Chapter Title : സോമന്റെ ആത്മാവ് 1 [സ്പൾബർ]

ശാന്തനായി ചോദിച്ചു..ആ ചോദ്യം അവിടെ കൂടിയവർ ഓരോരുത്തരും രഹസ്യമായി ചോദിച്ചു.. എവിടെ.. തെളിവിടെ..?.

“സാർ… പത്തര മണിയോടെയാണ് ഞങ്ങൾ ബാറിൽ നിന്ന് മടങ്ങിയത്… അപ്പോൾ ആശാന്റെ കയ്യിൽ ഒരു മൊബൈൽ ഫോണും പഴ്സുമല്ലാതെ വേറൊന്നും ഉണ്ടായിരുന്നില്ല…

പോരുന്ന വഴിക്ക് എവിടെയും ഞാൻ ബൈക്ക് നിർത്തിയിട്ടില്ല… ആശാൻ വീട്ടിൽ മദ്യം വാങ്ങി വെക്കാറുമില്ല… പിന്നെ ഈ മദ്യക്കുപ്പിയും വിഷക്കുപ്പിയും ഇവിടെ എങ്ങിനെ വന്നു… ?”..

കയ്യടിക്കാൻ തോന്നി ജെൻസിപ്പിള്ളാർക്ക്… എന്തൊരു കൃത്യമായ നിരീക്ഷണം..

നാസർ അൽപം ക്ഷീണത്തോടെ കോൺസ്റ്റബിൾ മനോജിനെ നോക്കി.. അവൻ മുന്നോട്ട് വന്നു..

“ടാ… നീ ഏതാടാ… അധികം ഷൈൻ ചെയ്യല്ലേ… തൂക്കിയെടുത്ത് നിന്നെ അകത്തിടും… മിണ്ടാതെ മൂലക്കെങ്ങാനും മാറി നിൽക്കെടാ… “..

മനോജ് അട്ടഹസിച്ചു..

“ ഹാ… അതെന്ത് വർത്താനാ സാറേ… അനിക്കുട്ടൻ പറഞ്ഞതിലെന്താ

തെറ്റ്… ?. നിങ്ങൾ അവനെ ഭീഷണിപ്പെടുത്താതെ അവൻ പറഞ്ഞതിൽ കാര്യമുണ്ടോന്ന്

നോക്ക്… “..

മുൻ മെമ്പറും അത്യാവശ്യം കാര്യവിവരമുളളവനുമായ വിജയൻ വിഷയത്തിലിടപെട്ടു.. അത് തനിക്ക് ക്ഷീണമാകുമെന്ന് തോന്നിയ നിലവിലെ മെമ്പർ നൗഷാദും വിഷയം ഏറ്റെടുത്തു..

“സാറേ… അനിക്കുട്ടൻ പറയുന്നതിലും കാര്യമുണ്ട്… “..

അതോടെ കോൺസ്റ്റബിൾ മനോജ് പരാജയ ഭീതിയോടെ എസ് ഐ നാസറിനെ നോക്കി.. നാസറിനും രംഗം പന്തിയല്ലെന്ന് തോന്നി..

“ശരി… എന്തൊക്കെയാ നിന്റെ സംശയങ്ങൾ… ?..എല്ലാം വ്യക്തമായിപ്പറ… നമുക്കന്വേഷിക്കാം…”..

നാസർ സൗഹാർദ്ദ ഭാവത്തിൽ അനിക്കുട്ടനെ നോക്കി..

“സാറേ… ആശാൻ ആത്മഹത്യ ചെയ്തതല്ലെന്ന് ഞാൻ ഉറപ്പിച്ച് പറയും… കാരണം ഈ മദ്യവും വിഷവും ആശാൻ വാങ്ങിയതല്ല… ഇന്നലെ രാത്രി ആശാനെ ഞാനിവിടെ കൊണ്ട് വന്ന് കിടത്തുമ്പോ ആശാന്റെ കയ്യിലൊന്നുമില്ലായിരുന്നു…”..