Chapter Title : തേജാത്മികം 12 [Nishinoya]

വീട്ടിൽ ചെല്ലുമ്പോൾ അവിടെ ആരും ഇല്ലായിരുന്നു. കല്ലു സ്കൂളിലും ദേവു ജോലിക്കും പോയിട്ടുണ്ടായിരുന്നു. നേരെപോയി പല്ലുതേച്ചു കുളിച്ച് ഷോപ്പിലേക്ക് തിരിച്ചു.

"...ടാ ഞായറാഴ്ച നീ ദേവൂനെയും കൊച്ചിനെയും കൂട്ടി വീട്ടിലേക്ക് വരണം കേട്ടോ..." ഉച്ചക്ക് ഭക്ഷണം കഴിക്കുന്നതിന്റെ ഇടക്ക് മാമൻ പറഞ്ഞു.

"...എന്താ മാമ പ്രത്യേകിച്ച്..." ഞാൻ കാര്യം തിരക്കി.

"...നിന്നെയും ദേവൂനെയും വിളിച്ച് വിരുന്ന് തരണം എന്ന് നിന്റെ മാമി കുറച്ചു ദിവസമായി പറയുന്നു. ഞാനും വിചാരിച്ചു വിവാഹം കഴിഞ്ഞ് നിങ്ങൾ എങ്ങും പോയില്ലല്ലോ ഞായർ അവൾക്ക് ലീവും ആണല്ലോ. അന്ന് വേറെ പരുപാടി ഒന്നും ഇല്ലല്ലോ..." മാമൻ സംശയത്തോടെ ചോദിച്ചു.

"... വേറെ പരുപാടി ഒന്നും ഇല്ല. ഞാൻ അവളോട് ഒന്ന് ചോദിച്ച് മാറ്റം വല്ലതും ഉണ്ടെങ്കിൽ ഞാൻ പറയാം..." അതിന് മാമൻ ഒന്ന് മൂളി.

"...അഹ് പിന്നെ നീതു നിന്നെ തിരക്കി. കഴിച്ചിട്ട് അങ്ങോട്ട് ഒന്ന് ചെല്ല്..." ഞാൻ അതിന് ഒന്ന് മൂളി.

"...എന്താ ചേച്ചി എന്നെ കാണണം എന്ന് പറഞ്ഞത്..."

"...എടാ അടുത്ത മാസം ഞാൻ ഇവിടെന്ന് ഇറങ്ങാട..."

"...അതെന്താ ചേച്ചി പെട്ടെന്ന് ഇങ്ങനെ ഒരു തീരുമാനം..."

"... എടാ നിനക്ക് അറിയാലോ അഖിലേഷേട്ടൻ പുറത്തും ഞാൻ ഇവിടെയും അല്ലെ. അവിടെ എനിക്ക് ഒരു ജോലി ഏട്ടൻ സെറ്റ് ആക്കിയിട്ടുണ്ട് അപ്പൊ ഉടനെ പോവേണ്ടി വരും..."

"...ആണോ. ചേച്ചി ഇവിടെ ഉള്ളതോണ്ട് എനിക്ക് ഈ വശത്തേക്ക് നോക്കേണ്ടതെ ഇല്ലായിരുന്നു. ചേച്ചി പോയ എല്ലാം അവതാളത്തിൽ ആവും. സാരമില്ല വേറൊരാളെ കിട്ടോന്ന് നോക്കട്ടെ. ചേച്ചിയുടെ പരിചയത്തിൽ ആരെങ്കിലും ഉണ്ടൊന്നും നോക്ക്..."

"...ഞാൻ നോക്കാടാ..."