൻ. അത്രക്ക് കരുതലാണ് അവനു ഞങ്ങളെ. അതുകൊണ്ടുതന്നെ അവനെയെനിക്ക്‌ വല്ലപ്പോഴുമൊക്കെ കിട്ടാറുമുള്ളൂ. ഒന്ന് ചൂടാക്കിയിട്ടു കുറേയായില്ലേ, ഇനിയുമിങ്ങനെ എടുക്കാതെ കിടന്നാൽ ഓയില് തണുക്കുമെന്നൊക്കെ തട്ടിവിട്ട്, മിസ്സിസ് വൈജയന്തി മേനോനെ പറ്റിച്ചാണ് ഒപ്പിച്ചതും. കോളേജിൽ കൊണ്ടുപോയാൽ കൂട്ടുകാരൊക്കെ മേടിച്ചോടിക്കുമെന്ന് പറഞ്ഞാണ് എനിക്ക് കാറൊന്നും തന്നുവിടാത്തത്. ചോദിച്ചാൽ ഞാൻ കൊടുക്കുമെന്ന് വീട്ടുകാർക്ക് നന്നായി അറിയാം. അവന്മാരുകൊണ്ടോയി തട്ടുവോ മുട്ടുവോ വല്ലോം ചെയ്താൽ അവരെക്കൊണ്ട് ഞാനത് പണിയിക്കില്ലാന്നും വീട്ടുകാർക്കറിയാം. ആ കാശും കാർന്നോർക്കു പോകും. അതുകൊണ്ടാണ് എനിക്ക് കാറൊന്നും തന്നുവിടാത്തത്. ആർക്കും കൊടുക്കില്ലാന്ന് അവരോട് നുണ പറയാനും വയ്യ. കാരണം എന്റെ ബൈക്കുമായി ഡിബിനൊക്കെ പോകുന്നത് അവര് കാണാറുള്ളതാണ്. അതും കാർന്നോർക്ക് ഇഷ്ടമുള്ള കാര്യമല്ല. നമ്മുടെ വണ്ടി നമ്മുടെ ആവശ്യത്തിന് മാത്രം. അതാണ് പുള്ളിയുടെ ലൈൻ. പക്ഷേ ഞാനൊരു മുടിയനായ പുത്രനായതിനാൽ പുള്ളി പറയുന്നതിന് മുമ്പേ കൊടുത്തുകഴിയും. അമ്മ മാത്രം ബൈക്കിന്റെ കാര്യത്തിൽ മിണ്ടാറില്ല. കാരണം അതുമായി വരുമ്പോഴാണ് ഡിബിനെ കുടഞ്ഞ് എന്റെ കാര്യങ്ങൾ അറിയുന്നത്. ആ വഴി മുടക്കാൻ വയ്യല്ലോ.. എന്തായാലും കാലുപിടിച്ചാണ് അമ്മയെക്കൊണ്ടു സമ്മതിപ്പിച്ചത്. അച്ഛനറിയരുത് എന്ന ഉഗ്രശാസനയോടെയാണ് തന്നുവിട്ടതും. പക്ഷേ പുള്ളിയാണ് ആദ്യമറിഞ്ഞതും. എങ്ങനെയാണെന്നല്ലേ... അതായിരുന്നു ഭദ്രകാളിയുടെ ആദ്യത്തെ സഹതാപ പഠനം.