ശ്യാമയും സുധിയും 2 [ഏകൻ]

വേണ്ടെന്ന് വെച്ചാൽ ഇനിയും തനിക്കു ആ ജോലി കിട്ടും. അത് മാത്രമല്ല ഒരുപക്ഷെ പോലീസ് അന്വേഷിച്ചു വന്നാൽ തല്ക്കാലം പേടിക്കാതെ കഴിയാം. ശ്യാമ അങ്ങനെ പലതും ആലോചിച്ചു കൊണ്ടിരിക്കുമ്പോൾ.

" എന്താണ് വലിയ ആലോചനയിൽ ആണല്ലോ..? ഇത് ശ്യാമ നേരത്തെ എന്നോട് ചോദിച്ച ചോദ്യം ആണ്. ഇപ്പോൾ അത് ഞാൻ തിരിച്ചു ചോദിക്കുന്നു. എന്താണ് വലിയ ആലോചനയിൽ ആണല്ലോ? "

"അത് ഞാൻ വാടക വീടിനെ കുറച്ചു ആലോചിച്ചതാ... ഒരു വീടുണ്ട്.. വാടക കൃത്യമായി തരാമെങ്കിൽ ശരിയാക്കി തരാം."

"വാടക കൃത്യമായിതന്നെ തരാം. പക്ഷെ അതിനു ഒരു മാസത്തെ സമയം തരണം. "

"അതെന്തിനാ ഒരു മാസത്തെ സമയം.?"

"അത് ജോലിക്ക് കയറി കഴിഞ്ഞാൽ ഒരുമാസം വേണ്ടേ ശമ്പളം കിട്ടാൻ? അതിനാണ്. അതിന് മുൻപ് എന്തെങ്കിലും വഴിയുണ്ടെങ്കിൽ നോക്കാം."

"ഈ അവസ്ഥയിൽ ജോലിക്ക് പോകാൻ പറ്റുമോ..?"

"ജോലിക്ക് പോകുന്നത് പോയിട്ട് .. നേരാം വണ്ണം ഭക്ഷണം കഴിക്കാൻ കൂടെ പറ്റില്ല. കണ്ടില്ലേ എന്റെ കൈ.? അല്ല!!! എവിടെയാ വീട്.. ഇവിടെ അടുത്താണോ?"

"അല്ല. ഇവിടുന്ന് കുറച്ചു പോകണം "

"ആരുടെ വീടാണ്...? വലിയ വാടക ആകുമോ?"

"വാടക ഒക്കെ നോക്കിയിട്ട് പറയാം. എന്തായാലും കൂടുതൽ ഒന്നും വാങ്ങില്ല. അതോർത്ത് പേടിക്കേണ്ട."

"ശ്യാമയുടെ വീടിന്റെ അടുത്താണോ? എങ്കിൽ ശ്യാമയെ എന്നും കാണുകയും കുറച്ചു സമയം ഇതുപോലെ സംസാരിക്കുകയും ചെയ്യാമല്ലോ. അത് ഇപ്പോൾ ഒരു ആശ്വാസമാണ് "

ശ്യാമയ്ക്ക് അത് കേട്ടപ്പോൾ എന്തോപോലെ തോന്നിയെങ്കിലും അതൊന്നും പുറത്തു കാണിച്ചില്ല.

"വീട് . എന്റെ വീട് തന്നെയാണ്. എന്റെ വീടിന്റെ മുകളിൽ ഒരു റൂം ഉണ്ട് .. കുളുമുറിയും കക്കൂസും എല്ലാം മുകളിൽ തന്നെയുണ്ട്. ഞാൻ അമ്മയോട് കൂടെ ഒന്ന് സംസാരിച്ചു നോക്കട്ടെ..?"

"എന്നാൽ പിന്നെ അതു മതി. വേറെ ഒന്നും നോക്കാൻ ഇല്ല. പക്ഷെ ഈ കാലും കൊണ്ട് മുകളിൽ കയറുന്ന കാര്യം ആണ് കഷ്ട്ടം . എന്നാലും സാരമില്ല. ഇതാകുമ്പോൾ ഭക്ഷണകാര്യവും ശ്യാമയോട് തന്നെ പറയാമല്ലോ. അതിന് വേറെ പണവും തരാം. അല്ലാതെ ഈ അവസ്ഥയിൽ ഉണ്ടാക്കി കഴിക്കാൻ ഒന്നും പറ്റില്ലല്ലോ..? ചോദിക്കുന്നത് കൊണ്ട് ഒന്നും തോന്നരുത് താഴെ വേറെ മുറികൾ ഒന്നും ഇല്ലേ..?. താഴെ മുറിയുണ്ടെങ്കിൽ മുകളിലേക്ക് കയറേണ്ട കാര്യം ഇല്ലല്ലോ?"

"താഴെ മുറിയുണ്ട്. പക്ഷെ ബാത്‌റൂമിൽ പോകണമെങ്കിൽ മുകളിൽ തന്നെ പോകേണ്ടി വരും. അല്ലെങ്കിൽ പുറത്ത് പോകേണ്ടി വരും. "

" അതെന്താ അങ്ങനെ .. താഴെ ബാത്റൂം ഒന്നുമില്ലേ.? "

" താഴെ ബാത്റൂം ഉണ്ട്. പക്ഷേ അത് അകത്താണ്. . അകത്തുള്ള മുറിയിൽ ഞാനും അമ്മയും കിടക്കുന്നുണ്ട്. പിന്നെയുള്ള ഒരു മുറി അത് പുറത്താണ്. ഓഫീസ് മുറിപോലെ ഉള്ളത്. അതിൽ ബാത്റൂം ഇല്ല. "

"എന്നാ വേണ്ട മുകളിലുള്ള മുറി തന്നെ മതി. "

"ശരി ഏതായാലും ബില്ല് താ. തല്ക്കാലം ഞാൻ തന്നെ അത് അടക്കാം. പണം പിന്നീട് തിരിച്ചു തന്നാൽ മതി."

"ഞാൻ കാരണം ശ്യാമയ്ക്ക് ഒരുപാട് ബുദ്ധിമുട്ട് ആയല്ലേ?"