മഴനീർതുള്ളികൾ 4 [Anamika] 944

അവൾക്കിതൊക്കെ ആദ്യ അനുഭവം ആണ്…

പാട്ടും കൂതും മേളവുമെല്ലാം കഴിഞ്ഞ് ഹരിയും ടീമും പതിയെ പന്തലിന്റെ അരികുപറ്റി പിന്നാമ്പുറത്തെ വേലിക്കലേക്ക് നടക്കുന്നത് കണ്ടാണ് ചിന്നു അമ്മുവിന്റെ അടുത്തേക്ക് വന്നത്….

മഴപെയ്യാനുള്ള കോള് കണ്ട് അകത്തേക്ക് നീക്കിയിട്ട കസേരകളിൽ ഒന്നിൽ ഇരുന്നു മറ്റൊന്നിലേക്ക് തല ചായ്ച്ചു കിടക്കുകയായിരുന്നു അമ്മു….

ചിന്നു അവളെ തോളിൽ തട്ടിവിളിച്ചെണീപ്പിച്ചു…

“ഡീ….അടുത്ത കലാപരിപാടിക്ക് പെട്രോളടിക്കാൻ ഹരിയേട്ടനും എന്റേട്ടനും ബാക്കിയുള്ള മുതലുകളും മുങ്ങീട്ടുണ്ട്…വേണേൽ ഇപ്പൊ പോയി പിടിച്ചോ…ഇല്ലേൽ കണവനിവിടെ കാവടി തുള്ളുന്നത് മോളു ലൈവ് ആയിട്ട് കാണണ്ട വരും….”

“ഇത്രേം നേരം പിന്നിവിടെ അങ്ങേര് ധ്യാനിക്കുവായിരുന്നല്ലോ….”

“അതൊക്കെ എന്ത്…..ഒരു കൊട്ടിക്കലാശം ബാക്കിയുണ്ട് മോളേ….പെറ്റ തള്ള സഹിക്കൂല….മൂക്കറ്റം കേറ്റീട്ട് വന്നിട്ട് ഒരു മുതുക്ക് കൂത്താട്ടം ഉണ്ടിവിടെ ഇനി…..ഇപ്പൊ പോയ റാണിയേച്ചിടെ വീടിന്റെ പിറകിലെ അലക്കുകല്ലിന്റെ മണ്ടേൽ കാണും എല്ലാം…ആ കുരിപ്പ് ദീപു അങ്ങോട്ടാ പോയേക്കണേ….“

ചിന്നു അവളെ പിടിച്ച് വലിച്ചു എണീപ്പിച്ചു….

അവൻ തുള്ളുന്നതിനോടൊന്നും അമ്മുവിന് വലിയ വിയോജിപ്പില്ല..പക്ഷെ വെള്ളമടിയുടെ കാര്യം കേട്ടതും എണീറ്റു…ഒറ്റക്ക് നടക്കാൻ പേടിയുള്ളത് കൊണ്ട് ചിന്നുവിനെയും കൂട്ടി കല്യാണ വീടിന്റെ പിന്നിലെ അതിരു കടന്ന് റാണിച്ചേച്ചിയുടെ വീടിന്റെ മുറ്റത്തെ ജാതി ചോട്ടിൽ നിന്നു….