മഴനീർതുള്ളികൾ 5 [Anamika] 117

“എടീ നീയമ്മേടെ മുറീല് കിടക്കാമോ……”

“അയെന്തെ…..”

“ഹരി പറഞ്ഞട്ടാ….”

അവനെ ഒറ്റിയതൊന്നും അല്ല പൊന്നാരേട്ടൻ പറഞ്ഞിട്ടാണെന്ന് കേട്ടാൽ പെട്ടെന്ന് സമ്മതിച്ചാലോന്നോർത്താണ്……

“കരി……ഈ കരി തന്നെയാ എന്റച്ഛന്റെ തലവെട്ടം കണ്ടാൽ ഏത് പാതിരാത്രിക്കണേലും എന്നെയെടുത്തോണ്ട് വന്നു കൂടെ കിടത്തി ഉറക്കിക്കൊണ്ടിരുന്നേ…..ആ അങ്ങേർക്കൊരു പെണ്ണിനെ കിട്ടീപ്പോ അമ്മേം വേണ്ട പെങ്ങളും വേണ്ട…..”

“പ്ലീസ് ഡീ…..” അമ്മു കാലുപിടിച്ചാണെലും സാരല്ലന്ന് വച്ചു….

“ചുമ്മാണ്ടൊന്നും പറ്റില്ല…..സൺസ്‌ക്രീൻ ഓഫറുണ്ട് ബയ് one ഗെറ്റ് one പാതി ഷെയർ നീയിടണം പറ്റുവോ….”

നല്ല മണ്ണ് കണ്ടാ മൂത്രൊഴിച്ചിട്ടാണേലും കുഴിക്കണംന്നാണ് കൊച്ചിന്റെ പോളിസി അല്ല പിന്നെ….

“മൊത്തോം ഇട്ടോളാം…..ഒന്നപ്പുറത്തു പോടീ….”

അതുകൊണ്ടും തീർന്നില്ല അവൻ വാങ്ങികൊണ്ടുവന്ന ബാക്കി സ്വീറ്റ്സും ചോക്ലേറ്റും എന്തോ ദയ തോന്നി ഒന്നൊഴിച്ചു ബാക്കിവച്ചിട്ട് കൂടോടെ വായിൽ കടിച്ചുപിടിച്ചു ഒരു കയ്യിൽ ബക്കറ്റും മറുകയ്യിൽ ഫോണുമായി ചിന്നു ഇറങ്ങാൻ തുടങ്ങി…..

“ഡീ നിക്ക്…..ഇതൂടെ…..”

അമ്മുവിന്റെ  എയർപോടും നീട്ടി……

“നിന്റേതിന്റെ ഒരെണ്ണം വർക്കാവില്ലല്ലോ…അതാ…..”

ചിന്നു അവളെ ചുഴിഞ്ഞൊന്നു നോക്കി…..

“ഒച്ചയൊക്കെ നല്ലോണം വച്ചിട്ട് കണ്ടോട്ടോ….” ഒരു കള്ളച്ചിരി ചിരിച്ച് അമ്മു കൂട്ടിച്ചേർത്തതും ഇതിലും കൂടുതൽ താങ്ങാൻ വയ്യേ എന്ന മട്ടിൽ ചിന്നു ജെറ്റ് പോണപോലൊരു പോക്കങ്ങു പോയി……