ചിത്രയുടെ ചാരിത്ര്യം 5 [Kambi kannan] 140

യാത്രയിലുടനീളം ഗോകുൽ വളരെ ആവേശത്തിലായിരുന്നു. കൊച്ചിയിലെ പുതിയ ഫ്ലാറ്റിനെക്കുറിച്ചും അവിടെ താൻ ഒരുക്കിയിരിക്കുന്ന സൗകര്യങ്ങളെക്കുറിച്ചും പുതിയ ജോലിയെക്കുറിച്ചും അവൻ വാതോരാതെ സംസാരിച്ചു. ചിത്ര അവന്റെ തോളിൽ തല ചായ്ച്ചു കിടന്നു. ഈ സുരക്ഷിതത്വമാണ് തനിക്ക് വേണ്ടതെന്ന് അവൾ ഉറപ്പിച്ചു. പഴയ ഗോകുൽ, പഴയ പ്രണയം… എല്ലാം തിരികെ കിട്ടിയതുപോലെ.

കാർ കടവന്ത്രയിലെ ഫ്ലാറ്റിന് മുന്നിൽ ചെന്നു നിന്നു. ലിഫ്റ്റിൽ കയറുമ്പോഴും ഗോകുൽ അവളുടെ കൈ വിട്ടിരുന്നില്ല. ഫ്ലാറ്റിന്റെ വാതിൽ തുറന്ന് അകത്തേക്ക് കയറിയപ്പോൾ ചിത്ര ഒന്ന് അമ്പരന്നു. വളരെ മനോഹരമായി ഒരുക്കിയ ലിവിങ് റൂം. ഇളം ക്രീം കളർ നിറഞ്ഞ ചുവരുകൾ. അതിനൊത്ത ഇന്റീരിയർ.

ഒപ്പം വലിയ ജനാലകളിലൂടെ കൊച്ചി നഗരത്തിന്റെ കാഴ്ചകൾ കാണാം. അവൾ ഓടി നടന്നു എല്ലാം കണ്ടു.. ചെറിയ അടുക്കള.. പിന്നെ വിശാലമായ ഒരു ബെഡ്റൂം. ആ ബെഡ് റൂമിനോട് ചേർന്ന് ഒരു ബാൽക്കണി. അവിടെ പോയി അവൾ പുറത്തെ കാഴ്ചകളിലേക്ക് നോക്കി. താൻ ആഗ്രഹിച്ച ആ പുതിയ ജീവിതം ഇതാ ഇവിടെ തുടങ്ങുന്നു.

പഴയത് ഒന്നും തന്റെ ജീവിതത്തിൽ ഇനി ഉണ്ടാവില്ലെന്ന് അവൾ ഒരിക്കൽ കൂടി ഉറപ്പിച്ചു. അവളുടെ കണ്ണും മനസ്സും ഒരുപോലെ നിറഞ്ഞു..

“ഇത് ഇനി നമ്മുടേത് മാത്രം…” ഗോകുൽ അടുത്തേക്ക് ചെന്ന് അവളെ പിന്നിലൂടെ കെട്ടിപ്പിടിച്ചു.. ആ ദിവസം മുഴുവൻ പുതിയ വീടിനെ തങ്ങളുടേതാക്കി മാറ്റുന്ന തിരക്കിലായിരുന്നു അവർ. ഫ്ലാറ്റിന്റെ ഓരോ കോണിലും ഗോകുലിന്റെയും ചിത്രയുടെയും കൈസ്പർശമേറ്റു. ചിത്ര വളരെ ഉത്സാഹത്തിലായിരുന്നു; ഓരോ പാത്രങ്ങളും വസ്ത്രങ്ങളും അടുക്കി വെക്കുമ്പോഴും താൻ ജീവിതത്തെത്തന്നെയാണ് ക്രമീകരിക്കുന്നത് എന്നൊരു തോന്നൽ അവൾക്കുണ്ടായി.