പക്ഷേ, റോഡിലേക്കിറങ്ങിയ അമ്പിളിയുടെ മുഖം കുത്തിവീർത്തു.. റോഡരികിൽ നിർത്തിയിട്ട ഒരു ബൈക്കും, അതിലിരിക്കുന്ന ചിരിക്കുന്ന ഒരു മുഖവും പ്രതീക്ഷിച്ച അമ്പിളി നിരാശയായി..ബൈക്കില്ല.. അതിലിരിക്കുന്ന ആളും.. കുറച്ചപ്പുറെ ഒരു കാറ് നിർത്തിയിട്ടിട്ടുണ്ട്..കടു ചുവപ്പ് നിറത്തിലുള്ള പുതിയൊരു സ്വിഫ്റ്റ് കാറ്..
ഒരു പക്ഷേ ആ കാറവിടെ കിടക്കുന്നത് കൊണ്ടാവും സുധി വരാത്തതെന്ന് അമ്പിളിക്ക് തോന്നി.. അവൾക്ക് സങ്കടം വരുന്നുണ്ടായിരുന്നു.. ഉള്ളിൽ ഒരു തേങ്ങലോടെ അവൾ മുന്നോട്ട് നടന്നു..
അവനെയൊന്ന് കാണാതെ തനിക്കിനി ഒന്നിനും കഴിയില്ലെന്ന് അമ്പിളിക്ക് മനസിലായി..അത്രയേറെ കൊതിച്ചു സുധിയെ ഒന്ന് കാണാൻ.. രാത്രി ഫോൺ വെക്കുമ്പോൾ പോലും പറഞ്ഞതാണ് രാവിലെ കാണണമെന്ന്..അല്ലെങ്കിലും താൻ പറയുന്നത് കേൾക്കാൻ അവൻ തന്റെ ആരാ..?.
ഭർത്താവോ..?..
അതോ കാമുകനോ..?..
ആരുമല്ല..അല്ലെങ്കിലും പുരുഷന്മാർ എല്ലാവരും കണക്കാ.. പറഞ്ഞ് പറ്റിക്കും..
മനസിൽ പതം പറഞ്ഞ് നടക്കുന്ന അമ്പിളിയുടെ കണ്ണുകൾ നിറഞ്ഞിരുന്നു..
പെട്ടെന്ന് അവളൊരു ചൂളം വിളി കേട്ടു.. ചില വൃത്തികെട്ടവന്മാർ പെണ്ണുങ്ങൾ നോക്കാനായി വിളിക്കുന്ന ഒരു തരം ചൂളം വിളി..അത് ആ കാറിൽ നിന്നാണെന്ന് മനസിലായതും അമ്പിളിക്ക് കലി കയറി..അല്ലെങ്കിൽ തന്നെ ദേഷ്യവും സങ്കടവും നിയന്ത്രിക്കാനാവാതെയാണവൾ നടക്കുന്നത്.. അവൾ കാറിന് തൊട്ടടുത്തെത്തിയിരുന്നു.. തന്റെ ദേഷ്യവും സങ്കടവുമെല്ലാം തീർക്കാനായി ആ ചൂളമടിച്ചവനോട് രണ്ട് വർത്താനം പറയാനായി അവൾ ആ ഡ്രൈവിംഗ് സീറ്റിലേക്ക് നോക്കി..
