ശ്യാമയും സുധിയും

Shyamayum Sudhiyum | Author : Eakan

മാനേജർ സുന്ദരന്റെ ഓഫീസ് റൂമിൽ ഇരിക്കുകയായിരുന്നു ശ്യാമ. അപ്പോഴും ശ്യാമയുടെ മനസ്സ് രാവിലെ നടന്ന അപകടത്തെ കുറിച്ചാണ്. താൻ കാരണം അയാൾക്ക് എന്തെങ്കിലും പറ്റിയിട്ടുണ്ടാകുമോ എന്നതായിരുന്നു അവളുടെ ചിന്ത.

അയാൾ ആരെന്നോ എന്തെന്നോ ഒന്നും അറിയില്ല. അയാൾ തന്നെ കണ്ടു കാണുമോ എന്നും അറിയില്ല. അയാളെ ആരൊക്കെയോ ചേർന്ന് ഹോസ്പിറ്റലിൽ കൊണ്ട് പോയിരുന്നു. ഇവിടെ നിന്നും ഇറങ്ങിയിട്ട് വേണം ഹോസ്പിറ്റലിൽ പോയി അയാളെ ഒന്ന് കാണാൻ.

വലിയ പരിക്ക് ഒന്നും ഇല്ലെങ്കിൽ ഒരു സോറി പറയണം. അല്ലെങ്കിൽ തനിക്കു മനഃസമാധാനം കിട്ടില്ല.

അതിന് ഈ മാനേജർ സാർ ഒന്ന് വിട്ടിട്ടു വേണ്ടേ പോകാൻ.

"സാർ ഞാൻ.. എനിക്ക് അത്യാവശ്യം ഒന്ന് പുറത്തേക്ക് പോകാൻ ഉണ്ടായിരുന്നു. ഞാൻ നാളെ നേരത്തെ വന്നോളാം" ശ്യാമ മാനേജർ സുന്ദരനോട് പറഞ്ഞു. സുന്ദരൻ എന്നത് മാനേജറുടെ പേര് ആണ്.

"അതേ ശ്യാമേ... ഞാൻ ശ്യാമയെ വിളിപ്പിച്ചത് ഒരു കാര്യം പറയാൻ ആണ്. അത് ശ്യാമയ്ക്ക് വിഷമം ഉണ്ടാക്കുന്നതാണ്.. അതാണ് പറയാൻ എനിക്ക് ഒരു വിഷമം."

"എന്താണ് സാർ പ്രശ്നം.. എന്ത് വിഷമം ഉണ്ടാക്കുന്നതാണ് സാർ... എന്റെ അമ്മയ്ക്ക് എന്തെങ്കിലും പറ്റിയോ സാർ.."

"അതൊന്നും അല്ല. ഈ സ്കൂളും ഇവിടെയുള്ള മറ്റു സ്ഥാപനങ്ങളും എല്ലാം വലിയ പറമ്പ് കാരുടെ ആണ് എന്നറിയാലോ ശ്യാമയ്ക്ക്.? ഞാൻ വെറും മേനേജർ മാത്രം. അവര് പറയുന്നത് മാനേജ് ചെയ്യുന്ന മാനേജർ. "

"സാർ കാര്യം എന്താണെങ്കിലും പറയു ഇങ്ങനെ ടെൻഷൻ ആക്കാതെ."

"തുറന്നു പറയാലോ.. ശ്യാമേ.. ഇവിടെ ശ്യാമയുടെ സ്ഥാനത്ത് പുതിയ ഒരാൾ ചാർജ് എടുക്കാൻ വരുന്നുണ്ട്. അതുവരെയേ ശ്യാമയ്ക്ക് ഇവിടെ ജോലി ഉണ്ടാവൂ. അയാൾ ഇന്നോ നാളെയോ വരാൻ സാധ്യത ഉണ്ട്."

"സാർ... അപ്പോൾ ഞാൻ... ഞാൻ ഇനി എന്ത് ചെയ്യും സാർ.? "

"അതിപ്പോൾ ഞാൻ എന്താ പറയുക.. ഞാൻ ഒന്ന് സംസാരിച്ചു നോക്കാം.. എന്നേ പറയാൻ പറ്റു. അല്ലങ്കിൽ ശ്യാമ തന്നെ മുതലാളിമാരെ പോയി കണ്ടു നോക്ക്. കാര്യം പറഞ്ഞാൽ ചിലപ്പോൾ അവരുടെ മനസ്സ് മാറിയാലോ "

"സാർ ഞാൻ പറഞ്ഞാൽ... അവർ സമ്മതിക്കുമോ? ഈ ജോലി ഇല്ലെങ്കിൽ എന്റെ വീട്ടിലെ കാര്യങ്ങൾ ആകെ കുഴയും. വീട്ടു ചിലവ് , അമ്മയുടെ ചികിത്സ, കടം, എല്ലാം ആകെ തെറ്റും.."

"എന്നാൽ മറ്റൊരു കാര്യം ഞാൻ മുൻപ് സൂചിപ്പിച്ചിരുന്നു.. അന്ന് അത് ശ്യാമ കേട്ടില്ല. അത് ഒന്ന് നോക്കിയാലോ? ശ്യാമക്ക് ഇഷ്ട്ടപെട്ടാൽ മാത്രം മതി. എന്ത് പറയുന്നു. "

"അത് വേണ്ട സാർ . ഞാൻ മുതലാളിയെ പോയി കണ്ടു നോക്കാം. അതിന് മുൻപ് എനിക്ക് ഹോസ്പിറ്റലിൽ വരെ ഒന്ന് പോകണം. ഞാൻ പോയിക്കോട്ടെ സാർ" "

"എന്ത് പറ്റി. ? ശ്യാമയ്ക്ക് എന്തെങ്കിലും അസുഖം? അതോ അമ്മയ്ക്ക് വീണ്ടും..?" "

"അല്ല സാർ . അതൊന്നും അല്ല. എന്റെ ഒരു സുഹൃത്തിനു ഒരു ആക്സിഡന്റ് ഉണ്ടായെന്നു അറിഞ്ഞു ഒന്ന് പോയി കാണണം. "